Wundeegwaarak 38 - Ala Wone Peenok Peebi Mbanak

Ala ake warogo kani kunggak ogobakkigireegwaarak wone

¹ Ndi, Ala ake warogo kani kunggak yuurak ogobakkigiko logonet, eyo liibu paga unggut agi-ogu, aru-ogwe, ndak-ndak metet mbere eeppunuk, ambi oolo wakkagak eerogo nappugwi, ndi, owak oolo mippuurak ti, metet ambit eeppunuk, ambi oolo wakkagak eerogo mbanggwi, eeppogo nogogwaarik,

² mbuti tembaga paga tapi eyak negen ogobakkigirogo eyo nappugu unggut 4 irip nogo paga kwippunuk, eyak nogo etenggen ambit mban kunnaruwak nduk, eyo nogo apit aret mbuti tembaga paga nabenogo pit nogogwaarak.

³ Nabenogo punuk, kani kunggo logonet, yabu eekak yi mendek ndi mendek wun ndoonogo wumbegak tenggap inom, wun ndoonggak elabe inom, niyo ndik-ndik eekak niyoowak inom, enggaanggum pelaakak paando inom, kaninggen ndoonggak inom, abok aret mbuti tembaga paga mban ogobakkigirogo pugwi,

⁴ ndi, mbuti omanggen tembaga paga yonggon-yonggon yarogo punuk, eebe waganogo unggu nappugu abu'me oolo muundak taati ndoonogo pugwi, eeko nogogwaarik,

⁵ kani kunggak ti, eewu'nuk negak yuwak nduk, tenggen mbuti tembaga paga yarogo eyo owak mippugu 4 unggut-unggut nogo paga pugunogo pugwi,

⁶ ndi, eewu'nuk negak eyo liibu loonogo mbuti tembaga paga nabenogo punuk,

⁷ kani kunggak eewu'nuk negak yuwak nduk, tenggen peenok-peenok pugunik nogome mambereegwaarak. Ndi, kani kunggak ogobakkigireegwaarak ti, eyo paga ogobakkigirogo inikime time ambe mbanogo pereegwaarak.

Ineenggi-iniyok kookak ogobakkigireegwaarak wone

⁸ Ndi, ineenggi-iniyok kookak yuwak nduk, it kumi Ala inom lambungge logowam ooliya wuriyak tungga paga unde inamendek mbuti tembaga paga inabugagi ogobakkigirik nogo paga longgo warogo inikime nenaarogo pugwi, kwippunuk alom ogobakkigirogo pugwi, eereegwaarak.

Ooliya owa'nagat wukak ogobakkigireegwaarak wone

^9-10 Eeko nogogwaarik, ooliya wuremenggaarak owa'nagat wukak ogobakkigiko logonet, mbuti tembaga paga owak mippit noorak, 20 ogobakkigirogo iyok warak eeppugwi, ndi, mbuti perak paga ena yomonogo pugwi, owak mippuurak abo paga nggeleni nogo logorak nduk, keele komaarogo owak 20 nogo paga maarogo pugwi, eerogo punuk, eeben abeenok o ame pa'nggwe owak wurabit nogo logorak metet 46 kuli wakkogogwaarak ti paga tugunogo wuppit noorak yum tabak kayin yawenak amuni mbanak nogo paga penggaarogo pugwi, eereegwaarak.

¹¹ Ndi, o omarip paga pa'nggwe ti, togop mban owak mippit noorak 20 nogo paga mbuti tembaga paga iyok warak eerogo pugwi, mbuti perak ena yomonogo pugwi, owak mippuurak abo paga nggeleni nogo logorak keele komaarogo owak 20 nogo paga maarogo pugwi, ndi, o omarip paga pa'nggwe time wurabit nogo logorak metet 46 kuli paga wakkogwe, eereegwaarak.

¹² Eeko nogogwaarik, owa'nagat oonegen kilu yi nage menggim pa'nggwe paga owak 10 mippogo logorak nogo paga iyok warak eerogo pugwi, mbuti perak ena yomonogo pugwi, ndi, owak nogo abo paga nggeleni nogo logorak mbuti perak keele komaarogo owak 10 nogo paga maarogo pugwi, ndi, oonegen kilu yi nage menggim pa'nggwe time wurabit nogo logorak metet 23 kuli paga wakkogwe, eereegwaarak.

¹³ Ndi, oonegen lagi wage menggim pa'nggwe ti, togop mban metet 23 kuli eerogo pogo nogogwaarik,

¹⁴ tungga pelenogo punuk, eraaninu ambe abeenok paga owak 3 iyok warak mban eerogo punuk, eyo owak nogo paga tugunggo logorak kayin tabak nggorek metet 7 penggaarogo pugwi,

¹⁵ ndi, tu ambe abeenok paga ti, togop mban owak 3 iyok warak mban eerogo punuk, eyo owak nogo paga tugunggo logorak kayin tabak nggorek metet 7 penggaarogo pugwi, eereegwaarak.

¹⁶ Eeko nogogwaarik, owa'nagat wuriyak nogo yendok-wandok apit aret tugunogo wuppi wogo logorak ligi yawenak amuni mbanak laanak nogo paga yum tabak penggaarogo pugwi,

¹⁷ ndi, eyo owak mippit nogo logorak iyok warak ti, mbuti tembaga paga ogobakkigirogo pereegwaarak kwe, owak mippit nogo logorak irip paga nabeneegwaarak inom, ena yomonogo pereegwaarak inom, nggeleni nawam keele komaarogo pereegwaarak inom, ti perak, mbuti perak paga ogobakkigirogo pereegwaarak me, owa'nagat wuko logonet, owak mippit nogo logorak abok aret abo paga nggeleni nagak mbuti perak paga keele komaarogo pit nogogwaarak.

¹⁸ Pit nogo nogogwaarik, owa'nagat tungga'nggi mbanogo puwam nogo paga tugunggo logorak ndomba eeruwak laanak mu kunik inom, maa'ngga kunik inom, maa'ngga anggup kunik inom, ligi yawenak amuni mbanak laanak inom, nogo paga aap ineenu nen yabenggek-ndabenggek penggaako mengga kwak yum tabak irip nggorek metet 9 paga wakkogwe, ndi, ambe agi tiyarogon paga ti, owa'nagat wuriyak yum tugunogo wuppi wogogwaarak nogo ndak-ndak metet mbere eeppunuk, metet ambi oolo negen paga wakkogwe, eerogo pereegwaarak.

¹⁹ Ndi, eyo owak 4 mippogo logorak eereegwaarak inom, iyok 4 eerogo pereegwaarak inom, ti mbuti tembaga paga eereegwaarak kwe, nggelenggo logorak ena yomonogo pereegwaarak inom, owak abo paga keele komaarogo pereegwaarak inom, owak mippit nogo logorak irip paga nabenogo pereegwaarak inom, ti mbuti perak paga mban eerogo pereegwaarak o.

²⁰ Ooliya wurik nogo mippogo logonet, omaawi eekak inom, owa'nagat yendok-wandok mippogo logonet omaawi eerogo wurakak inom, abok aret ti, mbuti tembaga paga mban ogobakkigireegwaarak.

Ooliya wureegwaarak wu lingginik wone

²¹ Ala awooliya wuko logonet, o mage lombok menggim aloobut mbaneegwaarak paga yi mendek ndi mendek wundeegerak nogo ti, at Muta nen yorage logonet, “Kit Lewi mendek nen liiru mbanggo logonu o. Ndi, mbanggwi kiigak, aap Ala unde Karun aput endage Itamat nen kinarum logowak o,” yinuk, yoragagerak ndak-ndak liiru mbaneegwaarak nogo yi o.

²² It inanebunu Yekura mendek aap Uri aput Kut ombooluk endage Mbetalen nogo nen Ala wone lengganogo Muta, “Yogop eeriyak, ndogop eeriyak,” yoreegerak nogo ndak-ndak aret eeke kagak,

²³ aap anebunu Ndan mendek endage Akitamak aput Akoliyap nogo nen kayin yawenak amuni mbanak inom, ndomba eeruwak laanak mu kunik inom, maa'ngga kunik inom, maa'ngga anggup kunik inom, nogo paga yi mendek ndi mendek etenggen yabenggek-ndabenggek eerogo penggaake, mbuti emas paga yi mendek ndi mendek etenggen alik ogobakkigike, eyo paga yi mendek ndi mendek eenggi amburu eeke, eeke menggerak me, at imbirak nen eekwi iigak, wu wundeegerak nogo yi aret.

²⁴ O mage logowam wuko logonet, mbuti emas wundeegerak apit ti, “Mbuti emas yi, Kaliku ALA kake o,” yinuk, titik eerogo Aliku ALA ake pi wogogwaarak nogo Ala awooliya wuremenggam syikal onggo koonogo puurak nogo ndak-ndak aaninggin wakkogo logonet, 29 talenta inom, tujuh ratus tiga puluh syikal inom, ti paga wuko logonet, lambuk togon ineenggi lingginik ti, mbuti emas aaninggin seribu aret me, lek age,

²⁵ ndi, aakumi Iterali inendage liiru mbanggwi iigak, mbuti perak pereegwaarak apit ti, Ala awooliya wuremenggam syikal onggo koonogo puurak nogo ndak-ndak aaninggin wakkogo logonet, 100 talenta inom, seribu tujuh ratus tujuh puluh lima syikal inom, ti paga wuko logonet, lambuk togon ineenggi lingginik ti, mbuti perak aaninggin tiga ribu empat ratus aret me, lek age, eereegerak.

²⁶ Aap inendage mbanggwi ti, tigitogon aret ndarak iigak tahun 20 nen nugwa agi nggwe eerak ineebe lambunik ineenggi lingginik enam ratus tiga ribu lima ratus lima puluh aret me, aap ambit nen Ala awooliya wuremenggam syikal onggo koonogo puurak ndak-ndak wu mbuti perak abu mbuuluk pi wogwe iinok, apit lambunogo wakkogo logonet, mbuti perak aaninggin tiga ribu empat ratus aret agagerak me,

²⁷ mbuti perak 100 talenta ti, aaninggin 20 aret me, nogo paga ooliya nogo owak mippuurak iyok inom, yum tungga paga tuguniyak eyo owak mippuurak iyok inom, nogo ti, iyok 100 eerogo pogo logonet, iyok ambit paga talenta ambiret wungge, iyok ambit paga talenta ambiret wungge, eerit 100 talenta ti, mbuti perak aaninggin tiga ribu empat ratus aret me, wungge,

²⁸ ndi, mbuti perak ando seribu tujuh ratus tujuh puluh lima syikal ti, aaninggin 20 aret me, nogo paga eyo owak mippugu irip paga nabenggwi, ena yomonogo pugwi, nggeleni nawam keele komaarogo pugwi, eeko logonet wungge, eereegerak.

²⁹ Ndi, “Yi Ala kake o,” yinuk, mbuti tembaga titik eerogo Ala ake pereegwaarak nogo ti, 70 talenta inom, dua ribu empat ratus syikal inom, ti, mbuti tembaga aaninggin dua ribu empat ratus aret me,

³⁰ ti paga Ala inom lambungge logowam ooliya tungga owak mippereegwaarak iyok inom, ake warogo kani kunggak eebe inom, mbutimanggen yonggon-yonggon yareegwaarak inom, yi mendek ndi mendek eekak yuurak inom,

³¹ owa'nagat yengget-wangget wuko logonet, owak mippereegwaarak iyok inom, owa'nagat wurik tungga owak mippugu iyok inom, ooliya wuko logonet omaawi eekak mbuti owak inom, owa'nagat yendok-wandok wuko logonet omaawi eerogo wurakak mbuti owak inom, abok aret ogobakkigiko logonet, wu wundeegerak nogo ti aret o.