Yeremiya 15 - Ala Wone Peenok Peebi Mbanak

It Yekura mendek aaninggin inoba piyoorak wone

¹ Yoge mbaki, Aliku ALA nen an yo'nege logonet, “It Muta Temuwen imbirak kunduk nenggaanom paga mi'na'nuk, It aakumi yi, inabuwa mbaru o, yo'neremenggaarak kwe, an nen, It aakumi yi, inabuwa mbarigin mondok lek o, yoraagin me, kat nen it yi, an wonage me nen nawak nduk wumbiyet o.

² Yorage keenok, it nen, Nit nggeeme nawi o? Yokkugwi iinok, kat nen, At Aliku ALA nen yegerak nogo yi aret o, yinuk, yorage logonet, It andi paga nen kambuurak kenok, andi paga nen aret kanggwi, Wooluwak paga inooriyak kenok, wooluwak paga nen aret inoorak kanggwi, Mbi noogelo paga kambuurak kenok, mbi noogelo paga nen aret kanggwi, Ndi, keele maageren piya noorak kenok, keele maageren piya nogwe, Eeruwak, yegerak, yoraamunggun o,” yinuk, yo'negerak.

³ Aliku ALA nen ari logonet, “Maluk eerit wundi wogogwaarak onggo aaninggin alom 4 paga an nen inoba kwippiyoorak nogo, ambi, wooluwak paga inookwi, ambi, yi nggeewo ndi nggeewo nen ineebe inoorak nogo nigiren nogwe, ambi, yi towe ndi towe wiga agan nugwi nogo nen ineebe nunggwi, ndi, ambi, ndiimbu-nggwiya nggween paga nugwi nogo nen ineebe lek eerogo nunggwi, eerugun o.

⁴ Aap Kitikiya aput Manate it Yekura inowe endagembogut a'nuk logonet, o Yerutalem eeke nagagerak paga yi aap ndi aap inendagembogut inabu'me piigo menggam o nggween paga wonogwe yi abok aret, It Iterali inogole o, yinuk, yuwak nduk, eerogo piyaagin me,

⁵ At Yerutalem ti, ta nen at abuwa mbake, At le ari me, ta imbirak le ari, Eebe op wonage ilik, lek a, yinuk, ta nen at kin wokkage, Eerigin mbaken? Lek aret o.

⁶ At nen eebi nombake, an mbo paninuk mbagangge, Eekerak paga An yanggo yinuk, ambinom puk ariyak meek me, yogondak neenggi omaawi paga at eebe lek eerogo pigin aret o,” yinuk, Aliku ALA nen aret yegerak o.

⁷ Aliku ALA nen ari logonet, “Iri'ngga ameneno wiya nen wonok nawak nduk yumbunogo nippogo mengga kwak, O it wonogwe me kota-kota togop aret eeginake, An napuri inobaabut alik aga'lek maluk kunik mban eekwi me, ineebe lek eerogo piige, It inapuri kambuwak nduk, eeppiige,

⁸ Mbini niyo aa'nggi paga wonage ti nggwok aret kwe, Kumi togwe nggininik inenggela'me mondok alik negen eerogo piige, Inagalomini iniki wakkolaawak nduk, wologwe awo tawe inoori woroorak o liingge-liingge nappi wage, Iniki ma'nage, inamineeri ne agan nage, eeruwak nduk, aberak lek me, maluk inoba kwippiige, Eerigin o.

⁹ Kwe ambi aagalogwe 7 ndarak abok kanggwi iinok, ambuluk yupuk nappunuk iniki worok togon aret kangge, O awo kagak oonegen mbet-mbet kilu yi nagin me, enggali age, endage lek age, Eeremenggerak paga iniki worok togon kangge, Eerigin o. Ndi, yumbunogo piyamenggaarak nogo inawim inigen iigak, inoorogo piyaagin o,” yinuk, Aliku ALA nen aret yegerak o.

Yeremiya iniki piirik logonet yoreegerak wone

¹⁰ Kwiya wae! It aakumi o yime menggaarak abok aret ninom wugabit nage logonet, wone warit mban nege an yi, Nonggop nduk nda'nabeegindak nabuwa o! Aakumi inanomat noba luurik wonage, ndi, an nanomat it inoba luurit wonage, eerulik kwe, It abok nen an pulunogo panit nugu menggaarak o.

¹¹ At Aliku ALA nen ari logonet, “Kat obeelom eerit nage logorak mendek mban eeke logonok nduk, an kili ari, It kinom ogoorak aaninggin inoba age, andi-pandi eeginake, eeke kenok, Yeenggwa niret o, yinuk, yokkiruwak nduk, eeppiige, Eerigin aret o,” yinuk, yo'negerak.

¹² “Mbutiwak o omarip paga pa'nggwe mendek aap nen kalenogo puurak op mbakop? Ndi, mbuti tembaga ti perak, nonggop? Ti meek mban!

¹³ O it wonogo menggam time abok aret maluk lombok eekwi paga Inamendek kuwak eerak inom, yi mendek ndi mendek onggo nggwok kuwak eerogo pakaarak nogo inom, Kugun wonok nawak nduk, inawim ineenggime pigin o.

¹⁴ An nanini kani omoonuk wunuk ari negen inoba kwippiyaakit mbake logonet, Inawim nen o ineenggo'lek me time piya nanuk, inayeloman eeppiinok logowak nduk, eerogo piyaagin o,” yinuk, yegerak o.

¹⁵ Ari mbaki, an nen at yoge logonet, “Kaliku ALA wae. An eerit nege nogo kat keenu aret me, noba abeke, kenegen pe'neege, It aap piyak-payak ee'nabit nugwi yi, onggo eeppiige, Eeke logot o. Kiniki yungguppunuk, eeppiinet nage menggendak kwe, it an neebe noorukwak, non mbanogo piyet o. Kat kendage tiyak yuwak nduk, eerit nage paga piyak-payak ee'nabit nugwi yi, pegiyet o.

¹⁶ Komaawi Lombok Menggendak Kaliku Ala wae. An paga kendage wiganit nege me, koone ari konengge nagarik, abu liirogon waganggirak paga Ninikime mondok lik yi unggwage logonet, nale'nggen nggwok ee'nabit unggwage, eeriyak ninikilom mbake, Eekirak o.

¹⁷ It aakumi kuwak a'nuk inagi'ndok kambuurak agan nogo logonet, ugun-ugun eekwi, Wone i'ndok kambuurak mban yogwe, Eekwi me time An ninom kwi'nageelik o. Ata, koone eeke logokit nduk, keenggi pi'nake, It eekwi ti mendek neebi lombok mbarikit nduk, eeppanege, Eekendak paga Nalik mbeyok togon aret kwi'narit nege minggirak kwe,

¹⁸ An andi-pandi mban eerogo panugwi yi, lek aga'lek kunik aret wonage, Ndi, nawin mondok kunuk nenet unggwage nogo, Obeelom aga'lek kundugu tit wonage, Eeke ti nonggop nduk o? Niyo nage menggerak kwe, poronak wonage, Yi eneeri wungge menggerak kwe, wungga'lek wonage, Eeke menggi kwak Kat ti kwak me, eeppanega'lek agandik ya?”

¹⁹ Yoge mbaki, at Aliku ALA nen yo'negerak nogo yi aret. “Kat komaluk mbo punuk, kiyokan yungguninuk neya wage keenok, Aa'nduk eeke nagandak kwak eerogo pagage neenok, nake eerit nage logonok nduk eeppagage, Ndi, koone abe lek ugun-ugun agan nage nogo mbo punuk, wone abe mendek mban agan nage keenok, An ari neegak yoraga mendek eerogo pagage, Eerigin o. Kat nen it iya nagak eerugun o. Ata, it nen mban kat keya wagak eeko logowak o.

²⁰ It aakumi yi nen kat maluk eeppagagwi iyo, pak wurik kwak eerogo pagage, Pak mbuti tembaga paga wurik kwak eerogo pagage, Eerigin me, Kooruwok nduk eeremenggaarak kwe, an nimbirak logonet, kili ari, kagap ndake, eerigin me, Kat tebenogo pagagun mondok lek o.

²¹ It aakumi maluk eeka ineenggime nen kagap ndarogo pagage, It aap iniki worokot ineenggime nen wondet eerogo pagage, Eerigin o,” yinuk, at Aliku ALA nen aret yegerak o.