Yaya 13 - Ala Wone Peenok Peebi Mbanak

At oone waganggwi iniyok koorinabeegerak wone

¹ O kiyoma laago Obaga Mbo Nagagerak lariyak eekwi iigak, at Yetut o nggween paga yime mbo punuk, ogoba ka noorak eyom panggoni wagagerak eenu wonagagerak. At apuri at inom o nggween paga nugu nogogwaarak nogo, iniki kunik eeginake nagagerak me, “Iniki kunik ee'ninake tit kagak, kanggi o,” mbaruwak nduk, eeppiyareegerak nogo yi aret kagak, eeppuurak eyom nogo aret ari nagagerak.

² At Yetut oone waganggwi mendek inom mbi nunggwi me, Ibilit nen Timon aput Yurat Ikariyot Yetut onggo mbanigin nogo, muk iniki nggagani wage mbareegi,

³ at Yetut nogo ogoba nen yi mendek ndi mendek apit at unde logowak nduk, wogoreegerak nogo inom, ndi, Ala wonage me nen wagagim iyok paga ka noorak nogo inom, eenu wonagagerak me,

⁴ mbi nunggwi me nen mi'na'nuk, ambogoyum nggoorogo punuk, ngguu'mo yum obate paga nggereneegerak.

⁵ Nggerembunuk, yi togolowak kole me toolak nogo togolowak mbuuluk me kilirogo wuppege nagagerik, at oone waganggwi mendek iniyok koorinake, ti'nuk, ngguu'mo yum obate paga nggerenak nogo paga woloninake, eerit nagagerak.

⁶ Ti eerit, Timon Peterut owagam panggo yi nage mbareegi, Peterut nen, “Nogoba o. Kat an niyok koo'naburak mba'nuk eeke agandik?”

⁷ Yoge mbareegi, at Yetut nen, “Wulaga wae. An yogondak eeke yi, kat keenggo'lek aret kwe, peebi perak, keenu arumunggun o.”

⁸ Yoge mbareegi, at Peterut nen, “Kat nen an niyok koo'naburak mondok lek o.” Yoge mbareegi, at Yetut nen, “An kiyok kookkaburak lek kenok, kat an noone waganggwi nogo mendek logorak lek aret o.”

⁹ Yoge mbareegi, at Timon Peterut nen, “Ai, ti kenok, nogoba o. Niyok mban lek o. Ata, neenggi-nanobak abok aret koo'nabu o.”

¹⁰ Yoge mbareegi, at Yetut nen, “Aap ambit ambi ngguu'mo warak wonage kenok, at eebe abok aret koorak wonage me, ambinom ngguu'mo wappuurak lek o. Ata, iyok mban kooriyak perak op o. Kit yi, abok koorak wonogwe kwe, aap ambiriluk perak, koorak lek wonage kagi o,” yinuk, yoragagerak.

¹¹ At onggo mbanigin nogo eenu wonagagerak me, “Kit abok koorak mban wonogwe lek kiigi o,” yinuk, yoragagerak.

¹² At Yetut iniyok kooppiinok, at ayum nggoorak nogo yikkolage nagagerik, obaane'me kwi'na'nuk, it yorage logonet, “Wologwe! An eekkinakirak yi, kit liippogo ogotik ilik, lek a?

¹³ Kit nen, Ninogoba Ngguru wae! yo'nogo monggotak nogo ti, an aret me, abet aret yo'nogo monggotak.

¹⁴ Kinogoba an mamungginake minggirak nen aret kit kiniyok kookkinakirak kenok, kit togon togop aret at ambi iyok kookak eeko logorak op o.

¹⁵ An eekkinakirak yi, kit ndak-ndak eeko logobagip nduk, eekkinakirak o.

¹⁶ Ogoba tebenak kagak, ayeloman tiyanak wonageelik o. Ndi, at nappiige menggerak tebenak kagak, at nappi wagaatak tiyanak wonageelik mban o, yinuk, mondok abet aret yokkirage agarik o.

¹⁷ An wone yokkirage yi nogo kineenu ogo logomonggotik, eeko logomunggup kenok, kiniki ale'nggen ambik kogo logomunggup o.

¹⁸ Kit abok kiinok yokkirage lek o. An miirogo leengginabeegirak an neenu aret o. At nimbirak mbi nengge nogo nen aret nooriyak koonggerak o, yinuk, Ala wone liiru mbanak nogo a'me lik yuwak nduk, agaarak me, a'me lik yigin o.

¹⁹ Wone yi a'me lik ari kenok, kit nen, At eebe nogo yi aret kogo o, yinuk, kiniki noba panggombunuk, abet nombarubagip nduk, a'me lik yega'lek kagak, yogondak yokkirage agarik o.

²⁰ Kit ambi nen it an nappiya wage minggirak nogo wogonakwi kiinok, an aret wo'nakwi, ndi, an wo'nakwi kiinok, at nappani wagagerak nogo aret waganggwi, eeko logomunggup o, yinuk, mondok abet aret yokkiragi o,” yoragagerak.

Yurat eeriyak yoreegerak wone

²¹ Yetut nen wone togop yorage nagagerik, at iniki aaninggin ndugu agan nage mbareegi, paganogo yorage logonet, “Kit ambi nen an nooruwak nduk yoraamunggup o, yinuk, mondok abet aret yokkiragi o.”

²² Yorage mbareegi, “Ta nen eeriyak nduk yigi,” yinuk, inigen pet-pet yogo nogogwaarak.

²³ Inigen pet-pet yogo logonet, aap at oone waganggwi mendek ambi Yetut iniki kunik wonage nogo Yetut imbirak tabonak kwi'ndak wonage me,

²⁴ at Timon Peterut nen, “Ta kenok yigi, yoru o,” yinuk, eenggi titik paga yoreegerak.

²⁵ Yoge mbareegi, at oone wagangge ambi nogo nen Yetut eraanu ambinom panggo yi nage nagagerik, yoge logonet, “Nogoba o! Ti ta kenok yagan o?”

²⁶ Yoge mbareegi, at Yetut nen, “An roti paga amburu tamunogo wogoge neenok, ti aret mbarumunggun o,” yoge nagagerik, roti paga amburu tamunogo Timon aput Yurat Ikariyot nogo aret wogoreegerak.

²⁷ Wogoge nogo, wagangge kagak, Ibilit Yurat inikime unggwage mbareegi, at Yetut nen, “Yurat wae! Kat eeriyak mbakendak nogo mbet togon eeru o.”

²⁸ Yoge mbareegi, it kwi'ndak mbi nunggwi nogo abok nen, “Ti nonggop nduk yogi?” yinuk, it liippega'lek aret wonogogwaarak.

²⁹ Aap Yurat inawu yonggolak porogo wonage me, it ando nen mbako logonet, “At Yetut nen laago lariyak yi mendek ndi mendek ambinom kuni nawak nduk, yoge ilik, aap inamendek lek kenok, ando wogoroorak nduk, yoge a?” mbareegwaarak.

³⁰ Mbakwi iigak, at Yurat nogo roti wagangge nagagerik, mbet-mbet aret wundi nagagerak. O apit agagerak kagak aret wundi nagagerak.

Wone ngget mendek yoragagerak wone

³¹ Wundi nage kagak, at Yetut nen it ando nogo yorage logonet, “Wologwe! Yogondak Ala nen an aap aret nda'nagagirak nogo tiyappanigin o. Ndi, an eeke nogo paga Ala kunduk tiyak yigin o.

³² An eeriminggirak paga nen Ala tiyappege neenok, at Ala eeremenggerak paga an kunduk, tiyappanigin o. Ndi, mbet-mbet aret tiyappanigin me nduk, yagi o.

³³ Ai, napuri o! An ne ambiriluk ninom logominggirik, nagin me, kit kwaa'nabit namonggotak kwe, An nawam time kit noorak meek o, yinuk, it aap Yakuri mendek yoragagirak nogo ndak-ndak, kit togop aret yokkirage agarik o.

³⁴ Wone yogop ee'nu, ndogop ee'nu, ngget mendek yokkirage nogo ti, niniki-kiniki kunik eeko logorak ti aret o. An nen kit niniki kunik eekkinake minggi kwak, kit nen niniki-kiniki kunik eeko logonip o.

³⁵ Kit niniki-kiniki kunik eekwi paga aakumi abok nen kit an noone waganggwi mendek abet aret ineenu arugun o,” yinuk, yoragagerak.

Yetut nen Peterut eeriyak yoreegerak wone

³⁶ Yorage mbareegi, at Timon Peterut nen, “Kat nggeeme noorak nduk yagan o, nogoba?” Yoge mbareegi, at Yetut nen, “An nawam time kat yogondak nimbirak noorak meek kwe, peebi perak, mu'neren namunggun o.”

³⁷ Yoge mbareegi, at Peterut nen, “Ai, nogoba. An nonggop nduk yogondak nimbirak noorak meek yo'negen o? An kat kake kambuurak op mbake me.”

³⁸ Yoge mbareegi, at Yetut nen, “Wulaga! Kat abet aret an nake kambuurak op mbake agandik ya? Ayam oone awo yaga'lek kagak, kat ne kenagan paga, Yetut ti, an neenggo'lek, yumunggun o, yinuk, mondok abet aret yokkege agarik o,” yoreegerak.