Wundeegwaarak 6 - Ala Wone Peenok Peebi Mbanak

¹ Yoge nagagerik, Ala nen Muta ambinom yoge logonet, “Naliku ALA an aret o.

² An nen Abarakam inom, Itak inom, Yakup inom, inenggaanom paga nigiyareegirak nogo ti, nendage Naliku ALA ineenu aruwak nduk, nigiyoolik. Ata, nendage, Nomaawi Lombok Minggirak an Ala nogo mban ineenu aruwak nduk, nigiyareegirak.

³ It o Kanan time nggiru negen wonogwe iigak, an nen it yorage logonet, O yi nogo, kit unde logomunggup nduk, wokkiraagin o, yinuk, noone abuk nggaruk togon yoragagirak me,

⁴ it aakumi Metit mendek nen Iterali mendek inayeloman eeppiirogo wonogwe iinok, Yi eeppinanugwi ao, yinuk, ineebi-ineeba yogwe nogo, konengge nagarik, an noone mondok nggaruk togon yoragagirak nogo abekirak o.

⁵ Togop me, kat aakumi Iterali yogop yoret o. Naliku ALA an aret me, it aakumi Metit nen yabu eeko logowak nduk, inoone omaawi paga yorogwe nogo ineenggime nen ndinogo piige, inayeloman eeppiinok wonogwe nogo, wondet eerogo piige, ndi, neenggi omaawi paga piginake logonet, maluk eeppiigwi onggo aaninggin mondok alik negen it Metit mendek inoba piinok, Iterali inagap ndarogo piige, eeke logominggirik,

⁶ it an napuri lombok ogwe, ndi, an inogoba Ala aret age, eerigin me, it aakumi Metit mendek inake yabu eeko logowak nduk, inoone omaawi paga yorogwe nogo, ineenggime nen ndinogo wondet eerogo piyaminggirak paga Naliku inogoba Ala an aret ineenu arugun o.

⁷ An nen Abarakam inom, Itak inom, Yakup inom, nggween wogoroorak abet mbaruwak nduk, nendage kunogo yoragagim nogome napuri piya nage logominggirik, unde logowak nduk wogoraagin o, yinuk, Naliku an ALA nen aret yagi, yegerak, yoret o,” yinuk, yoreegerak.

⁸ Ti'nuk, at Muta nen aakumi Iterali wone ti yoragagerak kwe, inayeloman eeppiinok, inoone omaawi paga yorogo logonet, yawi inom inookwi paga iniki ale'nggen abu lek agagerak me, wone yoragagerak ti, abet mbarulik.

⁹ Abet mbaka'lek mbareegwa, at Aliku ALA nen Muta yoge logonet,

¹⁰ “Aakumi Iterali ti, o Metit nen wundi noorak teppiyaawak nduk, aap endagembogut Metit mendek Pirawun nogo yori nak o,” yinuk, yoreegerak kwe,

¹¹ Muta nen Aliku ALA yoge logonet, “Aakumi Iterali mendek yi, yoragagirak kwe, konenggwi iyoolik me, at Pirawun yoriminggirak kwe, an nambe aaninggin me, at kunduk konenigin lek mbaki o,” yinuk, yoreegerak.

¹² At Aliku ALA nen, “Aakumi Iterali apit aret o Metit nen wogoren wundi woraawak nduk, aakumi Iterali mendek inom, Pirawun inom, yora nanip o,” yinuk, Muta Karun imbirak yoragagerak nogo ti aret.

Muta Karun inombomini inendage mbanak wone

¹³ Muta Karun imbirak inombomini paga wiganak inendage yi aret. Aap Yakup apuluk manggu ndarak Uruben apuri inendage ti, Kenok, Palu, Ketoron, Karimi aret. At Uruben paga nen wiganak ndarak nogo ti aret.

¹⁴ At Timeyon apuri inendage ti, Yemuwen, Yamin, Okat, Yakin, Tokat. Ndi, kwe ambi Kanan mendek aagaluk Tawun nogo inom aret ndaganabeegerak. At Timeyon paga nen wiganak ndarak nogo ti aret.

¹⁵ At Lewi apuri ndarak leenok nogo inendage ti, Nggeroton, Kekat, Merari aret. Aap Lewi nogo ndarak kagak tahun seratus tiga puluh tujuh eeke nagagerik, aret kambeegerak.

¹⁶ At Nggeroton paga nen wiganak ndarak ti, Libini Timeyi imbirak aret.

¹⁷ At Kekat nogo apuri Amaram, Yitakat, Keboron, Utiyen, nogo aret. Aap Kekat nogo ndarak kagak tahun seratus tiga puluh tiga eeke nagagerik, aret kambeegerak.

¹⁸ At Merari nogo apuri Makili Muti imbirak aret. It aap Lewi paga nen ndegen-ndegen ndarak wiganak nogo ti aret o.

¹⁹ Aap Amaram nogo nen at ogoba awuluk kwe Yokebet wagangge nagagerik, apurilogwe Karun Muta imbirak at obaane'me aret ndaganabeegerak. Ndi, Amaram nogo ndarak kagak tahun seratus tiga puluh tujuh eeke nagagerik, kambeegerak.

²⁰ At Yitakat apuri ti, Kora, Nepek, Tikiri aret.

²¹ Ndi, Utiyen apuri ti, Mitayen, Elatapan, Titiri aret.

²² At Karun nogo Aminarap apuluk kwe Eliteba, Nakaton awuluk nogo wagangge nagagerik, apurilogwe Narap inom, Abiku inom, Eleyatat inom, Itamat inom, at obaane'me aret ndaganabeegerak.

²³ Ndi, Kora apurilogwe ti, Atit, Elakana, Abiyatap aret. At Kora paga nen ndegen-ndegen ndarak wiganak nogo ti aret.

²⁴ Karun apuluk Eleyatat nogo nen aap Putiyen apuluk ambi wagangge nagagerik, apuluk Pinekat at obaane'me aret ndareegerak. At Lewi nen ndaganabeegerak paga inalitik-inalitak wigannogogwaarak nogo, it ti aret o.

²⁵ Karun Muta imbirak nogo ti, o Metit nen aakumi Iterali mendek inawuri leenok lombok eerak wogoren wundi nawak nduk, at Aliku ALA nen wone lengganogo yoragagerak nogo ti, aap inalik lek Karun Muta imbirak ti aret o.

²⁶ Ndi, aakumi Iterali o Metit nen wogoren wundi nawak nduk, aap Metit inowe endagembogut Pirawun yoreegwaarak tirogon aap inalik lek Karun Muta imbirak mban aret.

Muta Karun imbirak Pirawun owagam nogogwaarak wone

²⁷ Muta nogo o Metit time wonage me, at Aliku ALA nen Muta yoge logonet,

²⁸ “Naliku ALA an aret me, an noone yokkege nogo tigitogon aret aakumi Metit mendek inowe endagembogut Pirawun nogo yori nak o.”

²⁹ Yoge mbareegi, Muta nen Aliku ALA yoge logonet, “An nambe aaninggin me, at Pirawun nen koneniyak meek aret mbaki o,” yinuk, yoreegerak.