Wundeegwaarak 3 - Ala Wone Peenok Peebi Mbanak

Ala nen Muta wiireegerak wone

¹ At Muta nogo nen at aru Ala unde o Miriyan mendek Yitoro nogo, aanggumi kambin-ndomba ndegeninake wonagagerak me, ne ambi paga kambin-ndomba nogo wogoren karume enebaga Ala abuut endage Korep nogome aret wagagerak.

² Wage nagagerik, wonage me, at Aliku ALA ayonggo malayikat nogo eyo ku'mbanak me kani wunuk ari kagak enggela'me nogome nen Muta nikka wagagerak. Eyo nogo kani nengga'lek we omoonuk wunuk mban ari enegen kage nagagerik,

³ “Ia! Kani omoonuk wunuk ari kwe, eyoongga kani nengga'lek eerubok mendek eeke ti, nano nen eeke kaamun? Pekkaakit o,” mba'nuk, panggo yi nagagerak.

⁴ At Muta nogo enegen pekkaakit nduk panggo yi nage nogo Aliku ALA kage nagagerik, eyo ku'mbanak enggela'me nen oone yoge logonet, “Muta, Muta.” Yoge mbareegi, Muta nen, “An yime wonage me, yo'niru o.”

⁵ Yoge mbareegi, Ala nen at Muta yoge, “An nowagam ya'i panggo yi woroorak ti, mage o. Ndi, kat mi'ndak wonage me taati kunduk, nggween mage lombok aret me, kiyok ogut nggerenak ti, piinogo pu o.”

⁶ Yoge nagagerik, ambinom yoge logonet, “Kombomini Abarakam inom, Itak inom, Yakup inom, inogoba Ala nogo ti, an aret o,” yinuk, yoreegerak nogo at Muta aruk konengge nagagerik, Ala enegen pekkoorak agabiti nen enete nobakkolagagerak.

⁷ Nobakkolage mbareegi, at Aliku ALA nen at yoge logonet, “An napuri o Metit wonogwe nogo it aap Metit mendek nen inayeloman eeppiinok, aaninggin-paaninggin inoba piigwi iinok, yagan wako logonet, inoone nggwok paga nggino yo'nugwi nogo, muk naruk konenggirak me, Yeenggwaaraakit, mbake agarik o.

⁸ Yeenggwaarage logonet, an napuri nogo aakumi Metit mendek ineenggime nen ndininabunuk, wogoren it aakumi Kanan mendek inom, Ket mendek inom, Amori mendek inom, Perit mendek inom, Kewi mendek inom, Yebut mendek inom, inanggween nggwok mili obeelom lombok yilak amburu inom, nggiin amburu inom, niyo eneeri negen kila-kila wungge menggim time piya naakit nduk wagi o.

⁹ It aakumi Metit mendek nen aakumi Iterali mendek aaninggin-paaninggin inoba piigwi iinok, iniki aaninggin logonet, inoone nggwok paga yo'nugwi nogo an muk liippiigirak me,

¹⁰ an napuri Iterali mendek o Metit nen wogoren wundi woroorak kat Pirawun yori nagak eeke logonok nduk, nappagagi o,” yinuk, yoreegerak.

¹¹ Yoreegerak kwe, at Muta nen Ala yoge, “An Pirawun owagam nage logominggirik, aakumi Iterali o Metit nen wogoren wundi woroorak yo'negendak nogo ti, an ta nduk yo'negen o?”

¹² Yoge mbareegi, at Ala nen Muta yoge, “An yeenggwa kirigin lek mbaken? It aakumi Iterali mendek o Metit wonogwe nogo wogoren wundi woraanuk, puut yi paga an nalut eeri wogo logomonggotik kenok, Ala nen abet aret nappaneegerak kagi, yinuk, keenu arumunggun o.”

¹³ Yoge mbareegi, Muta nen Ala yoge, “Togop aret kwe, an aakumi Iterali wonogwe me nage logominggirik, Kinombomini inogoba Ala nogo nen nappani wagarak kinowagam wagi o. Yorage neenok, it nen an kin wa'nako logonet, At endage ta? Yo'nugwi iinok, an nen onggo nano yoraagin o?”

¹⁴ Yoge mbareegi, at Ala nen Muta yoge logonet, “An ti, AN ARET. Ndi, kat nen it Iterali mendek yorage logonet, At endage, AN ARET nen nappani wagaarak, yoraamunggun o.”

¹⁵ Yoge nagagerik, Ala nen Muta ambinom yoge logonet, “Kinogobamini Abarakam inom, Itak inom, Yakup inom, Naliku inogoba Ala nen aret muk kinowagam nappani wagaarak, it aakumi Iterali yoraanu o. An nendage, AN ARET, yokkigirak ti, lek arigin lek mondok-mondok aret logogin me, yi aakumi ndi aakumi nda'narit wundi wogo logonet, nendage ti aret yogo logogun o.

¹⁶ Togop aret me, it aap Iterali inoweewi yo'nggok kero kuwak eeppiinok, yorage logonet, Kit kinombomini Abarakam inom, Itak inom, Yakup inom, at Aliku inogoba Ala nogo nen ni'neya wage nagaarik, yo'nege logonet, It aakumi Metit mendek nen aaninggin-paaninggin inoba piigwi nogo an inogoba Ala nen muk liippiige nagarik,

¹⁷ it o Metit aaninggin-paaninggin eeppiigwi me time nen wogoren aakumi Kanan mendek inom, Ket mendek inom, Amori mendek inom, Perit mendek inom, Kewi mendek inom, Yebut mendek inom, inanggween mili obeelom yilak amburu inom, nggiin amburu inom, niyo eneeri negen kila-kila wungge menggim time piya nagin abu koonogo pigirak, yegerako, yinuk, yoraamunggun o.

¹⁸ Kat yoramenggendak nogo it aap Iterali yo'nggok nogo nen konenugun aret me, konenggwi iinok, kinom aap endagembogut Metit mendek nogo owagam nogo logomonggotik, at yogo logonet, At Aliku aakumi Iberani inogoba Ala nogo muk niniya wagaarak me, nogo kenagan yegak karume time at Aliku ninogoba Ala ake warogo wogogo logonet, alut eeri noorak me, kat nen, E, yo'niraanok nduk, yokkiri wogo o, yinuk, yo'nu o.

¹⁹ Yorumonggotak kwe, aap ambi eenggi omaawi ambik paga eeppega'lek kagak, E o, yokkiraagin lek ti, neenu aret me,

²⁰ an neenggi omaawi paga eerubok mendek eeke logonet, it Metit mendek alik negen yigirogo inooke neenok perak, teppinagamenggerak wundi woraamunggup o.

²¹ Wundi wogo logonet, kineenggime lek we wundi worookwak, an nen aakumi Metit mendek inamendek wokkiraawak nduk iniki yanggonogo piyaminggirak paga

²² it kumi Iterali mendek inalitak lombok nen kumi Metit mendek inawi koorok time inom wonogwe nogo inamendek mbuti emas inom, mbuti perak inom, yum nggorek mendek inom, inaagalogwe wologwe-komologwe yippiyoorak nduk, nggino yorogo logowak o. Togop eekwi paga it Metit mendek inamendek nogo abok aret lek eerogo piyaamunggup o,” yinuk, yoreegerak.