Yeremiya 42 - Ala Wone Peenok Peebi Mbanak

Inake tamban eeruwak nduk, Yeremiya yoreegwaarak wone

¹ Ti'nuk, aap ineegin warak inoweewi inom, at aap Kareya aput Yokanan inom, Kotaya aput Atariya inom, inendage warak inendage lek inom, abok aret nen

² Ala yoge kagak yoraga Yeremiya nogo ka wogo nogogwaarik, at yogo logonet, “Nit aa'nduk aakumi ambik aret wonogogurak kwe, nineebe we mbuuluk mban yumbunogo pinaneegwaarak wonogwe nogo kenegen abe nen niigendak me, nit yumbunik abok aret ninake nen kogoba Aliku Ala nggino yo'nok nduk, kat kowagam ari wogo o.

³ Nit o nggeeme ari noorak inom, nit nano eeriyak nogo inom, kogoba Aliku Ala nen yo'niraawak nduk, yoru o.”

⁴ Yogo mbareegwa, Ala yoge kagak yoraga Yeremiya nen it yorage logonet, “Kogoba Aliku Ala yoru o, yo'nogotak nogo, an muk naruk konenggirak me, Aliku ALA nen an yo'nege nogo we mbuuluk ambi ninikime tebenogo pigin lek abok aret paganogo yokkiraagin o.”

⁵ Yorage mbareegi, it nen Yeremiya yogo logonet, “Wone kat kogoba Aliku Ala nen, Yoret o, yokkege kenok, nit yo'nirage nogo liirogon eeka'lek niinok, at pilit lek abet aret ari, liippunuk ndak-ndak ari, eeke menggerak Aliku ALA nen enegen wo'ninake logowak o.

⁶ Nit obeelom logowok nduk, Ninake nen kogoba Aliku Ala yoru o, yinuk, yokkogoorak nogo nen wone obeelom a, maluk a, yo'nirage ti, ninaruk konenggo logogun o. Ninogoba Aliku Ala oone konembunuk, liirogon aret eeko logogun o,” yinuk, yoreegwaarak.

Tamban eereegerak onggo yoreegerak wone

⁷ Yogo mbareegwa, nogo 9 yippunuk, ambi yugwi paga Aliku ALA nen wone Yeremiya yoreegerak.

⁸ Yoge mbareegi, at Yeremiya nen Kareya aput Yokanan inom, aap ineegin warak inoweewi at inom wonage nogo inom, aakumi inendage warak inendage lek inom, abok aret wiiragagerak kuwak ari wogo mbareegwa,

⁹ it yorage logonet, “Ninake nen, Yoru o, yo'nogotak nogo yoge mbaki, Iterali inogoba Aliku Ala nen yo'negerak nogo yi aret.

¹⁰ Aaninggin inoba piige nagagirak nogo paga niniki wakkolage me, it o yime mondok logorak kenok, an nen it o minggwi kwak eerogo piyaagin lek, o wukwi kwak eerogo piige, ndi, alom kinogo wumbugwi kwak kinogo wumbiyaagin lek yi awi ndi awi yakwi kwak eerogo piige, eerigin o, yinuk, yegerak.

¹¹ Aliku ALA nen ari logonet, At aap Mbaben inowe endagembogut eebe paga inagabiti mbakwi nogo, inagabiti mbarugwaarik o. An nen it ninom wonage me, an nen aret inagap ndake, ndi, at eenggime nen wondet eerogo piige, eerigin me, inagabiti mbariyak mage o.

¹² An nen it inabuwa mbake nogo neege kenok, at inabuwa nen inanggween paga logowak nduk, teppiyaagin o, yinuk, yegerak kwe,

¹³ kit nen, Nit o yime logorak nineebi o, yinuk, kinogoba Aliku Ala oone koneniyak, Nineebi, mbakwi,

¹⁴ ndi, kit nen, Lek o. Nit o Metit wim eekwi, oone nggwok eeka trompet nogo oonebu ari konenggwi, mbi abu nen yagan wakwi, eekulik me time ari nanuk logowok o, yinuk, yogwe, eekwi kiinok,

¹⁵ kit aakumi Yekura eegu yumbunik yi wae. Aliku ALA nen yegerak nogo kinaruk konenggo logonip o. At Omaawi Lombok Menggerak Iterali inogoba Aliku Ala nen ari logonet, It o Metit noorak lombok mbakwi, ndi, Nogo logomonggoorik, time ye mbambatinuk logorak mbakwi, eeko logomenggaarik nogwe iigak,

¹⁶ wooluwak paga inooriyak inagabiti mbakwi nogo aret inoba kwi'nage, ndi, Mbi noogelo ninoba kwi'nage kero iya, mbakwi nogo aret inoba arit o Metit time aret kambit nogwe, eerugun o.

¹⁷ It aakumi abok aret o Metit nanuk time ye mbambatinuk logorak lombok mbakwi nogo, ambiriluk ambi teppiige, aaninggin inoba piige neenok, ambiriluk ambi agap ndakko'nok mbagangge, eerigin lek o. Ata, wooluwak paga inom, mbi noogelo paga inom, kugilingga paga inom, abok aret kambugun, yegerak me, yokkiragi o.

¹⁸ At Omaawi Lombok Menggerak Iterali inogoba Aliku Ala nen yegerak nogo yi aret. It Yerutalem wonogogwaarak nogo nanini inom, niniki aagi inom, inoba piyareegi kwak, it o Metit namenggaarak wonogwe iigak, nanini inoba piyaagin o. Inoba piige neenok, Aakumi pulunik aret, yogwe, inamineeri ne agan nage iigwi, inendage kumbunuk pulunogo piigwi, meek eerogo piigwi, eeko logogun me, inanggween yi, inigen ambinom kaagun mondok lek,” yegerak me, yokkiragi o.

¹⁹ Kit aakumi Yekura eegu yumbunik yi wae. Aliku ALA nen, “O Metit noorak mage o,” yinuk, yegerak me, abet aret mbarubagip nduk, an nen o yogondak kurumbi yokkirage yi, liippinip o.

²⁰ Kit nen, “Ninake at ninogoba Aliku Ala yoru o. Yoge keenok, yokkeremenggerak abok aret yo'nirage keenok, nit eerugun aret o,” yinuk, “Kogoba Aliku Ala yoru,” yo'nogotak nogo ti, kinogut punggolaawok nduk, yo'nogotak o.

²¹ At kinogoba Aliku Ala nen, “Yoret,” yo'negerak abok aret an yogondak yokkiragarak kwe, “Eeriyak, nineebi,” mbakotak me,

²² wone abet mbarubagip nduk yokkirage yi, liippinip o. Kit ye mbambatinuk logorak mbarumonggo'nom nogome wonogwe me, wooluwak paga, mbi noogelo paga, kugilingga paga, aret kambit nogo logomunggup nduk, yokkiragi o.