Wundeegwaarak 8 - Ala Wone Peenok Peebi Mbanak

Eerubok mendek ambi ogolem nappi wagagerak wone

¹ Nogo 6 yippunuk ko'lu Aliku ALA nen Muta yoge, “Kat Pirawun owagam nage logomenggendik, wone yogop yoru o. Naliku ALA nen napuri Iterali ti, nalut eeri nawak nduk, nappiyaawak o.

² Nappiiga'lek kenok, an nen o Metit yime abok aret ogolem mban nik yuwak nduk eeppiyaakit o.

³ Niyo Nin inikime ogolem mban nugut tiyak agan lagit wogo logonet, ame o nggwok abe wurik me inom, nogo yege menggim inom, ageyo ndoonak paga inom, at awuri inom wone koongga iname inom, ndi, apuri aakumi o Metit mendek iname inom, oroti worako menggam inom, tenggap oroti amok mbanggo menggam inom,

⁴ abok aret nugut tiyak yogo logonet, eebe paga inom, apuri aakumi Metit mendek ineebe paga inom, awuri inom wone koongga ineebe paga inom, apit aret nugut tiyak agan lagit wogo logogun, yegerak o, yinuk, Pirawun yo'nu o.”

⁵ Yoge mbareegi, Karun imbirak Pirawun yori nogogwaarak kwe, eewa yaga'lek mbareegi, Aliku ALA nen Muta yoge, “Ogolem apit aret o Metit yagabit aruwak nduk, at Karun nen owaanggun paga niyo nage paga inom, yomban wogome inom, niyo yenggenak me inom, titik iri nawak nduk, yoru o.”

⁶ Yoreegerak nogo at Karun yoge mbareegi, Karun nogo owaanggun paga yi niyo ndi niyo o Metit wonage nogo titik ige mbareegi, ogolem apit aret nugut tiyak agan lagit wogo logonet, o Metit time nggween enete lek a'nuk ogolem mban nugut tiyak yereegwaarak.

⁷ Togop eeke mbareegi, it kugi alom ineenu nogo nen inagugi nogo inikime nen mban eeko mbareegwa, o Metit nogome ogolem togop mban nik yereegerak.

⁸ Ogolem nogo wonage mban mbareegi, Pirawun nen Muta Karun imbirak woraawak nduk, wiiragagerak wogo mbareegwa, it yorage logonet, “An inom, napuri aakumi o Metit mendek inom, ogolem ninoba wonage yi, at Aliku ALA nen lek eerogo puwak nduk, tamban eekwi kiinok, an nen kat kapuri aakumi Iterali nogo Aliku ALA ake warogo wogori nawak nduk nappiyaagin o.”

⁹ Yoge mbareegi, Muta nen Pirawun yoge, “Ogolem kineebe paga inom, kinawi paga inom, wonage nogo lek a'nuk, niyo Nin inikime mban logowak nduk, kat inom, it kawuri kinom wone koongga inom, kapuri aakumi o Metit mendek inom, abok kinake tamban eeriyak yagandak nogo ti, mandenom eeriyak nogo yo'niru o.”

¹⁰ Yoge mbareegi, Pirawun nen, “Ko'lu aret Aliku ALA yoru o.” Yoge mbareegi, Muta nen ari logonet, “At Aliku ninogoba Ala kokwak ambi wonage lek keenu arenok nduk, kat yagandak nogo ndak-ndak aret eerigin o.

¹¹ Ogolem nogo ti, kat keebe paga inom, kiname paga inom, it kawuri kinom wone koongga iname paga inom, kapuri aakumi o Metit mendek ineebe paga inom, lek age logonet, niyo Nin inikime mban logowak nduk eerogo piyaagin o.”

¹² Yoge nagagerik, Muta Karun imbirak Pirawun teppunuk wundi nogo nogogwaarik, ogolem Pirawun owagam nappi wagagerak wonage nogo lek aruwak nduk, Muta nen oone nggwok paga Aliku ALA yoreegerak.

¹³ Muta nen Aliku ALA yoreegerak nogo, aruk konembunuk, iname inom, inawoore'nggam inom, ineyabume inom, ogolem wonage nogo apit aret kambit nogogwaarak me,

¹⁴ it aakumi Metit mendek nen ogolem kambit nogogwaarak nogo kuwak agago pit nogo mbareegwa, o Metit nogome obari ambik ndi wuke nagagerak.

¹⁵ Ndi, ogolem nogo lek agagerak at Pirawun kage nagagerik, iniki aaninggin wonage nogo tayok yereegerak kwe, Aliku ALA nen wone yereegerak nogo ndak-ndak iniki omaawi a'nuk, Muta Karun imbirak inoone koneniyak eebi mbareegerak.

Eerubok mendek ambi laami nik yuwak nduk eereegerak wone

¹⁶ Ti'nuk, at Aliku ALA nen Muta yoge logonet, “At Karun nen o Metit nogome liirubu aa'ngga nogo paga nen laami aruwak nduk, owaanggun paga nggween yawi waruwak nduk, yoru o.”

¹⁷ Yoreegerak nogo ndak-ndak eeko logonet, at Karun nen owaanggun eenggime wagangge nagagerik, nggween paga wake mbareegi, liirubu o Metit ilin-unggut abok aret liirubu aa'ngga paga laami age nagagerik, aakumi ineebe paga inom, inaanggumi paga inom, abok aret wiga agan inoba nagabit wogo nogogwaarak.

¹⁸ It aap kugi alom ineenu nogo nen laami agagerak kokwak aruwak nduk, inagugi nogo inikime nen mban eereegwaarak kwe, it togop eeriyak meek aret agagerak. Ndi, laami nogo aakumi ineebe paga inom, inaanggumi paga inom, abok aret inoba nagabak wonagagerak.

¹⁹ It aap kugi alom ineenu nogo nen wakkogogwaarak meek aret age mbareegi, Pirawun yogwi, “Yi Ala eenggi omaawi paga nen aret eeke o,” yoreegwaarak kwe, Aliku ALA nen wone aa'nduk yereegerak nogo ndak-ndak aret Pirawun iniki omaawi age nagagerik, it inoone konenulik mbo pereegerak.

Eerubok mendek ambi ti'neebon nappi wagagerak wone

²⁰ Ti'nuk, at Aliku ALA nen Muta yoge, “Kat kuubondendok keenik a'nuk at Pirawun niyo aa'nggi paga wage me, kimbirak lambungge logomenggendik, at yoge, At Aliku ALA nen ari logonet, An napuri Iterali nogo, nalut eeri nawak nduk, nappiyaawak o.

²¹ Nappiiga'lek kenok, an nen ti'neebon mili at oba inom, awuri inom wone koongga inoba inom, apuri aakumi Metit mendek inoba inom, inawi wurik paga inom, nappi woraminggirak paga it aakumi Metit mendek inanggween paga inom, iname paga inom, abok aret ti'neebon mili nik yigin o.

^22-23 Naliku an ALA o Metit yime wonage nogo, at Pirawun eenu aruwak nduk, an napuri Iterali mendek inom, at apuri Metit mendek inom, inalitak ogoorogo piyaminggirak me, an napuri Iterali mendek o Nggoten wonogwe me nogome ti'neebon mili lom eerak nugwi iyaagin lek o. At eenu agak eerubok yi nogo ti, ko'lu aret age kaagin, yegerak o, yinuk, yori nak o.”

²⁴ Yoge mbareegi, Karun imbirak Pirawun yori nogogwaarak kwe, eewa yaga'lek mbareegi, Aliku ALA yoragagerak nogo it eeko mbareegwa, Pirawun ame o nggwok abe wurik me inom, it aap Pirawun awuri inom wone koongga iname inom, o Metit ti, ti'neebon mili nogo apit aret yagabit tobo agan wogogwaarak paga o Metit ti, etenggen maluk aret agagerak.

²⁵ Age mbareegi, Pirawun nen Muta Karun imbirak wiiragagerak wogo mbareegwa, yorage logonet, “Kinogoba Ala ake warogo wogori noorak op aret kwe, o Metit yime nen aret warogo wogoriyak o.”

²⁶ Yorage mbareegi, at Muta nen ari logonet, “Nit togop eeriyak ti meek o. At Aliku ninogoba Ala ake warogo wogogwi nogo ti, it aakumi Metit mendek ineebi mbako menggaarak me, inigen iigak, warogo Aliku ALA wogogwi niinok, Ogole warak mendek eekwi o, yinuk, yugum paga ninoorugun nogo lek a?

²⁷ Togop eerukwak me, at Aliku ninogoba Ala yo'niragagerak nogo ndak-ndak o karume time nogo kenagan yegak, ake warogo wogori noorak perak op o.”

²⁸ Yogo mbareegwa, at Pirawun nen ari logonet, “O karume time at Aliku kinogoba Ala ake warogo wogori noorak op aret kwe, o nda time noorak perak, mondok mage o. Ndi, an nake aa'nduk tamban ee'nip o.”

²⁹ Yorage mbareegi, Muta nen, “An yogondak kat mbo paganuk, wundi nage logominggirik, Aliku ALA yoge neenok, ko'lu ti'neebon mili kat keebe paga inom, it kawuri kinom wone koongga ineebe paga inom, kapuri aakumi Metit mendek ineebe paga inom, wonage nogo lek aret arigin o. Ndi, lek age kenok, it aakumi Iterali Aliku ALA ake warogo wogori noorak op yagandak nogo, koone pilit ari logonet, yilinogo pinanukwak, liippu o.”

³⁰ Yoge nagagerik, Muta nogo nen Pirawun teppunuk, wundi nage nagagerik, Aliku ALA yoreegerak.

³¹ Yoge mbareegi, Aliku ALA nen at Muta yoreegerak nogo ndak-ndak eeke logonet, at Pirawun wonage me inom, it Pirawun awuri inom wone koongga inom, at apuri aakumi Metit mendek ugun wonogwe me inom, ti'neebon mili nogo ambit-ambi time abu logolik mondok lek aret agagerak.

³² Lek aret age mbareegi, at Pirawun nogo aa'nduk iniki omaawi agagerak nogo ndak-ndak aret a'nuk, aakumi Iterali nogo nawak nduk teppiyoolik, ogogumbuk aret piirogo wonagagerak.