Wundeegwaarak 9 - Ala Wone Peenok Peebi Mbanak

Eerubok mendek ambi eereegerak paga inaanggumi kambit nogogwaarak wone

¹ Ti'nuk, Aliku ALA nen Muta yoge, “Kat Pirawun owagam nage logomenggendik, at yoge logonet, It aakumi Iberani inogoba Aliku Ala nen, An napuri Iterali mendek nalut eeri nawak nduk teppiyaawak o.

² Teppiyoorak, Neebi, mba'nuk, pippiirogo wonage kenok,

³ Naliku ALA nen inaanggumi endekem wonage kambin-ndomba inom, keledai-kuda inom, tapi-unta inom, kugi andi ogole warak mendek ambi inoba nappi woraagin o.

⁴ Nappi woraminggirak paga aakumi Iterali inaanggumi kambukwak, Naliku ALA nen aakumi Iterali mendek inaanggumi teppiige logonet, it aakumi Metit mendek inaanggumi kenok, inoorogo piyaagin o.

⁵ Ndi, o Metit yime eeriyak yagarak ti, ko'lu aret eerigin me, Aliku ALA nen togop aret yegerak o, yinuk, Pirawun yori nak o.”

⁶ Yoge mbareegi, Karun imbirak Pirawun yori nogogwaarak kwe, eewa yaga'lek mbareegi, Aliku ALA nen ko'lu eeriyak yegerak nogo ndak-ndak eeke logonet, it aakumi Metit mendek inaanggumi abok aret kambit nogogwaarak kwe, it Iterali inaanggumi perak, ambiriluk ambi abu kambulik enaani aret wonagagerak.

⁷ Wonage mbareegi, at Pirawun nen aakumi Iterali inaanggumi inom kanggaarak kero lomboppiyaawak nduk, awuri nappiyareegerak wogo nogogwaarik, “Inaanggumi ambiriluk ambi kambulik aret o,” yinuk, Pirawun yoreegwaarak kwe, at Pirawun nogo iniki omaawi a'nuk aakumi Iterali teppiyoolik ogogumbuk aret pippiirogo wonagagerak.

Eerubok mendek ambi kumbi inoba piirinabeegerak wone

⁸ Ti'nuk, Aliku ALA nen Muta Karun imbirak yorage logonet, “Kani kunggo menggam nen wun kineenggime kabulogo woppunuk, Pirawun owagam nogo logomonggotik, enegen kagak, kat Muta nen wun nogo mbogut paga nggwe yumbunogo nippunu o.

⁹ Nippege keenok, wun nogo liirubu kale'ngga aremenggerak me, wiya nen wonok o Metit time aakumi inom, inaanggumi inom, abok aret inoba age logomenggerik, kumbi piirik-kunik eerogo piyamenggerak paga inanggore'na tubu-tubu wungge logogin o.”

¹⁰ Yorage mbareegi, kani kunggo menggam nen wun kabulogo woppunuk, wonok Pirawun owagam nogo nogogwaarik, Muta nen wun nogo mbogut paga pa'nggwe yumbunogo nippege mbareegi, inaanggumi inobaga inom, aakumi inobaga inom, kumbi piirik-kunik aganabit nage logonet, inanggore'na tubu-tubu wungge nagagerak.

¹¹ It aakumi Metit mendek nogo inagabolo paga kumbi kuurik lek piirinabeegerak nogo pogom, it kugi alom ineenu nogo togop mban piirinabeegerak me, Muta enggaanom paga woroorak meek aret agagerak.

¹² Togop eeginabeegerak kwe, at Aliku ALA nen Pirawun abunuk iniki omaawi eerogo pege mbareegi, Aliku ALA nen Muta yoreegerak nogo ndak-ndak it yogwi nogo at aruk konenulik mbo pereegerak.

Eerubok mendek ambi mayu kumulinggen wuppi wagagerak wone

^13-14 Ti'nuk, at Aliku ALA nen Muta yoge logonet, “Kat ko'lu kuubondendok keenik a'nuk Pirawun wage menggim nogome nage logomenggendik, at yoge, It aakumi Iberani inogoba Aliku Ala nogo nen ari logonet, It an napuri Iterali mendek nalut eeri nawak nduk teppiyaawak o. Teppiiga'lek kenok, o nggween paga yime abok aret an wonage minggi kwak ambi wonage lek eenu aruwak nduk, ne yi paga aret at oba inom, it aap Pirawun awuri inom wone koongga inoba inom, at apuri aakumi Metit mendek inoba inom, eerubok mendek aaninggin-paaninggin mondok alik negen inoba wuppi woraagin o.

¹⁵ An neenggi omaawi paga nen at inom, at apuri inom, kugi andi ogole warak mendek paga abu pup agago piyoorak op aret kwe,

¹⁶ an nomaawi inom, nendage inom, yi aakumi ndi aakumi o nggween paga yime wonogwe nogo abok aret ineenu arit nogo logowak nduk, at eenik teppege agarik o.

¹⁷ At iniki ogogumbuk a'nuk, an napuri nawak nduk, teppiiga'lek pippiirogo wonage me,

¹⁸ ko'lu o yogop paga an nen mayu kumulinggen mondok iya lombok maan aa'nduk nen nok-nok yogondak kuli mayu kumulinggen o Metit yime togop ambi wangge logolik mendek aret wuppi woraagin o.

¹⁹ Wuppi woraminggirak paga inaanggumi inom, inamindik-inamendek endekem wonogwe nogo inom, inoba wura wage logonet inoorukwak, op logowak nduk, koonogo piyaawak o. Koonogo piyaagin lek kenok, mayu kumulinggen wambi wage logonet tigitogon aret inoorigin, yegerak o, yinuk, Pirawun yori nanu o.”

²⁰ Yoge mbareegi, ko'lu kuubondendok Karun imbirak yori nogo mbareegwa, it Pirawun awuri inom wone koongga eegu nen, “Aliku ALA yegerak nogo abet aret eerigin me, ninagabiti o,” yinuk, inayeloman iname ungguwak nduk, yorogwe, inaanggumi iname mambiigwi, eereegwaarak kwe,

²¹ it ando Aliku ALA wone yugu abet mbarulik nogo perak, inaanggumi inom, inayeloman mini inom, endekem time teppiyareegwaarak.

²² Teppiyareegwaarak wonogwe iigak, at Aliku ALA nen Muta yoge, “O Metit yime ilin-unggut abok aret aakumi inom, inaanggumi inom, yi mendek ndi mendek yabu yarak me o Metit wonage nogo inom, o mayu kumulinggen inoba wambi woraawak nduk, keenggi mbogut paga titik iru o.”

²³ Yoge mbareegi, Muta nogo waanggun mbogut paga titik ege mbareegi, Aliku ALA nen o yabok mbogut paga nen nggween paga pindangge logonet, mbogut telangge, o mayu kumulinggen yele-kole lubu-lubu wuppi wage, eeke logonet, o Metit nogome mayu anggen mban ndoonogo teppereegerak.

²⁴ O mayu kumulinggen wuppi wage, o yabok pindanggage, eereegerak nogo ti, it aakumi Metit mendek inombomini o nenaakkologogwaarak kuli nen nok mayu anggen wambeegerak kuli togop ambi eeke kogo logolik mendek aret eereegerak.

²⁵ O Metit time mayu kumulinggen lubu-lubu inoba wangge logonet, aakumi inom, inaanggumi inom, yi mendek ndi mendek yabume yarak inom, yigirik-noonom eerogo pege, eyo-kale tubunik-lenggenak eerogo pege, eereegerak kwe,

²⁶ it Iterali wonogwe me o Nggoten time perak, mayu kumulinggen ambi wambi woroolik aret wonagagerak.

²⁷ Ti eeke mbareegi, at Pirawun nen Muta Karun imbirak wiiragagerak wogo mbareegwa, yorage logonet, “An nogo abu maluk eekirak o. At Aliku ALA nogo ti, abu obeelom mban wonage kagak, an napuri ninom perak, maluk aret eekoorak me,

²⁸ o ngguurubu eeke, mayu kumulinggen wangge, eeke yi, yi kuli aret teppuwak nduk, Aliku ALA yo'nip o. Yogwi kiinok, kit o yime ambinom pinagago logorak lek mbet-mbet wundi namunggup nduk, teppinagagin o.”

²⁹ Yorage mbareegi, it nen at yogwi, “O nggween yi, Aliku ALA mban unde menggerak keenu arenok nduk, o ngguurubu eeke nogo lek age, o mayu kumulinggen wangge nogo mbangge, eeruwak nduk, an o kota yime nen wundi nage logominggirik, neenggi titik eerogo Aliku ALA yori nagin kwe,

³⁰ kat inom, it kawuri kinom wone koongga inom, at Aliku Ala kinagabiti nen abet mbaka'lek awo wonogwe ti, neenu aret o,” yinuk, yoreegerak.

³¹ Ti eyom paga, nggem nogo anggen yege, waabuk negen jelai nogo ayo wake, eereegerak me, kumulinggen wuppi wage logonet, mondok pup eerogo pereegerak kwe,

³² gandum inom, mbato negen endage tekoyi inom, awi yarak nogo perak, awo mbilangga'lek me, mayu kumulinggen yigirulik eereegerak.

³³ Ndi, Muta nen Pirawun nogo o kota nogome teppunuk, wungge nagagerik, eenggi titik eeke logonet, at Aliku ALA nogo yoge mbareegi, o mayu kumulinggen wangge nogo puk age, o ngguurubu eeke nogo lek age, eeke logonet, o mayu lubu-lubu nggween paga wangge nogo, mbaneegerak.

³⁴ O mayu kumulinggen inom, o ngguurubu eeke inom, lek agagerak nogo at Pirawun enegen kage nagagerik, maluk eereegerak. Maluk eereegerak nogo ti, at awuri inom wone koongga nogo inom iniki omaawi ogo nogogwaarik,

³⁵ at Aliku ALA nen aa'nduk Muta yoreegerak nogo ndak-ndak at Pirawun nogo it aakumi Iterali nawak nduk, teppiyoolik eereegerak nogo ti aret o.