Yeremiya 22 - Ala Wone Peenok Peebi Mbanak

Yekura inowe endagembogut apuri inom inaruk wariyak wone

¹ Aliku ALA nen ari logonet, “It Yekura mendek inowe endagembogut awi o nggwok abe wurik me nage logomenggendik, wone yoroorak nogo yi aret.

² At Ndawut wone lengganogo yorage nagagim logonet, wone yorage menggerak it Yekura mendek inowe endagembogut inom, at inom yabu eeka inom, it at apuri o kota tu unggwogo menggam unggwogo menggaarak inom, it abok ti, Naliku ALA nen wone ari yi konenggo logowak o.

³ Naliku ALA nen abe koonak a'me nggelok eekwi, it aap tebenogo piinok, inamendek kolamenggaarak ineenggime wonage nogo ndinggologwe, it aap nggiru inom, elege moono inom, it kumi togwe inom, inoone omaawi paga yorogwe, maluk eeppiinet nugwi, ndi, o yime aakumi maluk eeka'lek iigak inookwi, eerugwaarik o.

⁴ An nen, Yogop eeruwak ndogop eeruwak, yorage yi, liirogon aret eekwi iinok, it aap inoweewi inendagembogut Ndawut wone lengganogo yorage nagagim kwi'naruwok nduk, aap endagembogut awi o nggwok abe wurik tu unggwogo menggam ti paga unggwi wogo logonet, inawuri inom eeka inom, aakumi it inapuri abok aret inom, nggweendo paga, kuda paga, inom unggwi wogo logogun o, yinuk, yegerak kwe,

⁵ Aliku ALA nen ari logonet, An nen, Yi eeruwak ndi eeruwak, yorage yi, liirogon aret eeka'lek iinok perak, aap endagembogut o awi nggwok abe wurik yi, mi-mi wambigin, abet mbaruwak nduk, nendage kumbatinuk, kumbuk mbanggi o, yinuk, yora nak,” yegerak me, yokkira wagi o.

⁶ It Yekura mendek inowe endagembogut awi o nggwok abe wurik eeppuurak Aliku ALA nen yegerak nogo yi aret. “O Nggileyat ninikilom mbake kwak, Puut nggorek Libanon niniki kunik menggi kwak, At o wurik ti, togop aret ninikilom ombake kwe, O karume kwak, o kota yi oone ndi oone lek kwak, eerogo panigin mbake logowak o.

⁷ It aap o minogo pega nen o minogo pegak yi mendek ndi mendek ineenggime lombok logonet, Minogo puwak nduk, nappiya woraagin o. Nappiya woraminggirak woraanuk, eyo nggabina abu abe poorak paga wurik at ti, Minogo kani kunik me mbo mambugun o.

⁸ Ti eerogo piminggirak paga it aakumi inanebunu lombok nen tu o kota yi paga nogwe kenok, it mban-mban wone yogo logonet, O kota nggwok abu obeelom yi, Aliku ALA nen nonggop nduk togop eerogo pereegerak mbakop? yinuk, yogwe iinok,

⁹ it ando nen, Lek o. Inogoba Aliku Ala wone inom koonogo pereegerak nogo taganogo mbo punuk, at eebe wonage kagak kugi mban ayuk wuko logonet, inik-inik eekwi iinok, eeginabeegerak, yogo logogun o,” yinuk, yegerak o.

Yeremiya nen Yowakat eeriyak yereegerak wone

^10-12 Kit aap Yekura mendek yi wae. At Aliku ALA nen ari logonet, “Aap ogoba obaane'me o Yekura inowe endagembogut logowak nduk, mippereegwaarak kwe, o yi mbo punuk, wonok pi nogogwaarak Yotiya aput Talum eeriyak nogo ti, at iyokan wage, o yi enegen ambinom kage, eerigin lek keele maarogo pi nawam time aret kambigin,” yegerak me, Aap endagembogut kanggerak ti, ale yogwe, Ninowe endagembogut nogo kanggi o, yinuk, tabun ndoombunuk, aleenggu maakwi, Eerugwaarik o. Ata, at aput keele maa'nuk namenggaarak nogo time nen iyokan wage, Ndi, at awi alom paga enegen kage, Eerigin lek me, Kiniki wakkologo logonet, ale yogo logomunggup o, yinuk, yokkiragi o.

Yeremiya nen Yoyakim eeriyak yereegerak wone

¹³ Aliku ALA nen ari logonet, “Aap endagembogut ambi iniki koonak lek iniki maluk kagak awi o nggwok obeelom wuke, A'me nggelok eeppiiga'lek aakumi wi-wi aganake logonet, awi wigak togon wuke, Eeke logonet, Awuri at awi wuppiigwi nogo onggo wogoraga'lek oone omaawi paga, We aret wuppanogo logonip o, yinuk, yorage menggerak nogo ti, abuwa o!

¹⁴ Aap ti nen, An nawi o nggwok abe lombok wunom-weenom wuke logonet, wunom paga ambe nggwok wigak togon eerogo pigin o, yinuk, Wuke logonet, pugagi ambe kole mbanogo pit nage, Eyo nggabina abe poorak paga akem nabenogo pit nage, Amburu maa'ngga warogo pit nage, Eerogo pemenggerak kwe,

¹⁵ Eyo nggabina abe poorak awi akem nabenogo pit nagak eeremenggerak ti paga aap endagembogut ariyak mbake agaarik ya? At ogoba nano eeke nagagerak paga endagembogut kagak, yi tahun ndi tahun eereegerak? At ambi nengge, niyo nengge, eeke paga endagembogut logolik o. Ata, iniki abu koonak logonet, obeelom eeppiinet nage, Eekaatak a'me nggelok togon eeppiige, Eeke nagagerak paga Endage obeelom wonagagerak nogo lek a?

¹⁶ It aap ineenggi lek inom, it ambi eekkoloorak meek tebenak mendek inom, Inawone amburu liirogon mbanogo inowak looninake nagagerak ti paga endage obeelom wonagagerak o. It aap an Naliku ALA liippanugwi iinok, togop aret eeko menggaarak nogo lek a?

¹⁷ Togop aret eeko menggaarak kwe, at aput ti perak, enegen kage, inikime koongge, eeke nogo ti, Aakumi wi-wi aganake logonet, eenggi warak eekkoloorak mban koonit nege, It aap maluk eeka'lek iigak inooke, Ineebe tebenogo piige, oone omaawi paga inamendek wagangge, Eerit noorak Iniki ti paga mban panggonak menggerak o,” Yinuk, yegerak me, yagi o.

¹⁸ Togop me, Aliku ALA nen it Yekura inowe endagembogut aap Yotiya aput Yoyakin eeriyak yegerak nogo yi aret. “At kangge kenok, it aakumi nen, Ai, noweeluk o. Ai, nawuluk o, yinuk, ale yogwe, Ndi, Ai, nogoba o. Ai, nowe kendagembogut o, yinuk, aleenggu maakwi, Eeko logogun lek o.

¹⁹ Ata, nggeewo kanggetak niik eerogo mbo wumbogo mengga kwak, at eebe niik eerogo o Yerutalem tu unggwogo menggam endekem time mbo wumbugun o,” yinuk, yegerak o.

O Yerutalem eeppuurak yereegerak wone

²⁰ “At Yerutalem ti, it at inom a'nuk wim eekwi nogo abu tebenogo piigaarak me, At puut Libanon paga lagi nanuk, kuum ari, It o nggelok-nggobok Mbatan nen oone inaruk konenuwak nduk, keek ari, O Abarim nen kuum ari, Eeke logowak o.

²¹ At eebe op ale'nggen mbake kagak, kurumbi yoge nagagirak kwe, At oone naruk koneniyak neebi o, ari nagagerak nogo o! Awo tawe paga obaabut togop aret logonet, noone yoge nogo eeka'lek mbo pege nagagerak nogo o!

²² Alom at maluk mban eerit wundi wage nagaarak ti paga It aap at ndegenggwi nogo o wiya nggwok ambi wage logonet, wogoren mappiige, Ndi, it at inom a'nuk wim eekwi nogo keele maageren piya nogwe, Eekwi ti eyom paga At enggali age, endage maluk age, eerigin o.

²³ At eebe o Libanon kwak logonet, eyo nggabina abe Libanon mendek paga wurik me eebe obeelom wonage ti, Kwe ambi elege enegen paganak yagan wake menggi kwak, aaninggin oba ari wage kenok, Andi nen, Ia, ua, ari logogin o,” yinuk, yegerak me, yokkigi o.

Yoyakin aaninggin oba puurak wone

²⁴ Aliku ALA nen ari logonet, “It Yekura mendek inowe endagembogut Yoyakim aput Yoyakin nogo ti, Abet yo'nege kagi, mbake logowak nduk, an kanggeelik mondok neenik minggirak nendage kumbatinuk yoge yi aret. An neenggi amburu pega neenggi abe'nggan paga yirik nogo kwak at togop aret wonage menggerak kwe, kagak, eebe nggiginogo

²⁵ it at wariyak mugurok nugwi iinok, agabiti inombake it Mbaben mendek inowe endagembogut Nebukanetat awuri Mbaben mendek inom ineenggime piige,

^26-27 ndi, agalo ndareegerak imbirak o at amulok paga lek, o alik me mbo pi naminggirak time logonet, Name niyokan naakit lak, ao, mbaremenggim nogome woraagin lek time aret kambuwak nduk, mbo pege, eerigin o, yinuk, yorumunggun,” yegerak me, yokkigi o.

²⁸ Niyoowak nggween nggabok paga ogobakkigirik telenak kenok aakumi ineebi mbakwi kwak, At Yoyakin togop aret wonage nogo lek a? At inom, at apuri inom, o ambik me it ineenggo'lek me time nonggop nduk mbo piya noorak mbakop?

²⁹ Kat o yi, wae. O yi, wae! O yi, wae! Aliku ALA nen ari yi, karuk konengge logot o.

³⁰ Aliku ALA nen ari logonet, “At aap ti paga wiganak inendage ambi yogwe, Ndawut wone lengganogo yorage nagagim ti paga ambi kwi'nogwe, It Yekura mendek inoweewi inendagembogut ambi ogwe, Eeko logogun lek me, At aap ti, ayome lek wubili aret wonage, At ambi eeriyak meek aret logonet kangge, Eerigin o, Yinuk, liiru mbanogo pu o,” yinuk, yegerak me, yokkigi.