Yeremiya 3 - Ala Wone Peenok Peebi Mbanak

Inomaluk mbo puwak nduk yoragagerak wone

¹ “Aap ambi akwe mbo pege kenok, kwe nogo aap alik ambi wa namenggerak imbirak logomenggerik, Iyokan aap aa'nduk wogo nogo ka wage kenok, At nen, Wokkabi o, yinuk, yoriyak op mbakop? Ti eeke kenok, o time maluk aago itok aret logogin nogo lek a? Kwe mbabilu nen aap ambik inom nogo yi'nage menggi kwak it an napuri togop aret wonogwe me, Yogondak iniyokan neya woroorak op mbakop? Meek o,” yinuk, Aliku ALA nen aret yegerak me, yokkiragi o.

² “Puut-puut puluk ko aago ti inigen pekkaawak o. Aap inom nogo yuulik o puut ambi nggeeme wonage mbakop? It aap inom lambuniyak nduk wogwe iyo, tu nggwok ambet paga kunduk torinakwi, It aap ooluk-ooluk nugu logonet eeko mengga kwak eekwi, Eeko nogogwaarak. Aap ugun ee'ninabuwak, mbarit nugwi, maluk mban eerit nugwi, Eekwi paga O enete abu maluk eerogo pereegwaarak me,

³ O mayu wage kero, ko wappunuk wonage, O mayu wage menggim kunduk waga'lek wonage, Eeke kagak kwe, Kumi mbabilu inete paga yelok niyaawak, eeko mengga kwak eerit nugwi, Inenggali lek worokot aret nugwi, Eeko agaarik o.

^4-5 Ninogoba o. Nit awo tawe logonet kat ninom niniki kunik me, ko'lu-kii'me mbe'nirage, Kanini mondok-mondok ninoba pinanege, Eeriyak mbaken? yinuk, yo'nugwi ti, Yogondak iluk aret yo'negaarak nogo lek a? It togop aret yogo logonet kwe, yi maluk ndi maluk ambik aret ugun-ugun eerit nogo menggaarak,” yegerak me, yokkiragi o.

Iterali inom, Yekura inom, inomaluk mbo puurak wone

⁶ At Yotiya aakumi inowe endagembogut a'nuk wonage kagak, at Aliku ALA nen an yo'nege logonet, “Kwe ogonggelo mbo punuk, ugun eeke menggi kwak, it Iterali eerit nugwi nogo kenegen iigendak ilik, lek a? Puut-puut abok aret inom, yi eyo ndi eyo eno'mbak wiganak abu'me inom, ari nanuk aap inom ugun-ugun eerit nugu mengga kwak, eerit nogo agaarik o.

⁷ Ti eerit nugu logomenggaarik, iniyokan yungguk togon neya woraagun ilik? mbareegirak kwe, neya waga'lek mbo paneegwaarak o. It inawuluk Yekura ogonggelo mbo punuk ugun eerit nage menggi kwak nogo nen oweewi Iterali eekwi nogo enegen iyareegerak o.

⁸ Ogonggelo mbo punuk ugun-ugun eerit nage kenok, Kwe yi mbo pigi o, yinuk, liiru mbanogo wogo'nuk nappogo mengga kwak, it ugun eerit nugwi Iterali nogo togop aret mbo piyareegirak o. Iterali ugun eerit nugwi inawuluk Yekura nogo nen enegen iyareegerak kwe, agabiti mbaka'lek wundi nanuk, togop aret ugun-ugun eerit nege kagagirak o.

⁹ It Iterali ugun-ugun eerit nugwi nogo ti, iya lek o, yinuk, mbakwi paga o maluk eerogo pit nogo logonet, aap inom ugun-ugun eerit nugu mengga kwak yugum mendek ogobakkigirik inom, eyo mendek ogobakkigirik inom, nogo paga mbabi eekwi kwak eerit nogo nogogwaarak o.

¹⁰ An nen Iterali eeppiige abok aret it ugun-ugun eekwi inawuluk Yekura nogo nen inigen iige nagagerik, iyokan neya wagagerak kwe, iniki abe paga woroolik o. Ata, neya wage yuwak wagagerak o,” yinuk, Aliku ALA nen an yo'negerak.

¹¹ Ti yo'nege nagaarik, Aliku ALA nen an yo'nege logonet, “An mbo paneegwaarak Iterali nogo ti, mbuuluk obeelom negen kwe, kwe ogonggelo mbo punuk ugun eerit nega kwak it Yekura perak, abu maluk aret me,

¹² kat o omarip paga pa'nggwe time nage logomenggendik wone eerogo nappuurak nogo yi aret. Kwe ogonggelo mbo punuk eerit nega kwak Iterali yi wae. At Aliku ALA nen, Iniyokan yungguninuk an nowagam woraawak, yegerak o. Aliku ALA nen ari logonet, Aakumi maluk eekwi iinok, inabuwa nen teppiige minggirak me, it nowagam wogwe iinok, an nen nenete aagi inooke, Nanini mondok-mondok inoba piige, Eeke logogin lek kwe,

¹³ Aliku ninogoba Ala eeriyak yo'nirage ti, nineebi o, yinuk, yogwe, It inambik inagugi eeko menggam eyo eno'mbak nggwok wiganak abu'me time inom iniki kunik eeginabit nogwe, Noone yorage nogo eeka'lek mbo pugwi, Eekwi ti, Maluk abet aret eeko ogoorik o, yinuk, ti mban yo'nugwi iinok, inabuwa nen teppiyaagin, yegerak o, yinuk, wone eerogo nappumunggun o,” yinuk, yo'negerak o.

¹⁴ Aliku ALA nen ari logonet, “Kwe ogonggelo mbo punuk eerit nega kwak it napuri ti, inogonggelo kwak an aret me, iniyokan neya woraawak o. Inawi kota lombok nen it ambi nggigik, inanebunu lombok nen it mbere nggigik, eerogo piinok, wogoren o Tiyon piya woraagin o.

¹⁵ Piya wage logominggirik, ndomba ndegeninaka kwak it aap abe an niniki mbake ndak-ndak ndegeninako logowak nduk, mippiyaminggirak ndegeninako logonet, yi wone ndi wone ineenu eeppiigwi, Wone alom yogop o, yinuk, liippuwak nduk mamunirogwe, eeko logogun,” yegerak o.

¹⁶ Aliku ALA nen, “Ti eyom paga o yime inapuri-inombowologwe ambik aret wiganggwi iinok, it aap nen, Aliku ALA wone yugu aloobut mbanak yonggolak nogo o, yinuk, yogo logogun lek o. Wone yugu aloobut mbanak yonggolak nogo inikime koonnage, iniki abe'nage, eerigin lek o. Ndi, ninenggela'me logowak lak, ao, mbakwi, Alik ambi ogobakkigiruwok o, yinuk, yogwe, eerugun lek mban.

¹⁷ Ne ti eyom paga o Yerutalem endage ti, Aliku ALA Wone Lengganogo Yorage Menggim o, yogo logogun me, it aakumi inanebunu lombok abok aret Naliku ALA nendage tiyappogo logowak nduk, o Yerutalem kuwak eeri wogo logogun o. Iniki maluk inogogun mbuk lombok logonet, eerit nogo nogogwaarak nogo ambinom eerit nogo logogun lek o.

¹⁸ Ne ti eyom paga it Yekura paga wiganak nogo, Iterali paga wiganak inom lambunna'nuk, o omarip paga pa'nggwe wonogo menggam nen ambugwi aret neyate kwak inombomini nggween tumburogo piyareegim nogome iniyokan woraagun o,” yinuk, yegerak me, yokkiragi o.

¹⁹ Aliku ALA nen ari logonet, “An lombok nen nale'nggen paga napuri kwak eerogo piinok, Yi aakumi ndi aakumi ineyate kwak inapuri unde eeppiigwi abu obeelom aret kwe, Ti eeppiigwi kwak lek an nen nggween abe mili lombok wogoraakit mbake, It an mu'neren wogwe nogo nomonogo mbo pugun lek, Ninogoba o, yinuk, yo'nogo logorak mban mbake, Eekirak kwe,

²⁰ It Iterali paga wiganak ti, Kwe ambi ogonggelo mbo punuk ugun-ugun eerit nage menggi kwak, an mbo paninuk ugun-ugun eerit nogwe iigi o,” yinuk, yegerak me, yokkiragi o.

²¹ It aakumi obeelom eerit nugwi nogo mbo punuk, eekulik mendek eerit nugwi, Inogoba Aliku Ala kobak eerogo pugwi, eekaarak me, Puut-puut puluk ko aago nogome logonet le yogwe, Aakumi Iterali leenggu maako logonet, Yeenggwa niret o, yinuk, yogwe, Eekwi konenggo ogoorik o.

²² “Kwe ogonggelo mbo punuk, ugun eerit nega kwak kit yi, kiniyokan neya woraanip o. Kit tu abe mbo punuk, alik paga nomorogon nogo monggotak nogo, ambinom eeko logokwak, An nen obeelom eerogo pinagagin o.” Yorage mbareegi, it nen, “E o. Ninogoba Kaliku Ala kat aret me, niniyokan kowagam wogo.

²³ Puut-puut paga kugi aanggo wako logonet, noone-koone agan nugwi ti, Abe lek aanom warogo kagak eeko ogoorik o. Ninogoba Kaliku Ala nen mban nit Iterali ninagap ndariyak ti abet aret o.

²⁴ Nit awo tawe niigak, ninombomini nen ninaanggumi alom wa'nirogogwaarak ndomba-kambin inom, tapi-lembu inom, ninapurilogwe wologwe-komologwe inom, It ninenggali eerogo pinanega ninagugi nen apit aret inambeme yonggo'ninabit wundi wogo menggaarak o.

²⁵ Nit inom, ninombomini inom, nen ninogoba Kaliku Ala maluk eerogo pagagwi, Nit tawe paga nen nok, yogondak kuli ninogoba Kaliku Ala koone yugu nogo eeka'lek mbo pugwi, Eerit wogo ogoorik me, Ninenggali nen ninuut kuru agan wanggwi, Ninendage maluk agaarak ninagabiti nen ninayum ninenete paga nobakkologwe, Eeruwok o,” yinuk, yoreegwaarak.