Wundeegwaarak 33 - Ala Wone Peenok Peebi Mbanak

Aakumi Iterali puut Tinayi nen nawak nduk, yoragagerak wone

¹ Ti'nuk, at Aliku ALA nen Muta yoge logonet, “An nen Abarakam inom, Itak inom, Yakup inom, yorage logonet, Kinombowologwe inanggween wogoraagin o, yinuk, kumbuk mbanogo noone abuk nggaruk togon yoragagim nogome nabagip nduk, kat inom, it aakumi o Metit nen wogoren wundi wagagindak nogo inom, o yime mbo punuk time aret nanip o.

² Nogwe kiigak, malayikat nen aa'nduk a'nuk, it aakumi o Kanan mendek inom, Amori mendek inom, Ket mendek inom, Perit mendek inom, Kewi mendek inom, Yebut mendek inom, mugogo nappiinet nawak nduk, nayonggo ambi nappi woraagin o.

³ Ndi, kit o yime nen nggween abu obeelom yilak amburu inom, nggiin amburu inom, yi eneeri negen kila-kila wungge menggim nogome nogo logonet, kinogogun ambik me, tu paga ambi age kenok kinoorukwak, an ninom nagin lek, yegerak o, yinuk, aakumi Iterali yoret o.”

^4-6 Yoge nagagerik, “It aakumi ti, inogogun ambik me, ne ambi paga iluk an ninom nage logonet, ambi age kenok inoorukwak, ambi koonogo piyoorak me, inobaanggi-inobaangge eerak nggoorogo mbo puwak o,” yinuk, Aliku ALA nen Muta yoreegerak nogo, yorage mbareegi, Ala nen it aakumi Iterali mberiragagerak konenggo nogogwaarik, iniki puru yinuk, inobaanggi-inobaangge eerak lek logonet, leenggu maareegwaarak. Ndi, puut Tinayi wonogogwaarik, wundi wogogwaarak ti kuli nen inobaanggi-inobaangge eeka'lek aret wonogogwaarak.

Ala inom lambungge menggim ooliya wurik wone

⁷ It aakumi Iterali tu paga wogo logonet, at Muta nen ooliya ambi aakumi Iterali inawooliya wurik enggela'me nen endekem tayorogon alik time wuri nage kenok, aakumi nen Aliku ALA inom wone mbaniyak mbakwi kenok, inalik endekem time aret nogo nogogwaarak me, ooliya wurik ti endage, “Ala Ninom Lambungge Menggim o,” yinuk, yogo nogogwaarak.

⁸ At Muta nogo ooliya wurik me time nage kenok, aakumi Iterali abok aret inalitak lombok inarungga paga mi'ndak logonet, Muta nage inigen wonok ooliyana nogome mambi nogo nogogwaarak.

⁹ At Muta nogo ooliyana nogome unggwi nage nagaatik, Aliku ALA imbirak wone mbanggugak, ndugwi nogo tunggambe paga nobappunuk, arum aret wonage nagagerak.

¹⁰ It aakumi Iterali mendek nogo Ala awooliya wurik tunggambe paga ndugwi nogo nobappunuk wonage inigen kogo nagaatik, inarungga ambe paga lombok inalitik-inalitak mi'ndak logonet, alut eeko nogogwaarak.

¹¹ Alut eekwi iigak, aakumi inoreewi inom inengga kunna'nuk wone mbanggo mengga kwak Aliku ALA nen Muta imbirak inengga kunna'nuk wone mbangge nagaatik, Muta iyokan inawooliya wurik me wage kagak, at ayeloman wulaga tawe Nun apuluk Yotuwa nogo perak, Ala ooliyana nogome nen wundi waga'lek time aret wonagagerak.

Ala eya ndelenak-welenak eeke Muta kagagerak wone

¹² Ne ambi paga Muta nen at Aliku ALA yoge, “Kat nen ari logonet, Aakumi Iterali mendek yi, wogoren nak o, yo'nege menggendak kwe, ta nimbirak nen wogoren noorak yo'negen? Ndi, kendage an neenu me, keebe ninikilom kombake o, yo'nege menggendak kwe,

¹³ kat nen abet aret nabuwa mbake kenok, it aakumi inanebunu Iterali yi, An mendek aret o, yinuk, inoba aberak logonet, kat keebe liirogon neenu age, ndi, kat nimbirak mondok-mondok niniki kunik wonage, eerikit nduk, kat eeriyak mbake menggendak nogo yo'niru o.”

¹⁴ Yoge mbareegi, Aliku ALA nen, “An neebe lombok nen aret ndegenggiren nagin me, kiniki tayenak ugun aret namunggup o.”

¹⁵ Yoge mbareegi, Muta nen, “Kat keebe lombok ninom nagun lek kenok, O yime nen nanip o, yinuk, yo'niraagun o.

¹⁶ Kat ninom nagun lek kenok, kapuri apit yi ninom ninabuwa nen obeelom eeppinanege menggendak nogo it aakumi alik mendek nen nonggop togon ineenu arugun? Kat ninom nage logonet, ninabuwa nen obeelom eeppinanege ti paga it aakumi nen, Muta at apuri inom ti, yi aakumi ndi aakumi o nggween paga yime wonogwe nogo kokwak lek alik mendek aret o, yinuk, yelok niigo logogun o.”

¹⁷ Yoge mbareegi, at Aliku ALA nen Muta yoge, “Kendage neenu age, ndi, keebe ninikilom kombake, eekirak me, wone yo'negendak nogo ti, ndak-ndak aret eerikit o.”

¹⁸ Yoge mbareegi, at Muta nen ari logonet, “Ai, nogoba o. Kat eeke paga kendage tiyappagagwi nogo ambi kaakit nduk, nenggaanom paga eeru o.”

¹⁹ Yoge mbareegi, Aliku ALA nen, “An nen aakumi inabuwa nen teppiyoorak mbake kenok teppiige, ndi, obeelom eeppiyoorak mbake kenok obeelom eeppiige, eeke minggirak me, Naliku an ALA nogo nendage kunggolage logonet, obeelom eeke minggirak paga nendage mondok tiyanak, Wi, nugwi nogo kenegen keegak nage neyaamunggun kwe,

²⁰ aakumi nen netenggen neegwi iinok, kanggo menggaarak me, netenggen perak, neyaamunggun lek o.”

^21-23 Yoge nagagerik, Aliku ALA nen, “An eeke paga nendage tiyanak, Wi, nugwi nogo nen yugum ambe nggaganak me yime mambaganuk, neenggi kenegen me nobappagagak nage neenok, neenggi pelenogo nappunuk, netenggen neyoorak mage me, nambokan mban neyaanok nduk, yugum puut lunik an wonage me yime mi'ndak a mok o,” yinuk, Muta yoreegerak.