Wundeegwaarak 7 - Ala Wone Peenok Peebi Mbanak

¹ Yoge mbareegi, at Aliku ALA nen Muta yoge logonet, “Kat Pirawun enggaanom paga an nen kat Ala negen eerogo pagage, ndi, it aap an nen yorage neegak yorogo mengga kwak koweeluk Karun ti, togop aret yoge keegak yorage, eeko logomunggup nduk, eeppinagagin o.

² An nen, Ndogop yoret o, yinuk, yokkege nogo abok aret yorage, ndi, at Pirawun nen aakumi Iterali mendek wumbiyaawak nduk, koweeluk Karun nen yoge, eerumonggotak kwe,

³ an nen Pirawun iniki omaawi eerogo piminggirak kagak, o Metit time ineenu agak eerubok mendek inom, eekulik tam warak mendek inom, ambik lombok eeriminggirak kwe,

⁴ konengga'lek mban kenok, an neenggi omaawi lombok paga nen it aakumi Metit mendek pippiirogo logonet, maluk eereegwaarak onggo aaninggin mondok alik lombok inoba kwippiige logominggirik, an napuri Iterali mendek inawuri leenok lombok eerak wogoren wundi nagin o.

⁵ An neenggi omaawi paga aakumi Metit mendek aaninggin inoba piige logominggirik, it Iterali mendek wogoren wundi nage neenok, Naliku an ALA nogo it aakumi Metit mendek ineenu arugun o,” yinuk, yoragagerak.

Karun owaanggun wone

^6-9 Yorage nagagerik, at Aliku ALA nen Muta Karun imbirak ambinom yorage logonet, “At Pirawun nen, Eerubok mendek ambi ee'nip o, yokkirage kenok, kat nen Karun yoge logonet, Kowaanggun ti, waganogo Pirawun owagam nggween paga ya'i mbo nappu o, yoge keenok, mbo nappemenggerak waalo aret arigin o,” yinuk, yoragagerak. At Aliku ALA nen Muta Karun yoragagerak nogo ndak-ndak Pirawun yori nogogwaarak nogo ti, at Muta ndarak kagak tahun 80 eeke, ndi, Karun nogo ndarak kagak tahun 83 eeke, eereegwaarak paga aret yori nogogwaarak.

¹⁰ At Aliku ALA nen wone abok aret Muta Karun yorage mbareegi, it imbirak Pirawun owagam nogo nogogwaarik, Aliku ALA nen yoragagerak nogo ndak-ndak Karun owaanggun nogo Pirawun inom, it aap Pirawun inom wone koongga inom, inigen iigak inabu'me mbo pege mbareegi, waanggun nogo waalo aret agagerak.

^11-12 Waalo aret age mbareegi, at Pirawun nen o Metit time aap kugi alom ineenu inom, tili pagangga inom, wiiragagerak wogo nogogwaarik, inalitik-inalitak inowaanggun woppunuk, inikime nen mban inagugi nogo linogo mbo nappogo mbareegwa, waalo aret agagerak kwe, Karun owaanggun nogo nen perak, it inowaanggun nogo tigitogon aret nenggegerak.

¹³ Togop aret eereegerak kwe, Aliku ALA nen aa'nduk yereegerak nogo ndak-ndak Pirawun iniki omaawi age nagagerik, inoone konenulik mbo pereegerak.

Eerubok mendek aa'nduk niyo amiya eereegerak wone

¹⁴ Ti'nuk, at Aliku ALA nen Muta yoge logonet, “Pirawun nen Iterali wundi nawak nduk teppiyoorak eebi mbake logonet, iniki omaawi agaarak me,

¹⁵ aap Pirawun kuubondendok niyo Nin aa'nggi paga nage menggerak me, kit ko'lu kuubondendok waanggun waalo agaarak nogo kineenggime wonok Pirawun kinom lambuniyak nduk, niyo Nin aa'nggi paga taati tokkogwe a nanu o.

¹⁶ Tokkogwe me, kiniya nage kenok, yogo logonet, Aakumi Iberani inogoba Aliku Ala nogo nen, Napuri o karume nalut eeri nawak nduk teppiyaawak, yogirak kwe, aa'nduk nen nok-nok yogondak kuli yi paga an noone ari nogo, at aruk konengga'lek me,

¹⁷ Naliku an ALA nogo eenu aruwak nduk, waanggun keenggime wonage ti paga niyo Nin wake keenok, niyo nogo amiya aret arigin o.

¹⁸ Amiya age kenok, ikan niyo inikime wonogwe nogo kambit namenggaarak paga niyo obari arigin me, it aakumi nen noorak abu meek aret kaagun, yegerak, yori nanu o,” yinuk, yoreegerak.

¹⁹ Yoge mbareegi, yori nogogwaarak kwe, eewa yaga'lek mbareegi, Aliku ALA nen Muta yoge, “Niyo nage paga inom, yomban wogome inom, niyo yenggenak paga inom, eyo nenaarak me niyo toolak inom, o Metit paga yi niyo ndi niyo abok aret owaanggun titik ige kenok, o Metit ilin-unggut eyo nenaarak me toolak inom, yugum nenaarak me toolak inom, abok aret amiya lombok telek yuwak nduk, Karun yoru o.”

²⁰ Yoge mbareegi, Muta Karun imbirak Aliku ALA yoragagerak nogo ndak-ndak at Karun nen owaanggun wagangge nagagerik, Pirawun inom, it aap Pirawun inom wone koongga inom, inigen iigak, niyo Nin nogo wake mbareegi, yi niyo ndi niyo nogo abok aret amiya lombok telek yereegerak.

²¹ Telek ari nagagerik, ikan niyoome wonogwe nogo apit aret kambit nogo mbareegwa, niyo o Metit wonage nogo abok aret obari ambik ndi wureegerak paga aakumi Metit mendek niyo noorak mondok meek kogogwaarak.

²² Ti eereegerak nogo it aap Metit mendek kugi alom ineenu nogo nen inagugi nogo inikime nen mban eeko mbareegwa, niyo nogo amiya age mbareegi, at Pirawun nogo Aliku ALA aa'nduk yereegerak nogo ndak-ndak iniki omaawi age nagagerik, it Muta Karun imbirak inoone konenulik mbo punuk,

²³ yungguninuk iyokan ame o nggwok abe wurik me unggwi nage nagagerik, “Eerubok mendek eeke yi, ia!” yinuk, iniki liippega'lek aret wonage kagak kwe,

²⁴ it aakumi Metit mendek nogo, niyo Nin noorak meek age mbareegi, ambet paga wonage kero, nggween kabunggo nogogwaarak.

²⁵ At Aliku ALA nen niyo Nin amiya eerogo pereegerak kagak, nogo 6 yereegerak.