Yeremiya 18 - Ala Wone Peenok Peebi Mbanak

Yeremiya aap nggabok paga ogobakkigika ame nagagerak wone

¹ Aliku ALA nen at Yeremiya wone yoreegerak nogo yi aret.

² “Aap nggween nggabok paga niyoowak ogobakkigika ame time wonage keegak, wone ambi yokkiriyak mbakirak me, time nak o.”

³ Yo'nege mbaki, aap nggabok paga niyoowak ogobakkigika ame nage nagarik, nombok-kombok eeka nogo nombok-kombok eeke logonet, nggween nggabok paga niyoowak ogobakkigike kagarak o.

⁴ At nogo nen nggabok paga niyoowak ogobakkigike nogo obeelom aga'lek maluk age kenok, “Niyoowak yi, togop eerikit,” koonggerak nogo mbo punuk, “Ndi mendek eeriyak op kagi,” mba'nuk, ti mendek aret ogobakkigike kagarak o.

⁵ Kage mbaki, at Aliku ALA nen wone yo'negerak nogo yi aret.

⁶ “It Iterali paga wiganak ti, aap nggween nggabok paga niyoowak ogobakkigikerak yi kokwak, an nen togop aganaburak lek mbaken? It Iterali paga wiganak ti, aap niyoowak ogobakkigika nggabok eenggime wonage menggi kwak it togop aret an neenggime wonogo agaarik o,” yinuk, Aliku ALA nen aret yegerak o.

⁷ “Ne ambi eyom paga it aakumi ambi mendek ilik, it aap inabu'me piigo menggam ambi a, an nen eyo omanggen kwak kinogo wumbiige, o wurik kwak minogo piige, lek eerogo piige, eerigin o, yoraminggirak kwe,

⁸ it aakumi ti nen, Nit maluk eeriyak nineebi o, yinuk, mbo pugwi iinok, an nen, Inomaluk onggo eeppiyaakit, mbakirak nogo eeppiiga'lek teppiyaagin o.

⁹ Ndi, ne ambi eyom paga it aakumi ambi mendek ilik, it aap inabu'me piigo menggam ambi a, o wukwi kwak wurogo piige, awi yakwi kwak yarogo piige, eerigin o, yoraminggirak kwe,

¹⁰ ti'nuk, it aakumi ti nen nenegen neegak maluk eekwi, noone ari nogo taganggwi, eekwi iinok, obeelom eerogo piyoorak koonogo piminggirak nogo, Alik ambi kooniyak agaarak kagi, yinuk, Ao, mbake logonet, alik ambi koonigin o.

¹¹ It aakumi Yekura mendek inom, it o Yerutalem wonogwe nogo inom, wone yoroorak nogo yi aret. Naliku ALA nen it Yekura mendek inom, it o Yerutalem mendek inom, abet aret aaninggin nggwok mendek ambi eeppiyoorak pipuk eerogo pege, inoba kwippiyoorak koonogo piige, eeke me, it inalitik-inalitak maluk eekwi nogo mbo punuk, inobaabut alik ogwe, alik ngget mendek eekwi mamunggologwe, eeruwak, yegerak, yoret o. Ndi, yoramenggendak kwe,

¹² it nen wone onggo yokkogo logonet, Nit eeriyak koonogo pogoorak nogo mban mugurok nogwe, ninogogumbuk a'nuk niniki maluk lombok logonet, eeriyak uugwe mbakwi nogo mban eerit nogwe, eeko logogun me, kat koone yo'nirage ti, aanom warogo yo'niroorak mage o, yinuk, yokkirugun,” yo'negerak me, yokkiragi o.

Iterali nen Ala mbo pereegwaarak wone

¹³ Togop me, Aliku ALA nen yegerak nogo yi aret. “It aakumi inanebunu lombok wonogwe me pegiinet nage logomenggendik, kin wogiige logonet, Kwe aap kigin waka'lek kwak Iterali nogo, Yogop eekaarak o, yinuk, it eekulik ayilik warak kagak eekaarak ti, Kit kinenggela'me yime togop eekwi ambi konenggo monggotak ilik? Yoranet nage logot o.

¹⁴ Puut Libanon yugum yunik-lunik paga ndugu-ndugu lenggenak wonage nogo lek age, Ndi, niyo miin tu aago puut ti paga nen wambi wage nogo porok ari, Eeke menggerak mbaken? Lek aret kwe,

¹⁵ An napuri perak, kobak eerogo mbo panugwi, It inagugi ogut aanom warogo kagak ake obari abe kaga kani kunggwi, Eekwi iigak, Inagugi nogo nen Napuri tu aa'nduk mugurok nogo nogogwaarak nogo Mugurok nugu logonet, iniyogobit lik togon ngginnogo logowak nduk, eeppiigwi, Tu abe yarak kagak nomonogo punuk, tu maluk tiyak-tebek paga nugu logowak nduk, eerogo piigwi, Eereegwaarak.

¹⁶ O time maluk eerogo pemenggerak aakumi abok aret nen inigen kogo logonet, Ogole o, yinuk, inamineeri ne agan nage, Aakumi tu ti paga nogo logonet, inigen kenok, O yi eerogo pegerak iya! yinuk, ineenggi ineyak tikkologwe, Eeko logogun o.

¹⁷ O wiya oonegen lagi wage menggim pa'nggwe nen warit wage logonet, liirubu koo'nuk nage menggi kwak, Inawim inigen iigak, an napuri mak eerogo piige, Aaninggin inoba ari wage ti eyom paga an nena mot-mot pegiiga'lek nambot irage, Eerigin o,” yinuk, yegerak o.

Yeremiya wariyak wone mbaneegwaarak wone

¹⁸ Yorage mbareegi, it aap ineebi nombakwi nen yogo logonet, “It aap Ala unde nen eeko logorak wone mamunnirogwe nogo lek age, it aap iniki warak nen ninaruk wakwi nogo lek age, ndi, Ala nen yorage kagak yoraga nen nit yo'nirogwe nogo lek age, eerigin lek me, aap Yeremiya ari menggerak ti, lek eerogo puurak koonuwok nduk, woraanip o. At wone yo'nirage nogo aret abut laganogo at yogwi, ndi, at, Yogop eeriyak, ndogop eeriyak, yo'nirage liippega'lek mbo pugwi, eekwi paga oone lek arigin me, eeruwok aret o,” yinuk, yereegwaarak me,

¹⁹ Kaliku ALA wae. Noone yokkege yi, karuk konengge, Inoone nabek lek yo'nugwi yi, liippiige, eeru o.

²⁰ Obeelom eeppiigwi iigak onggo maluk eeppiyoorak op mbaken? Togop lek kwe, an yigeebu wanduwak mba'nuk labu kabunogo panegaarak o. Kanini inoba piyoorak mbakendak nogo nini tayo yenok nduk, kowagam mi'na'nuk, inake yokkireegirak nogo aberu o.

²¹ Togop me, it aap ti, inapurilogwe mbi abu nen kanggwi, Wooluwak paga ndanuk togon inookwi iinok kanggwi, It inakuwi ti, inaagalogwe kobak ogwe, it kumi togwe aret ogwe, It mendek inowe-inawot aap nogo kugi andi nen kambit nogwe, Inawuri nogo wim eeko logonet, maale paga inoorak kambit nogwe, Eeruwak nduk eeppiyet o.

²² It aap ti, an pi'nabuwok nduk labu kabunogo panugwi, Niyok yilunnabuwok nduk, keele pit nugwi, Eekaarak me, Inawi oonda mbanogo inooruwak nduk yonggo nappiyamenggendak wa'nuk yirik-wurik inoba kwi'nogwe iinok, Iname nen inoone ya-kwa yogwe konenuwak nduk eeppiyet o.

²³ Kaliku ALA wae. It nen nenggaawak lek eerogo panuwok nduk koonogo pit nugwi nogo abok aret kat keenu o. It maluk eeriyak koonit nugwi ti, lek eerogo piige, Inomaluk eerit nugwi keenggi linggingge nogo kobak eerogo piige, Eeriyak mage o. Ata, inenggaawak lek aruwak nduk, mbo piige, Ndi, kanini eeppiyoorak eyom ari wage kenok, kanini eeppiige, Eerumunggun o.