Yeremiya 27 - Ala Wone Peenok Peebi Mbanak

It Yekura mendek aaninggin inoba piyoorak wone

¹ Aap Yotiya aput Terekiya nogo it Yekura inowe endagembogut a'nuk, awo wone lengganogo yorage kagak, Aliku ALA nen wone yoroorak at Yeremiya yoreegerak nogo yi aret.

² Aliku ALA nen wone an yo'nege logonet, “Eyo aaninggin tapi inuut paga pogo mengga kwak eyo mbanak waganogo kuut paga karo-karo nappunuk, keele maarogo patu o.

³ Pake logomenggendik, inawuri aap Yekura inowe endagembogut Terekiya o Yerutalem wonage me, ka wogogwaarak nogo nen wone wonok it inoweewi lombok inendagembogut Erom mendek inom, Mowap mendek inom, Amon mendek inom, Tirut mendek inom, Tiron mendek inom, wonogwe me yora nawak nduk, wone tugunogo nappiyet o.

⁴ It inogobamini yora nawak nduk, wone eerogo nappiige logonet, At Omaawi Lombok Menggerak Iterali inogoba Aliku Ala nen inogobamini yoraawak nduk, yoroorak yegerak nogo yi o.

⁵ Neenggi omaawi paga nggween inom, aakumi nggween paga wonogwe inom, nggween paga wonogwe ndiimbu-nggwiya towe-pagi inom, abok aret ogobakkigirogo piyareegirak me, niniki koombunuk, wogoroorak mbake kenok mban wogorage minggirak me,

⁶ yogondak nen it inogobamini inanggween ti, abok aret waganogo aap Mbaben mendek inowe endagembogut nayeloman Nebukanetat eenggime pege, ndiimbu-nggwiya eyonggaame menggaarak kunduk abok aret at mban unde eeppege, eerigin o.

⁷ Yi aakumi ndi aakumi abok aret at Nebukanetat inom, obaane'me mi'naremenggerak aput inom, ti'nuk, aput obaane'me mi'naremenggerak ombooluk inom, inabu'me logonet, inake eekwi iigak, at abu'me piige menggim lek eeppuurak eyom ari woraagin o. Ari wage kenok, yi aakumi ndi aakumi apit inom, it aap inoweewi inendagembogut abu tiyanak inom, nen at Nebukanetat paga ndarak nogo inabu'me logowak nduk, tebenogo pogo logogun o.

⁸ It aakumi inanebunu ambi nen a, aakumi inabu'me piigo menggam ambi nen a, aap Mbaben mendek inowe endagembogut Nebukanetat ayeloman a'nuk, Ake eekwi nineebi, yogwe, eyo aaninggin tapi inuut paga pogo mengga kwak, At Nebukanetat nen aaninggin ninoba pinaniyak nineebi, yogwe, eekwi iinok, an nen it aakumi ti, wooluwak paga inoorogo piige, mbi noogelo inoba piige, kugilingga inoba kwippiige, eeke neegak, aap ti nen aakumi ti, tigippiige logowak nduk, eenggime pigin o, yinuk, Naliku ALA nen aret yagi o.

⁹ Togop me, Ndogop age koorak, yaga nen yorogwe, tili pagangga nen yorogwe, Nabi kagarak o, yinuk, yorogwe, inobagari yaga nen yorogwe, inogoma inom wone mbangga nen yorage, eeko logonet, Aap Mbaben mendek endagembogut ayeloman a'nuk ake eeko logomunggup lek o, yinuk, yorogwe nogo inoone konenugwaarik o.

¹⁰ It aap ti, pilit pugunogo yorogwe nogo konenggwi paga an nen it inanggween paga time nen wumbiinok, inenggaawak lek eerogo piyaagin o.

¹¹ It aakumi ambi mendek nen eyo tapi inuut paga pogo mengga kwak, Aap Mbaben inowe endagembogut aaninggin ninoba pinanege ti kagak piyanggo logowok o, yinuk, oone konembunuk eekwi iinok perak, it inanggween paga time teppiyaminggirak wonogo logonet, ineyabu waganogo yakko'net nogo logogun o, yinuk, Aliku ALA nen inogobamini yora nawak nduk, Yoret, yo'negerak me, yokkiragi o,” yinuk, nappiyareegirak.

¹² Ndi, wone eerogo nappiyareegirak nogo ndak-ndak it Yekura inowe endagembogut Terekiya yoreegirak. Yoge logonet, “Eyo aaninggin tapi inuut paga pogo mengga kwak, aap Mbaben inowe endagembogut nen eeriyak aaninggin kinoba pinagage kenok, E o. Eeko logowok o, yinuk, abu'me logonet ake eekwi, aakumi at apuri nogo inake eekwi, eekwi kiinok, kinagap ndarak aret logomunggup o.

¹³ At Aliku ALA nen, It aakumi ambi mendek nen it Mbaben mendek inowe endagembogut oone konenggo logorak ineebi yogwe iinok, wooluwak paga inooruwak nduk eeppiige, mbi noogelo inoba piige, kugilingga inoba kwippiige, eerigin o, yinuk, yereegerak nogo kagak, kat inom, aakumi kat kapuri inom, ti paga kambuurak nonggop nduk eeko ogotik?

¹⁴ Ndogop arigin, yaga nen, Aap Mbaben inowe endagembogut ayeloman a'nuk ake eeko logomunggup lek o, yinuk, yokkirogwe nogo ti, pilit aret yokkirogwe me, inoone koneniyak mage o.

¹⁵ At Aliku ALA nen ari logonet, An nen nappiya woroolik kagak, piliret nendage kumbunuk, agan nugu agaarik o. Ti agan nugwi inoone konenggwi iinok, an nen mak eerogo wumbiyaminggirak at inom, Ndogop arigin, yaga nogo inom, inenggaawak lek eerogo patugun, yegerak me, yokkigi o,” yinuk, yoreegirak.

¹⁶ Yoge nagagirik, it aap Ala unde inom, it aakumi yi abok aret inom, yorage logonet, “Aliku ALA nen yegerak nogo yi aret. It aap, Ndogop arigin, yaga nen, At Aliku ALA awi wurik me ake eekak yi mendek ndi mendek o Mbaben nen logonuk lek aret wonok woraagun, yorogwe nogo, inoone konenggo logorak lek o. Ti pilit aret yorogwe me,

¹⁷ inoone konenugwaarik o. Ata, it Mbaben mendek inowe endagembogut oone konembunuk, ake eekwi iinok, inagap ndarak aret logogun o. O kota yi, nonggop nduk, yinik-minik aago mban logorak?

¹⁸ It aap ti, abet aret Naliku ALA yorage neegak yoraga logonetak en, yi mendek ndi mendek Naliku ALA nawi wurik me eegu wonage inom, aap Yekura inowe endagembogut awi o nggwok abe wurik me wonage inom, ndi, o Yerutalem yime wonage inom, ti wonok o Mbaben pi nogwe iyo, Nomaawi Lombok Minggirak Naliku ALA an nggino yo'nugu logonetak o, yinuk, yegerak o.

^19-20 Aap Mbaben inowe endagembogut Nebukanetat nen aap Yekura endagembogut Yoyakim aput Yoyakin nogo o kota Yerutalem nen o Mbaben wonok pi noorak eeke logonet, it o Yekura mendek kunduk, Yerutalem mendek kunduk, inoweewi inengga warak inom wogoren naakit nduk, Ala awi wurik o awe eyak inom, togolowak kole endage, Niyo Yenggenak, nogo inom, ineenggi kookak niyo toolak wonok negak inom, yi mendek ndi mendek eekak ando inom, o kota yime mbo punuk nagagerak nogo at Omaawi Lombok Menggerak Aliku ALA nen ari logonet,

^21-22 Naliku ALA nawi wurik me inom, aap Yekura inowe endagembogut awi o nggwok abe wurik me inom, o Yerutalem time inom, nawi wurik me eekak yi mendek ndi mendek wonage nogo mbo punuk namenggerak nogo ti kunduk, o Mbaben wonok namenggaarak wonage me, an wa noorak eyom aret ari woraagin o, yinuk, at Omaawi Lombok Menggerak Iterali inogoba Aliku Ala nen abet aret yegerak me, yokkiragi o. Ti eyom ari wage kenok, an nen iyokan wonok wage logominggirik, aa'nduk wonagagi kwak obaane'me li'luk eerogo pigin o, yinuk, Aliku ALA nen yegerak me, yokkiragi o,” yinuk, yoragagirak.