Yeremiya 13 - Ala Wone Peenok Peebi Mbanak

Kobee'le lobak yereegerak eegu laarak wone

¹ At Aliku ALA nen an yo'negerak nogo yi aret. “Kat nage logomenggendik, kobee'le ligi yawenak mendek paga penggaarak kumbunuk niyo nggulungga'lek logonet, yikkolage logot o.”

² Ti yo'nege mbaki, Aliku ALA yo'negerak ndak-ndak kobee'le kuni nage nagarik, yikkolagarak.

³ Ti'nuk, Aliku ALA nen ne ambinom an yo'nege logonet,

⁴ “Kobee'le kunogo yirikendak nogo niyo Eparat aa'nggi paga nage logomenggendik, kobee'le ti, yugum nggaganak me time kiraappu o.”

⁵ Yo'nege mbaki, an nen niyo Eparat aa'nggi paga nage nagarik, Alik Ku ALA nen yo'negerak ndak-ndak kobee'le nogo kiraappigirak.

⁶ Ti'nuk, ne ambik logonuk, Aliku ALA nen an yo'nege logonet, “Kobee'le niyo Eparat aa'nggi paga kiraappi nak, yokkigirak nogo wa nak o.”

⁷ Yo'nege mbaki, niyo Eparat aa'nggi paga nage nagarik, kobee'le kiraappereegirak wonage me nogome nen wunabi wage nagarik, kobee'le nogo muk lobak yegerak me ambi eeriyak abu meek aret agaarak kagarak o.

⁸ Ti'nuk, at Aliku ALA nen an yo'nege logonet,

⁹ “Naliku ALA nen yokkege yi aret. Kobee'le agaarak kagandak nogo ti ndak-ndak it aakumi Yekura iniki wogoppakwi, it Yerutalem wonogwe nen, Nit iya lombok, mba'nuk, iniki tiyappakwi, eekwi nogo an nen lek eerogo piyaagin o.

¹⁰ It aakumi inobaabut maluk logonet, noone konembunuk, eeriyak ineebi mbakwi, inogogumbuk logonet, it eeriyak mbakwi mban mugurok nogwe, an wonage neegak, kugi mugurok nogo logonet, ayuk wukwi, alut eekwi, eeko menggaarak nogo ti, kobee'le nibik yegerak ambi eeriyak meek ti pogom aret wonogwe me,

¹¹ kobee'le aap ambi agabee'le yikkolage menggi kwak, an nen it Iterali paga wiganak abok aret inom, it Yekura paga ndarak abok aret inom, napuri a'nuk logonet, nendage wiganogo pugwi, nendage tiyappanugwi, nayuk wukwi, eeko logowak nduk, nagabee'le pogom yikkolagagirak kwe, it nen an yorage nogo inaruk konenulik mbo pereegwaarak o,” yinuk, an yo'negerak o.

Niyoowak anggur toolak telak yigin yereegerak wone

¹² Aliku ALA nen ari logonet, “It aakumi Iterali inogoba Naliku ALA yagarak yoroorak nogo yi aret. Inalitak lombok inaniyowa'na anggur eno korok togon toologo patuwak, yegerak o. Yorage keenok, it nen, Ninalitak lombok ninaniyowa'na anggur eno korok togon toologo patiyak nineenggo'lek me, nduk yo'nirage agandik ya? Nineenu aret o, yinuk, yokkugwi iinok,

¹³ kat nen it yorage logonet, At Aliku ALA yegerak nogo yi aret. Anggur amburu eno korok togon toologo wogoragaatak nenok kumili kunggo mengga kwak, it aap inendagembogut Ndawut wone lengganogo yorage nagagim kwi'ndak logonet yorogwe nogo inom, it an neebe unde inom, it aap Ala yorage kagak yoraga inom, it o Yerutalem wonogwe inom, it o yime menggaarak abok aret togop eerogo piyaagin o.

¹⁴ Anggur amburu toolak ambi waganogo, anggur amburu toolak ambi paga yigirogo pogo mengga kwak, inogobamini inapuri ineebe paga yigirogo piige, inapuri inogobamini ineebe paga yigirogo piige, eerigin o. Inabuwa mbake, inabuwa nen teppiige, niniki yanggo yinuk, inomaluk mbo piige, eerigin mondok lek inenggaawak abu lek eerogo piyaagin o, yinuk, yoret,” yegerak me, yokkiragi o.

“Nit iya,” mba'nuk, iniki wogoppakwi iyo, yoragagerak wone

¹⁵ Kit Iterali mendek yi wae. At Aliku ALA nen wone abu aret yegerak me, kiniki wogoppatiyak mage o. At yegerak ti, kinaruk konembunuk, liippako logonip o.

¹⁶ O apit eerogo pinagi wage, O kiip arit nage logonet, puut-puut yumaak eerit nage paga kiniyogobit linggiraawak nduk, eeppinagage, Eeka'lek kagak, Kinogoba Aliku ALA tiyappogo logonip o. “Eya eeppinanuwak lak, ao,” yinuk, tokkogwe kiigak kwe, Kit mbakwi abut laganogo o apit lombok eerogo pinagage, “Eya eeppinanuwak,” mbakwi nogo obaane'me o yumaak lombok eeppinagage, Eerigin o.

¹⁷ Kit an yokkirage kinaruk konengga'lek kiniki wogoppakwi paga nalik kumaarak logonet, le ari, Aliku ALA andomba kit keele maakkiren nagun me, Niniki wakkolage logonet, nale yi wurik kwak wurabit wage, Eeke logogin o.

¹⁸ Aliku ALA nen an yo'nege logonet, “Kit kinanggare-nggare kinanobak paga abinakwi yirik nogo nggoorok togon wanggerak me, Wone lengganogo yorogo monggo'nom nogome nen wambi wa'nip o, Yinuk, at aap endagembogut inom, akwe kwe nggwok nogo inom, imbirak yoret o,” yinuk, yo'negerak o.

¹⁹ Karu nggwok o ame pa'nggwe time kota-kota tu unggwogo menggam narogo pegaarak me, Aap ambi nen paarogo pigin lek o. It Yekura mendek abok aret kugun wogoren nogwe, It ambi teppiiga'lek wogoren nogwe, Eekaarak o.

²⁰ Kat Yerutalem yi wae. It aakumi o omarip paga pa'nggwe nen wogwe yi, kuut pila yinuk, kenegen pegiyet o. Ndomba kwak kaagalogwe unde eeppagareegerak nogo ineebe ngge o? Ndomba kwak kaagalogwe nen eerit nagaarak paga kale'nggen mbake nagagindak nogo ineebe ngge me agaarik o.

²¹ “It aakumi ti, ninom a'nuk eerit nogo logowok o,” yinuk, kinom kunggo'net nagagindak nogo nen Kat tebenogo paganuk, karum logorak Aliku ALA nen mippiige kenok, kat nano yumunggun o? Kumi elege enegen paganak yagan wako mengga kwak kat togop aret kiniki andi nen yagan warumunggun lek mbaken?

²² “Aaninggin noba agaarak yi, nonggop nduk aga o?” yinuk, kinikime nen mbininggolage keenok, an nen onggo yokkege nogo yi aret. Maluk mondok nabenak mban eeke nagagindak ti paga kayum nibik-nobak eerogo punuk, Keebe maluk eeppagareegwaarak mbake logot o.

²³ It aap Kuti mendek inagabolo mili nogo inagabolo laambu ariyak op mbaken? Ndi, mba'ngge eeruwak tikkarok aago nogo alik eekkoloorak op mbaken? Nogo ndak-ndak kat maluk kunik mban eeke menggendak nogo obeelom eeriyak ti meek aret keegi o.

^24-25 At Aliku ALA nen ari logonet, “At an neebe ami age nagagerik, abe eeppuurak lek kagak kugi ti paga iniki panggombereegerak me, O wiya karume nen oone pu wage logonet, gandum arinon wonok mappege menggi kwak, mak eerogo pigin o. An nen at eerogo puurak koonogo pereegirak ti aret me, ti aret eeppege neyaagin o.

²⁶ At akom kin eerogo pege neenok, enggali aruwak nduk, ayum pilanogo anobak kuli nippigin o.

²⁷ At mbabilu eekko'net nage, Iniki aganggen nen, Ee'nabinip o, agan nage, Enggali mbaka'lek, Ee'nabinip, mban aap ugun-ugun yoranet nage, Eyoongga ku'mbanak me inom, yabu nggulaame inom, ogole warak lombok eerit nage nogo abok aret kagaarak me, At Yerutalem ti, abuwa o! Yiluk-maluk eerak kagak, ne mande logogin o?” yinuk, Aliku ALA nen yegerak me, yokkigi o.