Yeremiya 43 - Ala Wone Peenok Peebi Mbanak

Yeremiya o Metit wonok pi nogogwaarak wone

¹ It Yekura inogoba Aliku Ala nen Yeremiya yoraawak nduk, wone yoreegerak nogo abok aret mbininogo it aakumi nogo yorage mbareegi,

² Kotaya aput Atariya inom, Kareya aput Yokanan inom, it aakumi iniki tiyappaka abok aret inom, nen Yeremiya yogo logonet, “Ninogoba Aliku Ala nen, It o Metit ye mbambatinuk logowak nduk, noorak mage, yora nak o, yinuk, yegerak, yo'niragandak ti, at yuulik kagak, yo'niragandak me, pilit aret ari agandik o.

³ Nit aap Mbaben mendek ineenggime pinanege keenok, it nen ninoorogo pinanugwi ilik, wo'niren o Mbaben mbo pinani nogwe a, eeruwak nduk, at Neriya aput Mbaruk nen kinikime nggaganogo pagagerak paga yo'nirage keego o,” yinuk, yoreegwaarak.

⁴ Yogo nogogwaarik, at Kareya aput Yokanan inom, it aap ineegin warak inoweewi inom, aakumi abok aret inom, at Aliku ALA nen, “Kit o Yekura aret logonip o,” yinuk, yoragagerak kagak inaruk konengga'lek aret

⁵ at Kareya aput Yokanan nogo inom, it ineegin warak inoweewi nogo inom, nen it aakumi eegu yumbunik ma'na'nuk arit nogogwam yi aakumi ndi aakumi inenggela'me nogome nen iniyokan o Yekura wogogwaarak nogo wogoren nogwe,

⁶ it aap endagembogut eebe wonok nega inowe Nebutararan nen aap Tapan ombooluk Akikam aput Nggeraliya inarum logowak nduk mippereegerak ineebe aap inom, kumi inom, inapurilogwe inom, aap endagembogut apurilogwe komologwe inom, wogoren nogwe, ndi, Ala yoge kagak yoraga Yeremiya kunduk, Neriya aput Mbaruk kunduk, wogoren nogwe,

⁷ eerit Aliku ALA nen yoragagerak tagambunuk, o Metit unggwi nogo nogogwaarik, o Tapanaket time ari nogogwaarak.

It Metit mendek Nebukanetat abu'me tebe yuurak wone

⁸ At Yeremiya nogo o Tapanaket wonage me, at Aliku ALA nen yoreegerak nogo yi aret.

⁹ “Yugum yo'nggok keenggime woppunuk, it Yekura mendek inigen iigak, o Tapanaket aap endagembogut Pirawun awi o nggwok abe wurik me tu unggwage menggim yugum ndoonak nogo pilanogo yugum ti, time kiraappunuk, obaga nggween nggabok mbenanogo pege logomenggerik, yugum pilanak nogo obaane'me ndoonogo punu o.

¹⁰ Ti eeke logomenggendik, it yorage logonet, At Omaawi Lombok Menggerak Iterali inogoba Aliku Ala nen yegerak nogo yi aret. At nayeloman it Mbaben mendek inowe endagembogut Nebukanetat woraawak nduk, yoriminggirak wage kenok, yugum mbenanogo piminggim yime at wone lengganogo yorage logowam eerogo pigin me, irimbaga time awooliya wuppunuk, wone lengganogo yorage logogin o.

¹¹ At wage logomenggerik, o Metit tebenogo pege logonet, kugi andi paga kambuurak punik kenok, andi paga kambuwak nduk eeppiige, kugun wogoret piya noorak punik kenok, kugun wogoren piya nage, wooluwak paga inooriyak punik kenok, wooluwak paga inooke, eerigin o.

^12-13 Aakumi Metit mendek inagugi awi wurik kani paarogo pit nage, inagugiwak kani kungge, eegu kugun wonok nage, eerigin o. Aap ndomba ndegeninaka nen ndomba inabi inayum paga lenggek yegetak ponggonogo nappogo mengga kwak, o Metit togop aret eerogo pege logomenggerik, o Metit oonegen alut eeko logorak eyak mippugu ayuk warak nogo yigirik-noonom eerogo pege, it Metit mendek inagugi awi wurik nogo kani pit nage, eeppunuk, aru non mbanogo pega'lek kuuri'me aret nagin, yoraamunggun o,” yinuk, yoreegerak.