Yeremiya 28 - Ala Wone Peenok Peebi Mbanak

Yeremiya Kananiya imbirak eereegwaarak wone

¹ Tahun ti paga mban at Terekiya it Yekura inowe endagembogut logonet, awo wone lengganogo yorage kagak, tahun 3 eeppunuk, ambi eerak tut 5 penenak ti paga, aap Nggibeyon mendek endage Atut aput Ala yoge kagak yoraga aap Kananiya nogo nen, an Aliku ALA awi wurik me wonage me, it Ala unde inom, aakumi abok aret inom, inenggaanom paga wone an Yeremiya yo'nege logonet,

² “At Omaawi Lombok Menggerak Iterali inogoba Aliku Ala nen yegerak nogo yi aret. Eyo aaninggin tapi inuut paga pogo mengga kwak, at aap Mbaben inowe endagembogut nen aaninggin it aakumi inoba piige nogo kalenogo pigin o.

³ Aap Mbaben inowe endagembogut Nebukanetat nen, yi mendek ndi mendek eekak Naliku ALA nawi wurik me yime wonage me wonok, o Mbaben time pi nagagerak wonage nogo, tahun mbere age yoboni naga'lek kagak aret an nen wonok iyokan pi woraagin o.

⁴ Ndi, eyo aaninggin tapi inuut paga pogo mengga kwak at aap Mbaben endagembogut nen aaninggin it aakumi inoba piige nogo kalenogo pigin me, at aap Yoyakim aput it Yekura inowe endagembogut Yoyakin nogo inom, it aap Yekura mendek o Yekura nen o Mbaben wogoren nogogwaarak wonogwe nogo inom, iniyokan o yime piya woraagin o, yinuk, Aliku ALA nen aret yegerak o,” yinuk, an yo'nereegerak.

⁵ Ti'nuk, Ala yoge kagak yoraga at Yeremiya nen aap Ala unde inom, aakumi apit Aliku ALA awi wurik me taati mi'ndak wonogwe inom, inenggaanom paga Ala nen yoge kagak yoraga at Kananiya nogo yoge logonet,

⁶ “Abet aret yagan o! Yagandak ti, Aliku ALA nen togop aret eeruwak o! At Aliku ALA nen yokkege kagak, yo'niragandak nogo a'me aret nggelok ari logonet, yi mendek ndi mendek Aliku ALA awi wurik me eekak inom, it aakumi piya nogogwaarak nogo inom, abok aret o Mbaben nen wogoren o yime piya woraawak o!

⁷ Ti eerigin aret kwe, it aakumi yi apit aret inaruk konenggwi kiigak, kat Kananiya karuk konenenok nduk, an wone yokkege yi, liirogon waamen o.

⁸ Kat inom, an inom, Ala nen yo'nirage kagak yoraga mendek awo aga'lek niigak, it aa'nduk Ala nen yorage kagak yoraga nogo nen yi o ndi o inom, aakumi inabu'me piinok menggam iya lombok wonogwe me inom, inoba ariyak yorogo logonet, Wim nggoguk ari, aaninggin-paaninggin kinoba age, kugilingga kinoba kwi'nage, eeke kaamunggup o, yinuk, yorogo nogogwaarak kwe,

⁹ it Ala nen yorage kagak yoraga nen, Kiniki ugun tayenak logonip o, yinuk, yorogwe iinok perak, Yoragaatak a'me nggelok yi wage kenok mban Aliku ALA nen abet aret nappiya wagaarak iigo o, yinuk, ineenu arugun o.”

¹⁰ Ti yoge mbareegi, Ala yoge kagak yoraga Kananiya nen eyo aaninggin Ala nen yoge kagak yoraga at Yeremiya uut paga pugu nogo wagangge nagagerik, kalenogo pereegerak.

¹¹ Kalenogo punuk, it aakumi abok inenggaanom paga yorage logonet, “Aliku ALA nen yegerak nogo yi aret. At ti eekerak ndak-ndak, eyo aaninggin tapi uut paga pugu kwak aap Mbaben inowe endagembogut Nebukanetat nen aaninggin lombok yi aakumi ndi aakumi inoba piyareegerak at abu'me wonogwe nogo tahun mbere yi age yoboni naga'lek kagak an kalenogo pigin, yegerak o.” Ari mbareegi, Ala yoge kagak yoraga at Yeremiya nogo o time nen nagagerak.

¹² Ala yoge kagak yoraga Kananiya nen eyo aaninggin Ala yoge kagak yoraga at Yeremiya uut paga pugu nogo kalenogo pege mbareegi, at awo nage me, Aliku ALA nen wone at Yeremiya yoge logonet,

¹³ “Kat nen Kananiya ka nage logomenggendik, yoge logonet, Aliku ALA nen yegerak nogo yi aret. At nen eyo aaninggin kalenogo pegerak nogo ti, eyo paga ogobakkigirik aret kwe, obaane'me mbuti paga ogobakkigirik inuut paga kwippiyaagin, yegerak o.

¹⁴ At Omaawi Lombok Menggerak Iterali inogoba Aliku Ala nen yegerak nogo yi aret. Aaninggin mbuti paga ogobakkigirik it yi aakumi ndi aakumi yi abok aret inuut paga kwippiige neenok, it apit aret nen aap Mbaben inowe endagembogut Nebukanetat ayeloman mini a'nuk, abu'me tebenak logonet, ake eeko logogun o. It aakumi mban lek o. Ata, ndiimbu-nggwiya kunduk at mban unde logowak nduk, wogorigin, yegerak, yori nak o,” yinuk, yoreegerak.

¹⁵ Yoge mbareegi, Ala yoge kagak yoraga Yeremiya nen at Ala yoge kagak yoraga Kananiya ka nage nagagerik, yoge logonet, “Kananiya wae. Karuk o! Aliku ALA nen nappagi woroolik kagak, aakumi yi abok aret abet mbaruwak nduk, pilit wone kagak inikime manakendak me,

¹⁶ Aliku ALA nen ari logonet, At nggween paga yime nen enggaawak lek eerogo pikit nduk, eeke agarik o. At nen Naliku ALA eeriyak ari nogo mbo puwak nduk, yorage nagaarak me, tahun yi paga at eebe mondok kambigin aret, yegerak me, yokkigi o,” yinuk, yoreegerak.

¹⁷ Ti yoreegerak paga at Ala yoge kagak yoraga Kananiya nogo tut 7 penenak tahun ti paga aret kambeegerak.