Yeremiya 2 - Ala Wone Peenok Peebi Mbanak

Ala nen Iterali inabuwa mbareegerak wone

^1-2 Aliku ALA nen an yo'nege logonet, “O Yerutalem nage logomenggendik, it time mendek konenggwi iigak yoroorak,” yo'nereegerak nogo yi aret. “It ineebe awo tawe paga inikilom nombakwi, Kwe ogonggelo awo imbirak lambunggo logonet, ogonggelo iniki kunik eeke menggi kwak, iniki kunik ee'nakwi, O karume yi mendek ndi mendek yarak lek me wogoren wage neegak, inale'nggen paga mu'neren wogwe, Eereegwaarak nogo niniki aberak wonage agarik o.

³ It Iterali ti, mbi iyaalok ndarak kwak Naliku ALA nake leenak wonogwe me, It ambi nen maluk eeppiigwi iinok, Maluk aret eekotak o, yinuk, aaninggin inoba kwippiigak eeke nagagirak o,” yinuk, Aliku ALA nen yegerak me, yokkiragi o.

⁴ Kit Yakup paga wiganak yi wae. Kit kinanebunu Iterali paga ndarak abok aret yi wae. Aliku ALA nen wone yokkirage yi, kinaruk liirogon konenggo logonip o.

⁵ At Aliku ALA nen yegerak nogo yi aret. “It inombomini nogo maluk ngge eeppiige neenok, an mbo paninuk ineebe abu nda ogogwaarak? Kugi abe lek aanom warogo kagak mugurok nogwe, Mugurok nogwe iinok, meek eerogo pakwi, Eereegwaarak.

⁶ It nen yogo logonet, At o Metit nen wo'niren wundi wage, Tu o karume nggween mbuk ti paga wo'niren wage, Eeke logonet, Nggween kunduk amburu lek kagak, Tu tiyak-tebek kagak, Nggween abu woloonak awi yariyak meek tit kagak, Tu aakumi kambit nogo menggam kagak, Aakumi tu ti paga nogolik kagak, O time aakumi wonogolik kagak, Wo'niren wundi wagagerak Aliku ALA nogo ngge o? yinuk, yo'nega'lek aret wonogogwaarak.

⁷ O Metit nen wogoren wundi wage nagagirik, o piyareegim nogome wonogo logonet, Anggen abe yugu nunggwi, yi mendek ndi mendek nggween ti paga yarak mbanogo nunggwi, Eeko logowak nduk, Nggween abu mili lubu eerak paga piya wagagirak kwe, Time wonogo logonet, nggween mbet-mbet aret enete maluk eerogo pugwi, Neyate kwak wogoragagirak nanggween nogo, maluk eerogo pugwi iinok, aakumi nen, Ogole o, yogwe, Eereegwaarak o.

⁸ It aap an neebe unde nen, Ninogoba Aliku ALA ngge o? yinuk, ambinom yo'nugwi, Eeko logorak wone yugu yoraga nen an ambinom liippanugwi, Eeka'lek wonogogwaarak o. It inoweewi nogo nen, At yo'nirage nogo eeriyak nineebi o, yinuk, An mbo panugwi, Ndi, an yorage neegak yoraga nogo nen kugi ogut aanom warogo alut eeko menggaarak kagak mugurok nogo logonet, At kugi Mba'an nen yorage kagak yorogwe, Eerit nogo nogogwaarak.

⁹ Togop me, it eekwi ti, inawone ambinom mbangge logonet, yorage agarik o. Ndi, inombowologwe peebi nda'nariyak kunduk, inawone mbanogo pigin o,” yinuk, Aliku ALA nen yegerak me yokkiragi o.

^10-11 “Kugi alut eekwi ti, abe lek kagak eekwi kwe, Ndi, it aakumi inanebunu ambi nen inagugi alut eeko menggaarak mbo punuk, obaane'me aakumi alik ambi inagugi woppunuk alut eekwi lek kwe, Eekwi ambi wonogwe iyo, It nen niyo aa'nggi enebaga o Kitim wunda nanuk, aakumi time mendek yorogwe, It o Kerat mendek eekwi liippiyaawak nduk, inawuri nappiigwi, Eeruwak o. Togop eekwi iyaagun lek aret kwe, it an napuri perak, inogoba abu tiyanak minggirak an nogo mbo paninuk, Abe mendek lek kagak nobaane'me mippunuk, ayuk wuko agaarik o.

¹² At mbogut ti, it togop eekwi iinok, mondok iya tit ndipuk eeke, Togop eekulik kwe, eekwi yi, iya! yinuk, aganak wake, Eeke logowak o,” yinuk, at Aliku ALA nen yegerak o.

¹³ “An napuri maluk eekaarak alom mbere yi aret. Ambi, niyo ineenik eeginake minggirak alom an nogo inambokan mbo panugwi, Ndi, ambi, niyo yenggenak logorak nggween kabunogo pakwi kwe, eno mbanak me, wundi nage logorak mendek kagak kabunogo pakwi, Eekaarak o,” yinuk, yegerak o.

Iterali liirogon eeka'lek iinok, eeginabeegerak wone

¹⁴ “It Iterali ti, aakumi inayeloman mbakwi ya? Aakumi inabu'me logonet, inake eeko logorak ndarak ya? Lek kagak nonggop nduk it kugun wogo negen eerogo piinok menggaarak?

¹⁵ Singa aakumi nibininabikit nduk oone nggwok agan nege menggi kwak, it inawim nen Iterali togop aret muguren nogo logonet, Inanggween maluk eerogo pugwi, inagota kani pit nogwe, Eereegwaarak me, O time aakumi ambi wonogwe lek aret o.

¹⁶ Aap o Membit mendek inom, Tapanaket mendek inom, nen aap Iterali ineeruwak puluk ko eerogo piyareegwaarak o.

¹⁷ Ti eeginabeegwaarak nogo ti, it inogoba Naliku ALA an nen wogoren wagagirak nogo mbo paneegwaarak paga Inalik nen aret kani inogombaga pateegwaarak nogo lek a?

¹⁸ Togop me, yogondak niyo Nin toologo nawak nduk o Metit nogwe ti, nano eekkoloorak nduk nogwe, Niyo Eparat toologo nawak nduk, o Atiyut time nogwe nogo ti, nano eekkoloorak nduk nogwe, Eeko agaarik?

¹⁹ It maluk eekwi nen aret maluk eeginake, It an noone ineebi mbakwi nen aret ineebe andi-pandi eerogo piige, Eerigin o. Togop me, it nen, Ninogoba Aliku Ala mbo pugwi, At ayuk wukwi, eeka'lek niinok, Abu maluk aret eekwi, niniki andi eekkoloorak mendek eekwi, eeko ogoorik kogo o, yinuk, Ineenu ogwe, iniki liippugwi, eeko logowak o,” yinuk, at ninogoba Omaawi Lombok Menggerak Aliku ALA nen yegerak me, yokkiragi o.

Iterali Ala alut eeriyak ineebi mbareegwaarak wone

²⁰ Aliku ALA nen ari logonet, “Yum aaninggin nen nggoorok togon eerogo mbo pogo mengga kwak O maan togon, At oone yugu aaninggin me, ambinom eeriyak nineebi o, yinuk, mbo pugwi, Keele maarak mbanogo mbo pogo mengga kwak, Wone yugu paga keele maarak negen wonogwe yi, mbanogo mbo puwi o, yinuk, mbo pugwi, Aliku ALA mban mugurok nogo logogun lek o, yogwe, Eeko nogogwaarik, Yi puut ndi puut tiyanak wonage me inom, yi eyo ndi eyo eno'mbak wiganak abu'me inom, Kumi mbabilu nen, Ee'ninabuwak o, yinuk, winnarit nogo mengga kwak it togop aret eerit wogo nogogwaarak o.

²¹ Eyo anggur awi abu abe kero leenogo yako mengga kwak it togop aret eerogo piyareegirak kwe, Yogondak an mbakirak ndak-ndak aga'lek eyo anggur abe lek ogun penaame mendek kwak ogogwaarak ti, Nonggop eeginabeegerak paga ogogwaarak?

²² Wun yanengga paga punuk ineebe paga nggunggologwe, Tapon paga ngguu'mo wakak mban eekwi, Eekwi kwe, Maluk inoba lenggenak itok aret wonage iige agarik o,” yinuk, Aliku Itok Menggerak ALA nen yegerak me, yokkiragi o.

²³ “It nen, Nit maluk ninoba lenggenak lek aret o. Ndi, kugi Mba'an mugurok nogolik o, yinuk, yogwe ti, nonggop togon yogo menggaarak? It o kobappaga time nugu logonet, inobaabut maluk eeko nogogwaarak nogo iniki aberuwak o. Wam kooli wali kwaarit nggare agan nagak-wagak agan nege menggi kwak,

²⁴ Nggwiya karume logonet, iniki aganggen nen wali obari mbanit nege me, aap nen pipporogo logorak meek age menggi kwak, Wam kooli wali imbirak lambuniyak eyom panggo yi wage kenok, at wali nogo kooli mugurok nage logonet, ta'liila eeke kero, Kooli woraagin aret me, yinuk, tokkage puk menggi kwak, It togop aret agaarik o.

²⁵ It Iterali ti, aakumi inagugi mugurok nogo logonet, iniyok ogut nibi-nibi nage, Inamili mbuk eeginake, Eeke me, Togop eeriyak mage o, yinuk, yorage nagagirak kwe, It nen, A! Aanom warogo yo'niroorak mage o. It aap inambik inagugi eekwi ti, ninikilom aret me, mugurok nogo logorak abu mbako ogoorik o, yogogwaarak nogo o!” yinuk, Aliku ALA nen yegerak me, yokkiragi o.

Iterali aaninggin inoba piyaagin yereegerak wone

²⁶ “Aap ambi kote kiraake me pigaganggwi iinok, enggali age menggi kwak, It Iterali paga wiganak abok aret inom, inoweewi aap inendagembogut inom, aap inendagembogut inawuri nagawan-nagawan inom, Inake eeka an neebe unde inom, inoweewi an nen yorage neegak yoraga inom, abok aret inenggali agaarak wonogo agaarik o.

²⁷ Eyo obate mbanak kagak, Kat an nogoba aret o, yogwi, Yugum kagak, Kat an nda'nabeegindak aret o, yogwi, Eeko logonet, It nen ina koonogo pe'neega'lek inambokan paneegwaarak kwe, Aaninggin inoba kwi'nari wage kenok perak, Pilak yinuk, Ninagap ndari mok ubi! yinuk, yo'nogo menggaarak.

²⁸ It Yekura mendek ti, ineenggi paga nen inalut eeriyak inogobamini nen ogobakkigirogo pateegwaarak nogo ngga wonogwe? Inawi kota ambik aret wonage ti kwak inagugi kunduk ambik togop aret wonogwe me, Aaninggin inoba ari wage kenok, inagugi ti nen aret inagap ndari woraawak o.

²⁹ It abok nen, At oone eeriyak nineebi o, yinuk, yogo logonet, At maluk eerogo pinanege agaarik o, yinuk, nonggop nduk, an yo'nogo agaarik?

³⁰ Inapuri iniki koonnaruwak nduk aaninggin inoba piige nagagirak kwe, liirogon woolik me, We aanom warogo inoba piige nagagirak o. Singa at noorak abu nen oone nggwok agan nage menggi kwak, It aap an nen yorage neegak yoraga nogo abok aret inawooluwak paga nenet nagagerak o,” yinuk, Aliku ALA nen aret yegerak me, yokkiragi o.

³¹ Kit yi, nano mendek ndarak o? Aliku ALA nen wone yokkirage yi, liippogo logonip o. “An nen o karume menggi kwak a'nuk yorage, O yumaak lombok menggi kwak a'nuk, eeppiige, Eereegirak mbakop? It an napuri nen, Nit wondet aago ugun nugwi me, kat wonage me ambinom keya woroorak nineebi o, Yinuk, nonggop nduk yogo agaarik?

³² Kwe tawe alilibano li'luk eekkolaga'lek mari eerogo mbo pege, Kwe tawe ogonggelo imbirak lambumbiigwi me, ayum-agali ngget mendek yikkolaga'lek teppege, Eeke menggerak mbakop? Togop eekulik aret kwe, It an napuri perak, o maan aret mari eerogo mbo paneegwaarak wonage neegak, Ne ndi kuli ari naga o, yinuk, yuurak meek aret o.

³³ Kwe mbabilu obaabut abu maluk nen, Ee'nabuwak, mba'nuk, eerit nage nogo ti, eenu nggwok aret kwe, it an napuri perak, It iniki kunik logorak mbakwi iniki amok mbaniyak nogo ti, abunuk nggwok ineenu me, it nen at mamuniriyak op aret o.

³⁴ It ineenggilek tebenak mendek nen inoreewi iname tu paa'nuk, kiraari unggwogwe iyoolik kagak Inoreewi inookaarak inamiya an napuri inayum paga lenggenak wonage kogwe kwe,

³⁵ It nen yogo logonet, Nit ambi eerulik me, Ala anini ninoba pinanigin lek o, yogwe iigirak o. Yogwe iigirak kwe, Nit maluk eerulik o, yinuk, yagaarak ti paga an nen inowak loonogo aaninggin inoba kwippiyaagin o.

³⁶ Yeenggwa niraawak o, yinuk, ambi me nagak ambi me nagak eerit nugwi ti, nonggop nduk eerit nogo agaarik? It Atiyut mendek eekwi paga inenggali ogogwaarak kwak it Metit mendek nen eeginaburak ti paga togop aret inenggali arugun o.

³⁷ It an napuri iniki inoba panggonak wonogwe nogo, Naliku ALA nen mbo piyareegirak paga yeenggwaaraagun lek me, Napuri inenggali mbakak inuut wandunik o Metit nen wundi woraagun o,” yinuk, yegerak me, yokkiragi o.