Yeremiya 40 - Ala Wone Peenok Peebi Mbanak

Yeremiya aap Nggeraliya imbirak wonagagerak wone

¹ Aap endagembogut eebe wonok nega inowe Nebutararan nen at Yeremiya o Arama keele maarak wonage me, piinogo wumbi wagagerak kagak, Aliku ALA nen aap Yeremiya wone yoreegerak nogo yi aret. Aap Nebutararan nen aakumi Yerutalem mendek inom, Yekura mendek inom, kugun wogoren o Mbaben mbo piya naakit nduk eeke logonet, at Yeremiya nogo inenggela'me mbutigeele maarak wonage kagagerak.

² It aap endagembogut eebe wonok nega inowe nen Yeremiya wonage kage nagagerik, at yoge logonet, “Kogoba Aliku Ala nen o yime aaninggin mondok nggwok lombok oba kwippuurak koonogo pereegerak o.

³ Aliku ALA nen koonogo pereegerak nogo ndak-ndak aret eerogo pegerak me, at eerogo pegerak yi ti, kit aakumi yi, Aliku ALA maluk eeppugwi, at oone kinaruk konengga'lek mbo pugwi, eekwi kiinok, eekerak kwe,

⁴ kat yogondak keenggi mbutigeele paga maarak wonage yi, an nen wondet eerogo pagagi o. Kat nimbirak o Mbaben noorak uugwe mbake keenok, nimbirak aret nawok o. Nimbirak nage keenok, an nen karum wake logogin o. Ndi, o Mbaben time nimbirak noorak, Neebi, mbake keenok, ti op mban aret o. O yime kat logorak op mban wonage me, o yime abok aret nege logonet, An yime aret logorak op kagi, mbake keenok, time aret logomunggun o.”

⁵ Yoge mbareegi, at Yeremiya nogo naakit nduk, ena logu ari me, aap Nebutararan nen ambinom yoge logonet, “Aap it Mbaben mendek inowe endagembogut nen o Yekura kota-kota arum logowak nduk, aap Tapan ombooluk Akikam aput Nggeraliya mippereegerak wonage me, kiyokan ka nak o. Ka nage logomenggendik, kimbirak aakumi inom wonage time logorak kenok, time aret wonage, ndi, lek kenok, noorak mbaremenggenom nogome aret nage, eeke logomunggun o,” yinuk, yoreegerak. Yoge nagagerik, aap inowe ti nen mbi kambu wogoge, amendek ambi we wogoge, eeppunuk, nawak nduk nappereegerak.

⁶ Nappege mbareegi, at Yeremiya nogo aap Akikam aput Nggeraliya o Mitipa wonage me, ka nanuk, imbirak it aakumi o time mbo piinok nogogwaarak nogo inom aret wonogogwaarak.

Aap Nggeraliya o Yekura unde logorak mippereegwaarak wone

⁷ Aap Mbaben mendek inowe endagembogut nen aap Akikam aput Nggeraliya nogo, o Yekura arum logowak nduk mippege, ndi, it aap inom, kumi inom, wologwe-komologwe inom, ambi eekkoloorak abu meek iinok, o Mbaben wogoren noolik mbo piyareegwaarak inarum logowak nduk mippege, eereegerak yogwe nogo, it Yekura ineegin warak inoweewi inom, inawuri ineegin warak inom, awo endekem ari nogogwaarak wonogwe nogo nen inaruk konembunuk,

⁸ aap Netaniya aput Itimayen inom, Kareya apuri Yokanan Yonatan imbirak inom, Tanukumet aput Teraya inom, aap Netopa mendek Epayi apuri inom, at Maaka aput aap Yetaniya inom, it inawuri abok aret inom, at Nggeraliya o Mitipa wonage me ka wogogwaarak.

⁹ Ka wogo mbareegwa, at Tapan ombooluk Akikam aput Nggeraliya nogo nen it inawuri inom wogogwaarak nogo yorage logonet, “It aap Mbaben mendek inabu'me logonet, inayuk wuriyak kinagabiti mbariyak mage o. Ata, o yime wonogo logonet, aap Mbaben inowe endagembogut abu'me logonet, ayuk wukwi kiinok, kineebe op aret logomunggup o.

¹⁰ An kunduk o Mitapa yime logonet, it aakumi Mbaben mendek neya wogwe iinok, kit yogwe nogo an yorage logogin kwe, kit yi perak, anggen mbaniyak eyom ari wage kenok, anggur anggen mbanggwi, anggen ando alik mendek mbanggwi, tayitun amburu tookwi, eerogo punuk, pogo menggam pogo logomonggotik, kota-kota tebenggologotak nogome aret ye mbambatinuk logomunggup o,” yinuk, yoragagerak.

¹¹ Ndi, it aakumi Iterali mendek abok aret o Mowap inom, o Amon inom, o Erom inom, yi o ndi o ando alik me abok aret inom, inenggela'me wonogwe nogo nen yogo logonet, “Aap Mbaben inowe endagembogut nen aakumi eegu o Yekura mbo piinok nage, ndi, aap Tapan ombooluk Akikam aput Nggeraliya nogo nen inarum logowak nduk mippege, eereegerak o,” yinuk, yogwe nogo inaruk konembunuk,

¹² it aakumi inenggela'me mak aago yi o ndi o wonogwe nogo abok aret iniyokan o Yekura aap Nggeraliya o Mitipa wonage me ka wogogwaarak. Ka wa'nuk, anggur anggen inom, anggen ando alik mendek inom, ambik aret mbanogo kuwak eerogo pereegwaarak.

Aap Nggeraliya warogo pereegwaarak wone

¹³ Ne ambi paga aap Kareya aput Yokanan inom, it endekem ari nogogwaarak ineegin warak inoweewi abok aret inom, nen at Nggeraliya o Mitipa wonage me ka wogo nogogwaarik,

¹⁴ at yogo logonet, “Aakumi Amon mendek inowe endagembogut Mbaalit nen, Aap Netaniya aput Itamayen nen kat kooriyak nduk, nappi wagaarak nogo keenu ilik?” yoreegwaarak kwe, at Akikam aput Nggeraliya nen it yogwe nogo abet mbarulik.

¹⁵ Abet mbaka'lek mbareegi, aap Kareya aput Yokanan nogo nen aap Nggeraliya o Mitapa wonage me kote yoge logonet, “Kat koorogo pagage kenok, it aakumi Yakuri mendek abok aret kowagam kuwak ari wagaarak wonogwe nogo ma'nogwe, ndi, it Yekura mendek eegu yumbunik nogo lek ogwe, eerukwak me, an nen aakumi abu ineenggo'lek iigak, kote aret aap Netaniya aput Itimayen ti warogo pi naakit nduk yu o.”

¹⁶ Yoge mbareegi, at Akikam aput Nggeraliya nen wone onggo at Kareya aput Yokanan nogo yoge logonet, “Lek o. Aap Itamayen nen kooriyak eeke yagandak ti, pilit aret me, wari noorak mage o,” yinuk, yoreegerak.