Yeremiya 34 - Ala Wone Peenok Peebi Mbanak

Aap Terekiya eeppuurak yoreegerak wone

¹ At aakumi Mbaben inowe endagembogut Nebukanetat inom, awuri ineegin warak inom, it at abu'me logonet, o nggween paga yime aakumi inabu'me piinok, wone lengganogo yorogo nogogwam inom, aakumi inanebunu lombok inom, it abok aret nen o kota Yerutalem wonogwe kunduk, o kota Yerutalem enaagan-ambokan kota-kota wonogwe abok aret kunduk, inom wim eekwi eyom paga Aliku ALA nen wone at Yeremiya yoreegerak nogo yi aret.

² “Iterali inogoba Aliku Ala nen, Kat aakumi Yekura inowe endagembogut Terekiya wonage me nanuk, wone yoriyak nogo yi aret. At Aliku ALA nen ari logonet, O kota Yerutalem yi, aap endagembogut Mbaben mendek eenggime pikit nduk eeke me, ti pege neenok, at nen o kota yi, kani mbelenogo pigin o.

³ At Terekiya kunduk mbaganigin lek eebe pigaganggo logomenggaarik, wonok at Mbaben endagembogut eenggime pi nogwe iinok, it Mbaben inowe endagembogut enegen abe nen kage, inengga kunna'nuk wone mban-mban yogwe, eeppunuk, o Mbaben nagin o.

⁴ Togop aret eerigin kwe, Naliku ALA nen wone koonogo pigirak it Yekura mendek inowe endagembogut Terekiya aruk konenuwak nduk, yoriyak nogo yi aret. At eeppuurak Aliku ALA nen ari logonet, At wooluwak paga warak kambigin lek o.

⁵ Ata, ugun kagak kambigin me, ombomini inendagembogut kanggwi iinok, inayuk wuko logonet kani kuninako nogogwa kwak, at kunduk ayuk wuko logonet, agabolo kani kunggwi, Nogoba ai-ao, yinuk, aleenggu maakwi, eerugun o, yinuk, Naliku an ALA nen aret wone yi yagarak me yori nak o,” yinuk, yoreegerak.

⁶ Yoge mbareegi, Ala yoge kagak yoraga at Yeremiya nen wone ti abok aret wonok aakumi Yekura inowe endagembogut Terekiya nogo o Yerutalem wonage me, yori nagagerak.

⁷ Ne ti eyom paga aakumi Mbaben inowe endagembogut awuri ineegin warak nogo nen o kota-kota tebenogo piiga'lek ko wappunuk wonogwe kota Yerutalem inom, o Yekura kota-kota yugum pak abu alik negen wurik wonage nogo ando tebenogo piyareegwaarak kwe, kota Lakit Ateka imbirak awo tebenogo piiga'lek wonogwe nogo inom, tebenogo piyaawok nduk eekwi ti eyom paga aret yori nagagerak.

Inayeloman wondet eerogo piyoorak wone

⁸ At aap endagembogut Terekiya nen it aakumi Yerutalem wonogwe nogo abok aret inayeloman mini wondet eerogo piigo logorak inom wone koonogo pogo mbareegwa, Aliku ALA nen at Yeremiya wone yoreegerak.

⁹ Inom wone koonogo pereegerak nogo ti, it Yekura mban-mban inayeloman eeppiinok logorak ti mage me, it aakumi Iberani mendek aap inom, kumi inom, inayeloman eeppiinok wonogwe ti, “Apit aret wondet eerogo piyoorak o,” yinuk, wone koonogo pereegerak.

¹⁰ Wone koonogo pege mbareegi, it aap inengga warak inom, it aakumi apit aret inom, “Wone koonggerak ti op aret me, aap inom, kumi inom, ninayeloman eeppiinok wonogwe nogo ambinom ninayeloman eeppiinok logorak lek it wondet eerogo piyaawok o,” yinuk, yereegwaarak nogo nen aret inayeloman mini wondet eerogo piyareegwaarak.

¹¹ Wondet eerogo piigo nogogwaarik, ti'nuk, iniki alik koombunuk, aap inom, kumi inom, inayeloman ambinom logowak nduk, eerogo piyareegwaarak.

¹² Ti eereegwaarak paga Aliku ALA nen at Yeremiya wone yoreegerak nogo yi aret.

¹³ “Iterali inogoba Aliku Ala nen ari logonet, It kombomini o Metit paga aakumi inayeloman eeppiinok wonogwe me nen wogoren wundi wage logonet, ninom wone koonogo pereegirak nogo yi aret.

¹⁴ It aakumi Iberani mendek nen Iberani mendek aret, An kayeloman ari o, yinuk, ayeloman aremenggerak wonage kagak, tahun 6 eeppunuk, ambi ari wage paga wondet eerogo pegak eeko logorak o. Ayeloman a'nuk ake eeke kagak tahun 6 eeppunuk, ambi ari wage paga wondet eerogo pogo logowak o, yinuk, yoragagirak kwe, kombomini nen noone nogo inaruk konenggwi, yorage nagagirak nogo liippugwi, eeka'lek aret wonogogwaarak.

¹⁵ O yogondak iluk yi aret, Nit maluk aret eekoorak o, yinuk, mbo pogo nagaarik, an nenggaanom paga obeelom mban eerit nogwe iigirak ti, an nawi wurik nendage kumbunuk yogo menggam nenggaanom paga time inalitak lombok nen, Ninoreewi wondet agago piyaawok o, yinuk, koonogo punuk, inoreewi wondet eerogo piigaarak kwe,

¹⁶ yogondak perak, iniki alik koombunuk, inayeloman mini aap inom, kumi inom, iniki mba'nuk nugu logowak nduk, wondet eerogo piigaarak nogo inayeloman ambinom logowak nduk inalitak lombok inoone omaawi paga piya wagaarak nogo paga an nendage maluk eerogo pegaarak o,” yinuk, yegerak o.

¹⁷ Togop me, Aliku ALA nen yegerak nogo yi aret. “It an noone yorage nogo liirogon konenggwi, Ninoreewi wondet agago piyaawok o, yinuk, yogogwaarak nogo ndak-ndak eekwi, eerulik me, yogondak Naliku ALA nen wondet eerogo piyoorak mendek eeppiyoorak nogo yi o. Wooluwak paga, kugilingga paga, mbi noogelo paga, kambuwak nduk, inagabolo wondet agago teppiyaagin o. It aakumi o nggween paga inabu'me piigo menggam abok aret inigen iigo logonet, Inogole o, yinuk, inamineeri ne agan nawak nduk, eeppiyaagin o.

¹⁸ It aap ninom wone koonogo pereegirak taganogo pugwi, Yogop eeriyak, ndogop eeriyak, nenggaanom paga koonogo pereegwaarak nogo ndak-ndak eeka'lek mbo pugwi, eereegwaarak nogo ti, Wone abu aret koonggo o, yinuk, tapi aagaluk wappunuk, oolo poorogo tu peenok-peenok punuk, oolo nogogwaarak me, it togop aret eerogo piyaagin o.

¹⁹ It aakumi o Yekura inoweewi inom, it kota Yerutalem inoweewi inom, aap endagembogut awi wurik me ake eeka inom, it aap an neebe unde inom, it aakumi o time menggaarak apit aret inom, nen tapi poorak peenok-peenok kagak tu oolo nogogwaarak ineebe ti,

²⁰ it inom wim mbanak nen inooriyak mbakwi nogo ineenggime piyaagin o. Piige neenok, inooremenggaarak ineebe ti, yi towe ndi towe wiga agan nega inom, ndiimbu-nggwiya nggween paga nega inom, inambi-inambiingga aret arugun o.

²¹ Ndi, it aap Yekura inowe endagembogut Terekiya inom, at awuri inom eeka inom, ineebe waganogo it inom wim mbanak nen inooriyak mbakwi aap Mbaben endagembogut awuri ineegin warak o Yerutalem tebeni wagaarak mendek nagaarak nogo ineenggime piyaagin,” yegerak o.

²² At Aliku ALA nen ari logonet, “O kota yi, tebenogo puwak nduk, an nen wone lengganogo yoraminggirak paga iniyokan wogo logomenggaarik, inom wim nambuko logonet, o tebenogo pugwi, o kani mbelenogo pugwi, eeko logogun o. Ndi, an nen o Yekura kota-kota nogome aakumi wonogwe lek kugume aret eerogo pigin o,” yinuk, yegerak.