Yeremiya 33 - Ala Wone Peenok Peebi Mbanak

At apuri aa'nduk wonogogwa kwak eerogo piyoorak wone

¹ At Yeremiya nogo aap endagembogut awi wurik arum waka inawoore'nggam awo keele maarak wonage me, Aliku ALA nen wone ambinom yoreegerak nogo yi aret.

² “O nggween yi ogobakkigirogo pege, o yi nenaarogo pit nage, nggween alom kwippege, eereegerak endage Aliku ALA aret me, Aliku ALA nen an yo'nege logonet,

³ Kat nen an nggino yo'niru o. Nggino yo'nege keenok, an nen onggo yokkege logonet, iya tit eeriyak mendek inom, kat liippuurak meek, keenggo'lek mendek inom, yokkirigin o, yinuk, yo'negerak o.

^4-5 It aakumi Mbaben inom wim eeko logonet, wooluwak paga inoori ungguwok nduk, nggween pit laganggwi iinok, it Yekura mendek nen o kota Yerutalem yi, inawi wurik inom, aap Yekura inowe endagembogut awi nggwok abe wurik inom, minogo pak wurik omaawi eerogo pit nogogwaarak paga Iterali inogoba Aliku Ala nen wone yegerak nogo yi aret. O kota yi, maluk abu iya lombok eeko menggaarak me, nenegen iyoorak neebi nen nanini kani kunik negen mi'nage logonet, inooriminggirak o kota yime ineebe inoorak mban yagabit arigin o.

⁶ Togop aret eerogo piyaagin kwe, o kota yi inom, it ineebe inom, obeelom eerogo piige, ndi, it aakumi an napuri ineebe obeelom eerogo piyaminggirak paga iniki mondok nu'lek ugun tayenak inale'nggen mban logowak nduk, eerogo piige, eerigin o.

⁷ It Yekura inom, Iterali inom, keele maageren nogogwam nen wogoren piya wa'nuk, aa'nduk wonogogwa kwak eerogo piyaagin o.

⁸ It maluk eerit nogo logonet, an maluk eerogo paneegwaarak inoba lenggenak wonage nogo, inoba mbeenogo nappege, Eeriyak yo'nirage, nineebi o, yinuk, maluk eekwi nogo, lek eerogo piige, eerigin o.

⁹ Ti eerogo piyaminggirak paga it o kota yime menggaarak nogo nen, yi aakumi ndi aakumi nggween paga wonogwe abok aret an obeelom eerogo piyaminggirak inaruk konenggwi nogo inenggaanom paga iya nombakwi, nendage tiyappanugwi, nayuk wukwi, eekwi iinok, an nale'nggen nggwok aret mbarigin o. O Yerutalem yi, ineebe abu obeelom wonogwe, iniki ugun tayenak wonogwe, eeko logowak nduk, eerogo piige neenok, inogut nanuk, inaganak warigin, yegerak o.

¹⁰ At Aliku ALA nen yegerak nogo yi aret. Kit nen yogo logonet, O yi, aakumi inom, ndiimbu-nggwiya inom, abu wonogolik kugume aret o, yinuk, yogo monggotak kwe, o Yekura kota-kota inom, o Yerutalem tu nogo menggam inom, aakumi kunduk, ndiimbu-nggwiya kunduk, ineebe lek paga yi oone ndi oone lek agaarak nogome

¹¹ aakumi inale'nggen nen yogwe, iniki ale'nggen nggelok yi unggwage logonet noone-koone yogwe, kwe aap imbirak lambunggo logonet inoone yogwe, ndi, it aakumi iniki ale'nggen nen, At Aliku ALA abu obeelom aret o. At iniki kunik ee'ninake nogo ti, lek aga'lek mondok-mondok aret ee'ninake menggerak me, At Omaawi Lombok Menggerak Aliku ALA, Wa! yogo logowok o, yinuk, an nake wo'niri wogo logonet yogwe, eekwi nogo ambinom inaruk konenggo logogun, yegerak o. Aliku ALA nen ari logonet, O aa'nduk obeelom lombok wonagagi kwak eerogo pigin o, yinuk, yegerak me nduk yagi o.

¹² At Omaawi Lombok Menggerak Aliku ALA nen yegerak nogo yi aret. Aakumi inom, ndiimbu-nggwiya inom, wonogolik o kugume kota-kota enaagan-ambokan yime it aap ndomba ndegeninaka nen inandomba inagari'ngga mbanogo nenok, yonggonggologo logowak nduk, piigo logowam ambinom wonage kogo logogun o.

¹³ Puut nggelok-nggobok me o kota-kota inom, puut teberogon oonegen kilu yi nage menggim inom, karu nggwok o ame pa'nggwe inom, it aap Mbeniyamin wonogo menggam inom, o Yerutalem enaagan-ambokan yi yaga'lelo ndi yaga'lelo inom, o Yekura kota-kota inom, nogome nen inandomba wundi nogwe, unggwi wogwe, eekugak, ineenggi linggininako logogun o, yinuk, Aliku ALA nen aret yegerak o.

¹⁴ At Aliku ALA nen ari logonet, It Iterali paga wiganak inom, Yekura paga wiganak inom, obeelom eeppiyoorak wone koonogo yoragagirak nogo, a'me lik yuurak eyom panggoni woraagin o.

¹⁵ Ne ti paga eerigin o, yinuk, yoragagirak ti eyom paga At ambi iniki abe koonak agarip kwak Ndawut paga ndarogo pigin o. Ndarogo piminggirak nogo nen o yime a'me nggelok mban eeppiinet nage, obeelom mban eeppiinet nage, Eeke logogin o.

¹⁶ Eeke ti eyom paga it Yekura mendek wondet aago nugwi, It Yerutalem mendek iniki ugun tayenak logonet nugwi, Eeko logogun o. O kota ti, endage, Obeelom Koonak Eeppinanega Aliku ALA aret o, yinuk, yogo logogun, yegerak o.

¹⁷ Aliku ALA nen ari logonet, It Iterali paga wiganak wone yorogo menggam aap alik lek Ndawut paga wiganak nogo nen mban wone lengganogo yorogwe,

¹⁸ ndi, it aap an nenggaanom paga nake warogo kani kunggwi, gandum yigirik nake pugu nogo kani kunggwi, ndomba-tapi nake warogo wo'nugwi, eeko menggaarak nogo aap alik lek it an neebe unde Lewi paga wiganak nogo nen mban eekwi, eeko logogun, yegerak o,” yinuk, an yo'negerak ti aret.

¹⁹ Aliku ALA nen at Yeremiya yoreegerak nogo yi aret.

²⁰ Aliku ALA nen ari logonet, “An nen o liingge age logorak koonogo pege, oonikiya age logorak koonogo pege, eereegirak nogo eyom ndak-ndak ari waga'lek alik paga ari woroorak kooniyak meek ti kokwak,

²¹ an nen nayeloman Ndawut nimbirak wone koonogo pugwi, it an nenggaanom paga nake eeka Lewi mendek ninom wone koonogo pugwi, eereegurak nogo lek eerogo punuk, at Ndawut wone lengganogo yorage menggim at paga wiganak lek aap alik mendek ambi nen wone lengganogo yorage logorak meek aret o.

²² Togop eeriyak meek aret me, an nayeloman Ndawut paga wiganak inom, ndi, it an nenggaanom paga nake eeko menggaarak Lewi mendek inom, laaluguragan mbogut paga wonogwe nogo ineenggi lingginiyak meek kwak, mbini niyo aa'nggi paga wonage nogo wakkoorak meek kwak, it inombowologwe togop aret wiganogo piyaagin o,” yinuk, yegerak o.

²³ Aliku ALA nen at Yeremiya yoreegerak nogo yi aret. Aliku ALA nen ari logonet,

²⁴ “It leenogo piyareegerak ti, ogoo'nogo nogogwaarik, inanebunu mbere ogogwaarak nogo Aliku ALA nen, E o, mbarulik mbo piyareegerak kogo o, yinuk, it aakumi nen yogo logonet, an napuri meek eerogo piigwi, It aakumi inanebunu abe mendek lek o, yinuk, yogwe, eekwi nogo kat liippiige agandik ilik lek a?

²⁵ Naliku ALA nen o liingge age logorak koonogo pege, oonikiya age logorak koonogo pege, ndi, mbogut-nggween imbirak eeko logorak koonogo pege, eereegirak nogo mondok nu'lek logonet eeko logowak o, yinuk, koonogo puulik nombariyak meek ti kokwak,

²⁶ at Yakup paga wiganak ninom wone koonogo piige, nayeloman Ndawut nimbirak koonogo pege, eereegirak nogo mbo punuk, at Abarakam inom, Itak inom, Yakup inom, paga wiganak nogo at Ndawut ombooluk wiganak ambi nen wone lengganogo yorage logorak an nen leenogo pereegirak nogo, mbo pigin meek aret o. Togop eeriyak meek me, inabuwa nen aa'nduk wonogogwa kwak, obeelom eerogo piyaagin o,” yinuk, yoreegerak.