Yaya 16 - Ala Wone Peenok Peebi Mbanak

¹ Yorage nagagerik, ambinom yorage logonet, “Wone yi yokkiragarak paga, Nineebi o, yinuk, mbo panugwi kiyo, yokkiragi o.

² It Yakuri tamban eeko menggam nen endekem wumbinagagun o. Ndi, it kinoorugun nogo nen, Nit Ala obaalombok aret eekwi o, yinuk, mbariyak eyom panggoni woraagin.

³ Ti eekkinabugun nogo ti, an nogoba nimbirak ineenggo'lek me eekkinabugun o.

⁴ Aa'nduk yokkirage logolik kwe, eekkinaburak eyom panggoni wage kenok, wone yokkiragarak yi, abeko logomunggup nduk, yogondak yi aret yokkiragi o,” yoragagerak. At Yetut ambinom yorage logonet, “An aa'nduk kit ninom logonet, wone yi yokkirage logolik kwe,

Aberiniki nen eeke logorak wone

⁵ yogondak perak, at nappani wagagerak nogo ka nage logonet, yokkirage neegak kwe, kit ambi nen, Kat nggeeme nage agandik o? yinuk, yo'nega'lek ogotik o.

⁶ An wone ti yokkiragarak nogo paga kiniki abu puru yogo ogotik kwe,

⁷ kit kinake aret nagin me, op aret o. An nagin lek kenok, at kiniki eyak wappinagarak kinowagam woraagin lek o. Nage logominggirik perak, kinowagam nappi woraagin o, yinuk, abet aret yokkiragi o.

⁸ At ti wage logomenggerik, aakumi maluk eekwi inom, an obeelom eeke nagarak inom, ndi, Ala nen maluk inoba piyoorak nogo inom, it aakumi nggween paga menggaarak nogo paganogo ineenu eeppiige logogin o.

⁹ It maluk eekwi nogo ti, iniki noba panggombunuk, abet nombakulik ti aret o.

¹⁰ Ndi, an obeelom eeke nagarak paga nogoba ka naminggirak me, kit ambinom an neyaamunggup lek o.

¹¹ Ndi, Ala nen maluk inoba piyoorak nogo ti, at o nggween paga yime unde menggerak nogo, muk maluk oba pereegerak o, yinuk, paganogo ineenu eeppiige logogin o.

¹² Noreewi o! Wone ando ambik yokkiroorak wonage kwe, kit yogondak woorak meek aret o.

¹³ Ala ndogop menggerak paganogo yokkiraga Aberiniki nogo wage logomenggerik perak, Ala ndogop menggerak o, yinuk, mamungginake logogin o. At iniki koombunuk nen yokkirage logogin lek o. Ata, at konembunuk mban yokkirage, ndi, peebi eeriyak wone nogo at nen paganogo yokkirage, eeke logogin o.

¹⁴ At nen an noone waganogo yokkirage logomenggerak paga an tiyappanege logogin o.

¹⁵ Yi mendek ndi mendek an nogoba unde menggerak nogo ti, an namendek aret me, at Aberiniki nen an noone waganogo yokkirage logogin me nduk, wone ti yokkiragarak o,” yinuk, yoragagerak.

Iniki puru yinuk, ale'nggen mbariyak wone

¹⁶ Yorage nagagerik, ambinom yorage logonet, “An neebe ne ambiriluk logonuk, lek neyamonggotak kwe, ti'nuk, ne ambiriluk logonuk, aret neyaamunggup o,” yoragagerak.

¹⁷ Yoragagerak at oone waganggwi nogo konembunuk, it ando nen ambi yogak yogo logonet, “An ne ambiriluk logonuk, lek neyaamunggup o, ti'nuk, Ne ambiriluk logonuk, aret neyaamunggup o, ndi, ambi, An nogoba ka nagin o, yinuk, yo'nirage yi, ngge nduk yo'nirage agaarik, mbakop?

¹⁸ Ne ambiriluk, yigi ti, nonggop mba'nuk yigi mbakop? At yo'nirage yi, nit kobak ee'ninake o,” yogogwaarak.

¹⁹ Yogo mbareegwa, Yetut nen wone it yoragagerak nogo at kin wakkoorak eekwi yelok iige nagagerik, yorage logonet, “Ai, noreewi o! Ne ambiriluk logonuk lek neyaamunggup o, ti'nuk, Ne ambiriluk logonuk aret neyaamunggup o, yokkiragarak nogo ti, Nonggop mba'nuk yigi, yinuk, ti wone aret mbanggo ogotik ya?

²⁰ Kiniki puru ari, leenggu maakwi, eekwi kiigak, it aakumi o nggween paga yime menggaarak nogo nen inale'nggen mbarugun. Kit kiniki puru yumonggotak kwe, peebi kiniki puru ari nogo lek age logonet, obaane'me ale'nggen nggwok eekkinake kaamunggup o.

²¹ Kwe ambi aagaluk ndariyak eyom panggoni wagaatak paga enegen pagak ari kenok, andi kage menggerak kwe, nda'nage kenok perak, Naagaluk muk nda'nagaarak o, yinuk, ale'nggen mbake logonet, andi kegetak nogo mari age menggerak.

²² Ti ndak-ndak, kit yogondak kiniki puru aago wonogwe kwe, peebi an ninom lambunggwi paga perak, kiniki ale'nggen age kaamunggup o. Kinale'nggen kamonggotak nogo aakumi nen lek eerogo pinagarak mondok lek o, yinuk, abet aret yokkiragi o.

²³ Ti eyom paga kit nen wone ambi kin wo'neyaamunggup lek o. Ti mendek wo'niret o, yinuk, nogoba nggino yogwi kiinok, an nendage kumbunuk, wokkirage kaamunggup o.

²⁴ O maan nen nok, yogondak kuli nendage kumbunuk nogoba ambi nggino yoga'lek aret ogotik o. Kiniki ale'nggen nggwok lombok kaamunggup nduk, nggino yo'nip o. Nggino yogwi kiinok, aret wokkirage kaamunggup o, yinuk, mondok abet aret yokkiragi o,” yoragagerak.

Aakumi abet mbaka'lek tebenogo piyareegerak wone

²⁵ Yetut nen ambinom yorage logonet, “Wone yi yokkirage nogo eegu laarogo mban yokkirage kwe, an nogoba abok nogo kin paga paganogo yokkiroorak eyom panggoni woraagin nogo paga an wone eegu laarogo ambinom yokkirage logogin lek o.

^26-27 Kit kinake an nogoba yorikit o, yinuk, yokkirage lek o. Kit nen an kiniki kunik ee'nakwi, ndi, an nogoba nappani wagagerak nogo abet mbakwi, eereegutak paga nogoba iniki kunik eekkinake me, ti eyom paga kit nen aret an nendage kumbunuk at nggino yorumunggup o.

²⁸ An nogoba wonage me nen o nggween paga yime wambi wagagirak. Ndi, yogondak an o nggween paga yime mbo punuk, nogoba ka nage agarik o,” yinuk, yoragagerak.

²⁹ Yorage mbareegi, at oone waganggwi mendek nogo nen at yogo logonet, “Yogondak perak, wone eegu laarogo yo'nirage lek tena'me aret yo'nirage keego o.

³⁰ Yogondak kat yi wone ndi wone abok keenu aret me, Wone ngge koonggo ogotik o, yinuk, aakumi kin wogiyoorak lek aret keego o. Ti paga kat Ala wonage me nen wagagindak abet aret kombako o,” yoreegwaarak.

³¹ Yogo mbareegwa, at Yetut nen, “Kit yogondak abet aret nombako ogotik ya?

³² Wologwe! Kit apit an mbo paninuk, kiname lombok ma'nariyak eyom peebi kwe, yogondak muk panggoni wagaarak o. Kit an mbo paninuk mbaganumonggotak kwe, nalik logogin lek o. An nogoba nimbirak aret logogin o.

³³ Wone yi yokkiragi nogo ti, an ninom kunik logonet, kiniki ugun tayenak lombok logobagip nduk, yokkiragi o. It aakumi nggween paga yime menggaarak mendek nogo nen piyakkinako logogun kwe, it o nggween paga yime inomaawi menggaarak nogo muk tebenogo piigirak me, kiniki kwippunuk, nu'lek logonip o,” yinuk, yoragagerak.