Yeremiya 38 - Ala Wone Peenok Peebi Mbanak

Yeremiya niyo nggween kabunik me wuppereegwaarak wone

^1-3 At Yeremiya nen ari logonet, “Aliku ALA nen wone yegerak nogo yi aret. Aap taani nen o kota yime puk ogwe iinok, wooluwak paga inoorak kanggwi, mbi noogelo nen kanggwi, kugilingga paga kanggwi, eerugun kwe, it aap o yime nen wundi nanuk, aap Mbaben mendek inom ogwe iinok perak, inoorugun lek inagap ndakko'nok ineenik aret logogun, ari, ndi, Aliku ALA ambi ari logonet, O kota yi, aap endagembogut Mbaben mendek awuri ineegin warak ineenggime piige neenok, tebenggolaagun, ari, eereegerak o,” yinuk, at Yeremiya puk aga'lek aakumi ambik yoragak mban eeke nogo, it aap Matan aput Tepaka inom, Patikut aput Nggeraliya inom, Telemiya aput Yukan inom, Malikiya aput Patikut inom, inaruk koneneegwaarak.

⁴ Inaruk konembunuk, it aap inoweewi inengga warak ti nen aap endagembogut Terekiya yogo logonet, “At aap ti, it ineegin warak o kota yime awo wonogwe inom, aakumi abok aret inom, yoranet nage paga inomanggen tayenogo piige, iniki ugun tayenak logowak nduk, agan nege lek maluk eekkolaawak nduk agan nege me, at enggaawak mondok lek eeppuurak o.”

⁵ Yogo mbareegwa, at aap endagembogut Terekiya nen onggo it yorage logonet, “Kit eeriyak yogwe ti, nendagembogut an nen non mbanogo pinagarak meek me, at eeppuurak mbakotak nogo kinobaalombok eeppumunggup o.”

⁶ Yorage mbareegi, it nen Yeremiya wonok aap endagembogut awi wurik tum waka inawoore'nggam aap endagembogut aput Malikiya aniyo kabunik me time eebe keele pugunogo wuppereegwaarak. Wuppogo mbareegwa, nggween kabunik nogo niyo yenggenak lek purok mban wonage me, Yeremiya nogo yobok togon wambeegerak.

⁷ Wambeegerak wonage me, aap Kuti mendek ooli wogo aap endagembogut awi o nggwok abe wurik me eeke nagagerak endage Ebet-Melek nogo nen, Yeremiya niyo nggween kabunik me wuppereegwaarak aruk koneneegerak. Konembunuk, ne ti eyom paga aap endagembogut o kota tu unggwogo menggam endage Mbeniyamin taati kwi'ndak wonage me,

⁸ aap Ebet-Melek nogo aap endagembogut awi o nggwok wurik me nogome nen wundi wage nagagerik, aap endagembogut nogo yoge logonet,

⁹ “Nowe kendagembogut wae. It aap yi nen Ala yoge kagak yoraga Yeremiya eebe waganogo niyo kabunik me wuppegaarak nogo, o kota yime oroti abu lek arit nage paga kambuwak nduk, eekaarak ti, mondok maluk aret eekaarak o.”

¹⁰ Yoge mbareegi, aap endagembogut nogo nen at aap Kuti mendek Ebet-Melek nogo yoge, “Aap Ala yoge kagak yoraga ti, eebe awo kangga'lek kagak niyo kabunik me nen pilanogo nippi woraawak nduk, aap ineebe 30 yime nen wogoren nak o.”

¹¹ Yoge mbareegi, at Ebet-Melek nogo aap ineebe 30 wogoren aap endagembogut awi o nggwok abe wurik me yi mendek ndi mendek pugu menggim ko ambime unggwi nanuk, yum nibinik inom, yum yirik wonagaatak mbo pugu inom, wagangge nagagerik, keele pugunogo Yeremiya niyo kabunik me wonage me wurabeegerak.

¹² Wuppege logonet, aap Kuti mendek Ebet-Melek nogo oone nggwok paga Yeremiya yoge, “Keele kagabolo mbanukwak, yum maluk nibinik ti, kane'nggen me nabenogo pu o.” Yoge mbareegi, yoreegerak ndak-ndak eekkolage mbareegi,

¹³ at Yeremiya niyo kabunik me nen keele pugunik nogo paga yabonogo nippi wogogwaarak. Nippi wogo mbareegwa, at Yeremiya nogo aap endagembogut awi nggwok abe wurik tum waka inawoore'nggam nogome aret wonagagerak.

Terekiya nen at Yeremiya ne ambi kin wokkagagerak wone

¹⁴ Ne ambi paga Terekiya nen Ala yoge kagak yoraga Yeremiya nogo wonok, Aliku ALA awi wurik me tungga mbere mbanak kagak ambi mbanak me nogome pi woraawak nduk, yoragagerak pi wogo mbareegwa, Yeremiya yoge logonet, “An wone ambi yokkege me, yokkege neenok, kinikime teppuurak mondok mage o.”

¹⁵ Yoge mbareegi, at Yeremiya nen Terekiya yoge logonet, “Wone kat yo'nege nogo an nen onggo yokkiriminggirak kwe, teppanumunggun lek neebe aret noorumunggun nogo lek a? Ndi, an nen, Ndogop eeke logot o, yinuk, yokkege neegak kunduk, noone karuk konenumunggun lek mban aret o.”

¹⁶ Yoge mbareegi, at aap endagembogut Terekiya nogo alik kote Yeremiya yoge logonet, “An nen kat koorogo pagage, ndi, it aap kat kooriyak nduk, mukkeren nugwi nogo ineenggime piige, eerigin lek o, yinuk, aakumi ineenik eeppiiga mondok eenik menggerak Aliku ALA endage kumbunuk kumbuk mbanggi o,” yinuk, yoreegerak.

¹⁷ Yoge mbareegi, at Yeremiya nen Terekiya yoge logonet, “At Omaawi Lombok Menggerak Iterali inogoba Aliku Ala nen yegerak nogo yi aret. At Terekiya nogo wundi nage logomenggerik, Wim mage o, yinuk, aap endagembogut Mbaben mendek awuri inabu'me tebe yi nage kenok, ili eerogo pugwi, o kota ti, kani mbelanogo pugwi, eerugun lek at apurilogwe inom ineenik aret logogun o.

¹⁸ Ndi, aap endagembogut Mbaben mendek awuri inabu'me tebe yi unggigin lek kenok perak, o kota ti, it Mbaben mendek ineenggime piyaminggirak me, kani mbelanogo pugwi iigak, at kunduk, ineenggime nen mbaganigin lek,” yegerak me, yokkigi o.

¹⁹ Yoge mbareegi, aap endagembogut Terekiya nen Yeremiya yoge, “It aap Mbaben mendek nen an neebe waganogo it aap Yakuri mendek aap Mbaben inom ari unggwogogwaarak nogo ineenggime panugwi iinok, maluk eerogo panukwak nagabiti o.”

²⁰ Yoge mbareegi, at Yeremiya nen onggo at yoge logonet, “Kat yagandak ti, togop eekkabugun lek o. Aliku ALA nen yegerak yokkege yi, karuk liirogon konembunuk, eeke keenok, keebe obeelom logonet, kili aago aret logomunggun o.

²¹ Ndi, it inabu'me tebe yi unggumunggun lek keenok perak, nano mendek ariyak Aliku ALA nen yo'nege kagarak nogo yi aret.

²² It kumi aap Yekura inowe kendagembogut kawi o nggwok abe wurik me wonogwe nogo wogoren aap Mbaben inowe endagembogut awuri inengga warak inowagam piya wogwe iinok, inoone nggwok paga kat yokkogo logonet, Koreewi lombok nen pilit pugunogo yokkugwi, tebenogo pagagwi, eekaarak o. Kiyok purok me yobok togon wangge keegak, it koreewi ti, mbo paganuk nagaarak, yokkogo logogun o,

²³ Kakuwi-kapuri inom it aap Mbaben mendek ineenggime piyaagun o. Ndi, kat kunduk, it ineenggime nen kole mbaganumunggun lek aap Mbaben inowe endagembogut nen pikkake, o kota yi, kani mbelanogo pege, eerigin,” yo'negerak me yokkigi o.

²⁴ Yoge mbareegi, at Terekiya nen Yeremiya yoge, “Kat keebe koorukwak, wone nimbirak mbanggoorak yi, aakumi ineenu ogwe iyo, yoroorak abu mage o.

²⁵ It aap nawuri inengga warak nen wone nimbirak yogoorak inaruk konembunuk, keya wogo logomenggaarik, Aap endagembogut kimbirak yogotak nogo, yo'nirage lek kinikime tebenogo pege keenok, nit koorugun aret me, kat nen at yoge, ndi, at nen kat yokkege, eekotak nogo yo'niret o,

²⁶ yokkugwi iinok, kat nen, Lek o. An nen aap Yonatan ame time kambukwak nappaniyak mage, yogirak, yoraamunggun o,” yinuk, yoreegerak.

²⁷ Yoge mbareegi, it aap inengga warak nogo abok nen Yeremiya ka wogo nogogwaarik, eegwa'me waganggo mbareegwa, at aap endagembogut nen, “Wone yogop yoraanu o,” yoreegerak nogo ndak-ndak aret yoragagerak. Yorage mbareegi, wone aap endagembogut imbirak yereegwaarak nogo, aakumi ambi ineenu arulik me, ambinom yoroolik mbo punuk nogogwaarak.

²⁸ Ndi, at Yeremiya nogo aap endagembogut awi nggwok abe wurik arum waka inawoore'nggam wonage kagak Yerutalem tebeni unggwi wogogwaarak.