Yeremiya 19 - Ala Wone Peenok Peebi Mbanak

Niyoowak telenogo puurak wone

¹ At Aliku ALA nen yegerak nogo yi aret. “Aap nggween nggabok paga niyoowak ogobakkigika oona niyoowak kuni nak o. Kumbunuk, it aakumi inoweewi inom, it aap an neebe unde inom, kinom

² o Mben-Kinom Kobappaga tu endage, Niyoowak Telenak Mbo Pogo Menggam unggwogwe me, taati ari nogwe kiinok, an yokkege neegak, yoroorak nogo yi aret.

³ Aakumi Yekura inoweewi inendagembogut inom, it Yerutalem mendek inom, ti, Naliku ALA nen wone ari yi, inaruk konenggo logowak o. Nomaawi Lombok Minggirak Iterali inogoba Naliku an ALA nen aaninggin mondok nggwok lombok ambi o yi paga nappi woraagin me, it apit aret inaruk konembunuk, iniki mondok ma'narugun abet aret mbako logowak o.

⁴ It nen an mbo paninuk, o yime inogoba an wonage neegak kugi eeko menggam eerogo punuk, inombomini inom, it Yekura inoweewi inendagembogut inom, kugi it ineenggo'lek mendek inake warogo kani kunggwi, it aap maluk eerulik ugun iigak kwe, inamiya kilirik o yime yagabit aruwak nduk, eerogo piigwi,

⁵ ndi, puut-puut paga kugi Mba'an awi wuppunuk, inapuri inoorogo kugi Mba'an ake kani kunggwi ti, Ndogop eeko logonip o, yinuk, wone lengganogo yorage, noone paga nen, Ee'nip, yorage, Ndogop eerugun, ninikime mbake, eerulik kwe kagak eekwi, eeko menggaarak,” yegerak o.

⁶ Aliku ALA nen ari logonet, “It aakumi nen o yi endage, Topet o, yogwe, o yi endage, Mben-Kinom Kobappaga o, yogwe, eeko logogun lek o. Ata, Aap Inooko Menggam Kobappaga o, yinuk, yogo logogun o.

⁷ O yime nen it Yekura mendek inom, Yerutalem mendek inom, iniki, Yogop eeruwok, koonogo pemenggaarak nogo lek eerogo piige, it inawim mendek nen wooluwak paga inooruwak nduk, inili yaga'lek mbo piige, it inooruwok mbarit nugwi nogo ineenggime piige, eeke neenok, inooremenggaarak ineebe yi towe ndi towe wiga agan nugwi inom, ndiimbu-nggwiya nggween paga nugwi nogo inom, inambi-inambiingga kwak nawak nduk, eerogo piyaagin o.

⁸ O kota yi, inamineeri ne agan noorak mendek eerogo pigin me, aakumi inigen kogo logonet, Yi aago, ha! yinuk, agi'ndok kanggwi, tu ti paga nogo logonet, Yi eekerak, iya, yinuk, ineenggi ineyak tikkologwe, o yinik-minik eerak wonage kenok, Kayik a! yinuk, meek eerogo pugwi, eeko logogun o.

⁹ Inawim nen oonda mbanogo inoorit ungguwok nduk wakkagak mban eekwi iigak, Mbi lek me nano nawi? yinuk, inapuri wologwe-komologwe inoorogo inenggaanggum nunggwi, inoreewi inooppunuk inenggaanggum nunggwi, eeruwak nduk, eerogo piyaagin, yegerak, yoret o.

¹⁰ Yorage logomenggendik, it kinom namenggendak inigen iigak, niyoowak ti, telenogo pumunggun o.

¹¹ Telenogo punuk, it yorage logonet, At Omaawi Lombok Menggerak Aliku ALA nen yegerak nogo yi aret. Nggween nggabok paga niyoowak ogobakkigirik telenogo pegerak nogo obeelom eerogo puurak meek kogotak yi kwak, it aakumi yi inom, o kota yi inom, togop aret eerogo piyaagin me, inoorak o Topet yime taambiinet nogo logonet, nggween enete lek aret arigin,” yegerak o.

¹² Aliku ALA nen ari logonet, “O yime inom, it aakumi o yime menggaarak inom, togop aret eerogo piige logonet, o kota yi ti, o Topet kwak eerogo pigin o.

¹³ O kota Yerutalem inawi wurik kirin ndoonak paga time laaluguragan ninggirik inake obari abe kaga kani kunggwi, an wonage neegak kwe, it kugi inake anggur amburu kilirogo pugwi, eekwi iinok, o Topet maluk ogole warak eerogo pereegwa kwak, aakumi Yerutalem mendek inawi wurik inom, it aakumi Yekura inoweewi inendagembogut inawi wurik inom, togop aret eerogo pigin, yoret o,” yinuk, yegerak me, yokkiragi o.

¹⁴ Yorage nagagerik, Aliku ALA nen, “Yora nak o,” yinuk, yora nagagim o Topet nogome mbo punuk, iyokan Aliku ALA awi wurik oore'nggam taati mi'na'nuk, it aakumi abok aret yorage logonet,

¹⁵ “At Omaawi Lombok Menggerak Iterali inogoba Aliku ALA nen yegerak nogo yi aret. It o kota yime menggaarak inom, o Yerutalem enaagan-ambokan yaga'lelo-yaga'lelo wonogwe inom, inanobak yugum pogom kumbunuk iigak, yorage nagarak nogo, Koneniyak nineebi o, yinuk, yagaarak me, aaninggin-paaninggin inoba piyoorak yoragarak nogo abok aret inoba kwippiigak eeke logogin, yegerak me, yokkiragi o,” yinuk, yoragagerak.