Yeremiya 14 - Ala Wone Peenok Peebi Mbanak

O kibi nen nggween mbuk eerogo pereegerak wone

¹ O kibi nen nggween mbuk eerogo pereegerak kenok, Aliku ALA nen at Yeremiya yoreegerak nogo yi aret.

² “It Yekura mendek iniki puru yogwe, Inawi kota-kota aakumi nebet-ndalok agan nega'lek wonogwe, Nggween paga nden-wan yogo logonet le yogwe, It Yerutalem wonogwe nen yeenggwaaraawak nduk, inoone nggwok paga Ala yogwi, Eeko agaarik o.

³ It aap nagawan-nagawan nen inayeloman niyo kwaari nawak nduk nappiigaatak Niyo nggween kabunik me kwaari nagaatak kwe, lek kenok, Niyo toolak lek niyoowak we aret wonok wogo logonet, Nonggop eeruwi? yinuk, inenggali nen inete wandunik aret iniyokan wogo menggaarak.

⁴ It inanggween paga o mayu waga'lek kenok, nggween ya'lek-ndi'nduk eerogo pit nagaarak paga It yi mendek ndi mendek awi yaka nen, Nonggop eeruwi o? yinuk, iniki wakkologo logonet, Inayum inanobak paga lenggembatinuk wonogo agaarik o.

⁵ Rusa nogo inagari'ngga ki mbanogo noorak lek kenok, inaagalogwe awo ndarak kagak penaame time mbo piinok, mbaganggwi,

⁶ Keledai eyonggaame mendek puut puluk ko aago me nen, nggeewo mba'ngge tat wake menggi kwak yogwe, Inagari'ngga mbanogo nengga'lek inigen kubu agan unggwogwe kagak iniyok mbaro aago puk wonogwe, Eeko agaarik o,” yinuk, yoreegerak.

⁷ Kaliku ALA wae. Nit nomo agan nogo logonet, mbo pagagak mban eekwi, Maluk lombok eerogo pagagwi, Eekwi me, Ninomaluk ti nen, “Kit maluk eekotak o,” yinuk, ninenggali wappinanege menggerak kwe, Kendage maluk arukwak obeelom logowak nduk, yeenggwa nirage logot o.

⁸ It Iterali Iniki Lunik wonogwe kat yi wae. Aaninggin inoba age kenok, Inagap Ndaka yi wae. O yime aap nggiru pogom wonogwe, Tu paga nogo ambit yippegak nggarek yogwe, eeko mengga kwak, Kat nonggop nduk togop aret wonage agandik?

⁹ It aakumi iniki kobak a'nuk wonogwe, It aap wim wakaa'ngget kwe, inagap ndaganaburak meek age, Eeko mengga kwak, Kat nonggop nduk togop aret wonage agandik? Kaliku ALA wae. Kat ninenggela'me wonage, Ndi, nit nen kat kendage wiganinuk nogwe, Eeko monggoorak me, Mbo pinaniyak ti mage obak!

¹⁰ It aakumi yi, eekwi iinok, Aliku ALA nen yegerak nogo yi aret. “It aakumi yi, yagak-ndagak nugu logorak inikilom mbakwi, Iniyok teberogon logorak meek age, Eeko menggaarak me, Naliku ALA nen nale'nggen inombaka'lek logonet, it maluk eerit nugwi nogo abeke, It inomaluk onggo aaninggin inoba piige, Eerigin o,” yinuk, yegerak o.

¹¹ Ari nagaarik, an yo'nege logonet, “It aakumi yi, obeelom eerogo piyaakit nduk, inake tamban eeriyak mage o.

¹² It nen inambe mage negen logonet, Yeenggwa niret o, yinuk, nggino yo'nirimenggaarak kwe, inoone yogwe an naruk konengge, ndi, ndomba warogo nake kani kunggwi, gandum anggen yigirik niri wogwe, eeremenggaarak kwe, nale'nggen nen wagangge, eerigin lek o. Ata, wooluwak paga, mbi noogelo paga, kugilingga paga, ineebe lek eerogo piyaagin o.”

¹³ Yo'nege mbaki, an nen, “Kaliku Kitok Menggendak ALA wae. Ti kwe, it aap kat yorage keegak yoraga nen aakumi apit aret yorogo logonet, Wooluwak paga kinookwi, mbi noogelo kinoba kwi'nage, eerigin lek o. Ata, o yime kiniki ugun mondok-mondok tayenak aret logomunggup o, yinuk, yorogwe ti nonggop o?”

¹⁴ Yoge mbaki, Aliku ALA nen onggo an yo'nege logonet, “It aap an yorage neegak yoraga ti, an yoraga'lek neegak nendage kumbunuk pilit pugunogo yorogo agaarik o. An nen nappiige, yorogo logowak nduk mippiige, Togop yoraanip o, yinuk, yorage, eeka'lek neegak, iniki mba'nuk, Nabinggaanggo ndogop kagarak o, yinuk, yorogwe, tili paganggo logonet ugun-ugun yoranet nugwi, inikime nen pilit pugunogo ugun agan nugwi, eeko agaarik o.

¹⁵ It aap an nendage kumbunuk, Aliku ALA nen yogop yegerak o, agan nugwi ti, Naliku ALA nen nappiyoolik kwe, it nen, Wim paga, mbi noogelo paga, o yi, maluk arigin lek o, yinuk, yorogo menggaarak nogo it aret wooluwak paga, mbi noogelo paga kambugun o.

¹⁶ Ndi, it aap agan nugwi ti, inoone abet mba'nuk wamenggaarak aap inom, inakuwi inom, inapuri wologwe-komologwe inom, mbi noogelo paga kanggwi, wooluwak paga inoorak kanggwi, eeremenggaarak ineebe nggween taambiyoorak aakumi lek me, o Yerutalem tu paga tu paga time aret mbo piyaagun o. Nit eekwi onggo eeppinanigi, mbaruwak nduk, inoba kwippiyaagin nogo ti aret o.

¹⁷ An napuri wone yoroorak nogo yi aret. Napuluk kolaga aap kigin waka'lek kwak nowe-nawot yi, inawin abu iya lombok kunik wonogwe, Inawin lek ariyak lek mendek kunik wonogwe, Eerak wonogwe iinok, Liingge-oonikiya puk aga'lek namunggut-nale kunik mban wonage agaarik o.

¹⁸ O kota nen endekem wundi nanuk, aap wooluwak paga inoorak wonogwe iige, Ti'nuk, o kota unggwi woraanuk, time it aakumi mbi abu nen kambit nogwe iige, Eeke agarik o. It aap an yorage neegak yoraga inom, it an neebe unde inom, nigiren o it nugulik me piya nagaarak wonogo agaarik o, Yinuk, yoret,” yo'negerak me, yagi o.

Ala inabuwa mbaruwak nduk nggino yoreegwaarak wone

¹⁹ Kaliku ALA wae. It aakumi Yekura mendek abu mbo piige, It Tiyon mendek mondok keebi inombake, Eeke agandik? Nit obeelom ee'ninaburak meek andi mban kogo logowok nduk, nonggop nduk andi-pandi eerogo pinanege agandik? Niniki ugun tayenak logowok mbakoorak kwe, obeelom eerogo pinaniyak ambi ari waga'lek wonage, Andi-pandi ee'ninake nogo lek eerogo pinanuwak lak, ao, mbakwi kwe, ninamineeri ne agan noorak mban ee'ninake, Eeke agaarik o.

²⁰ Kaliku ALA wae. Nit abet aret maluk eerogo pagagoorak me, Nit maluk eeko monggoorak nogo nineenu age, Ndi, ninombomini maluk eeko nogogwaarak kunduk, Abet aret, inombakwi, Eeko ogoorik o.

²¹ Kat kendage obeelom wonage nogo maluk arukwak, Neebi o, yinuk, mbo pinanege, Kat wone lengganogo yorage menggenom abu tiyanak nogo kambot ege, Eeriyak mage o. Ata, ninom wone koonogo pereegindak nogo lek eerogo pega'lek kiniki aberak logot o.

²² It yi aakumi ndi aakumi aanom warogo ayuk wuko menggaarak inagugi nogo nen o mayu wuppi wage, Ndi, mbogut alik nen o mayu lubu-lubu wurabit wage, Eeko menggaarak mbakop? Lek aret o! Kat ninogoba Kaliku Ala kalik nen mban aret eeke menggendak o. Ti abok aret eerit nage nogo ti, kat nen aret eeke menggendak me, nit niniki kat paga lunik aret ogoorik o.