Wundeegwaarak 4 - Ala Wone Peenok Peebi Mbanak

Muta eerubok mendek eeruwak nduk Ala omaawi wogoreegerak wone

¹ Yoge mbareegi, at Muta nen Ala yoge, “It aakumi Iterali mendek nen an yoraminggirak nogo noone konembunuk abet nombaka'lek logonet, At Aliku ALA nikkeya woroolik kagak pilit ari o, yo'nugwi iinok, an nen nonggop yoraagin o?”

² Yoge mbareegi, at Aliku ALA nen, “Kat keenggime ti nano porogo wonage?” Yoge mbareegi, Muta nen, “Nowaanggun aret o.”

³ Yoge mbareegi, Aliku ALA nen, “Nggween paga mbo pu o.” Yoge mbareegi, nggween paga mbo pege nagagerik, waanggun nogo waalo aret age mbareegi, Muta nogo ogole nen tayo yi nagagerak.

⁴ Nage mbareegi, Aliku ALA nen Muta yoge, “Waalo age ti, keenggi piget.” Yoge mbareegi, Muta nogo waalo age eenggi pigagangge nagagerik, waalo nogo eenggime wagangge kagak waanggun aret agagerak.

⁵ Age mbareegi, Aliku ALA nen, “It aakumi Iterali inombomini Abarakam inom, Itak inom, Yakup inom, at Aliku inogoba Ala nogo nen kat nikkeya wagaarak abet aret kombaruwak nduk, togop aret eeri namunggun o.”

⁶ Yoge nagagerik, Aliku ALA ambinom yoge logonet, “Keenggi kayum eraanu akem time mambu o.” Yoge mbareegi, eenggi ayum akem time mambereegerak nggigingge me, eenggi paga awin aaga'ne kunik nogo yanggwi pogom aret kagagerak.

⁷ Kage mbareegi, Aliku ALA nen, “Keenggi kayum eraanu nggiginggenom obaane'me mambu o.” Yoge mbareegi, mambunuk, nggiginggage nagagerik, awin nogo lek age logonet, at agabolo wonage menggi kwak aret agagerak.

⁸ Age mbareegi, Aliku ALA nen Muta yoge, “Eerubok mendek aa'nduk eekirak yi, eeremenggendak kwe, it abet mba'nuk, koone liippega'lek iinok, eerubok mendek peebi eekirak yi paga abet mbaruwak nduk, eerumunggun o.

⁹ Ndi, eerubok mendek mbere yi, eeremenggendak kwe, it abet komba'nuk koone liippega'lek mban iinok, niyo Nin tooli nage logomenggendik, nggween woloonak paga kilirogo pi wage keenok, niyo nggween woloonak paga kilirogo pemenggendak nogo amiya aret age kaamunggun o.”

¹⁰ Yoge mbareegi, at Muta nen Aliku ALA yoge, “Ai nogoba! An kayeloman o maan nen yogondak wone yori noorak yo'negendak yi kuli, aakumi ninom wone mbangge logonet, noone teeluk mbanggeelik nambe aaninggin me, meek o.”

¹¹ Yoge mbareegi, Aliku ALA nen at yoge, “Aakumi inamili ti, ta nen ogobakkigireegerak mbaken? Aakumi inoone lek inom, inaruk logu inom, inigen obeelom inom, inigen mbuk inom, Naliku ALA an nen eeppiigeelik mbaken? Naliku ALA nen mban aret eeppiige minggirak o.

¹² Togop aret me, wone yoroorak nogo an nen wone koonogo yokkege, mamunggege, eeke neegak, yorage logonok nduk nak o.”

¹³ Yoge mbareegi, at Muta nen, “Lek o, nogoba. Aap ambi oone abe ari menggerak kero, nappet o.”

¹⁴ Yoge mbareegi, at Aliku ALA iniki aagi a'nuk Muta mberege logonet, “Kat koweeluk Karun anebunu Lewi mendek nogo perak, nonggop o? At wone obeelom koonogo yorage menggerak an neenu me, kimbirak lambuniyak nduk wage ti, lambungge logomenggendik, iniki ale'nggen kombarigin me,

¹⁵ an eeriyak yokkigirak nogo yoge logonet, An noone maluk me, an nen karuk paga pege neegak yorage logonok nduk, nimbirak nawi o, yoremenggendak nogwe kiinok, kimbirak wone yoroorak inom, eeko logorak inom, an nen koonogo yokkirage logogin o.

¹⁶ An nen kat yokkege neegak yoroorak pogom kat kobaane'me at nen aret yoraawak nduk, kat an pogom a'nuk yoge logomunggun o.

¹⁷ Togop me, aakumi ineenu agak eerubok mendek eeke logonok nduk, kowaanggun ti perak, keenggime ko'nok nak o,” yinuk, yoreegerak.

Muta iyokan o Metit nagagerak wone

¹⁸ Ti'nuk, Muta nogo iyokan aru Yitoro owagam nage nagagerik, yoge logonet, “An nowe-nawot o Metit wonogwe nogo ineenik wonogwe ilik, lek a? Pegiya naakit nduk, yokkiri wagi o.” Yoge mbareegi, aru nogo nen, “Pegiya noorak op aret me, nak o,” yoreegerak.

¹⁹ Muta nogo o Miriyan time wonage me Aliku ALA nen yoge logonet, “It aap kat kooriyak mbareegwaarak nogo muk kambit nagaarak me, kiyokan o Metit time nak o.”

²⁰ Yoge mbareegi, Muta nogo akwe inom, apuri wologwe nogo inom, keledai amborowak paga kwippiinok, owaanggun Ala nen ko'nok noorak yoreegerak nogo eenggime ko'nok o Metit aret nogogwaarak.

²¹ Tu paga awo nogwe me, Aliku ALA nen Muta yoge logonet, “Kiyokan o Metit nage logomenggendik, eerubok mendek ee'nok nduk koba pagagirak nogo abok aret Pirawun enggaanom paga liirogon aret eeri nanu o. Eeri namenggendak kwe, aakumi Iterali wundi noorak lek yoraawak nduk, an nen Pirawun iniki omaawi agago pigin o.

^22-23 Iniki omaawi age kenok, kat nen wone Pirawun yoge, At Aliku ALA nen ari logonet, Iterali ti, naput manggu ndarak kwak aret me, naput manggu nogo an nalut eeri nawak nduk, teppuwak, yegerak o, yinuk, wone yoremenggendak kwe, teppega'lek kenok, an nen, At Pirawun aput manggu ndarak ti, wari wambi woraagin, yegerak o, yinuk, yori nak o,” yoreegerak.

²⁴ Yoge mbareegi, awo tu paga nogwe me, nogo yogo menggam ambime Aliku ALA Muta imbirak lambungge nagagerik, Muta warikit nduk eeke mbareegi,

²⁵ kwe Tipora nogo nen yugum muuni ambi wagangge nagagerik, at aagaluk nogo agabolo mbanogo Muta iyok paga mbo nappege logonet, “Nogonggelo amiya wundukwak obaane'me negen an aret agi o.”

²⁶ Ari nagagerik, kwe Tipora nogo nen ogonggelo obaane'me negen age logonet, aagaluk agabolo mbaneegerak ti paga Aliku ALA nen Muta warulik teppereegerak.

²⁷ Ti eeko nogogwaarik, awo nogwe me, Aliku ALA nen Karun yoge logonet, “Muta kimbirak lambuniyak nduk o karume time nak o.” Yoge mbareegi, Ala abuut nogo paga Muta imbirak lambumbunuk, keyage warogo agandin eyak mbangge nagagerik,

²⁸ Aliku ALA nen Pirawun yoruwak nduk Muta eeriyak yoreegerak nogo inom, ineenu agak eerubok mendek eeke logowak nduk yoreegerak nogo inom, abok aret Karun mbininogo yoreegerak.

²⁹ Yo'nuk, Muta Karun imbirak o Metit nogo nogogwaarik, aap Iterali mendek inoweewi yo'nggok kero apit aret kuwak eeppiinok,

³⁰ at Karun nen wone Aliku ALA nen Muta yoreegerak nogo mbininogo yorage, eerubok mendek nogo aakumi inenggaanom paga eeke, eeke mbareegi,

³¹ it aakumi Iterali yo'nggok nogo nen, “Aaninggin-paaninggin ninoba pinanege nogo, Aliku ALA nen enegen niige nagaarik, koonggerak kogo o,” yinuk, iniki abet mbako logonet, inendobanggun yindumbunuk, alut eereegwaarak.