Wundeegwaarak 29 - Ala Wone Peenok Peebi Mbanak

Karun apuri Ala unde logowak nduk, mippiyoorak wone

¹ Yoge nagagerik, Muta ambinom yoge logonet, “It Karun apuri inom an neebe unde logonet, nake eeko logowak nduk, mippiige logonet, eeriyak nogo yi aret o. Kat nen tapi ngguunok awooluk ambi wagangge, ndomba ngguunok inawinde-inobaande eerak lek mbere wogonake,

² gandum anggen yigirik abu obeelom woppunuk, oroti ragi inom pega'lek worarogo wagangge, oroti ragi inom pega'lek amburu paga amok mbanogo punuk, longgo warogo wagangge, ndi, oroti ragi inom pega'lek tabak worarogo amburu labunogo wagangge,

³ eeke logomenggendik, oroti ti, muun yarak me punuk, abok aret an Ala nake pege, ndi, tapi ngguunok nogo inom, ndomba ngguunok mbere nogo inom, togop mban aret nake pege, eerumunggun o.

⁴ Togop aret eeke logomenggendik, aap Karun apuri inom wogoren an ninom lambungge logowam nawooliya wuremenggenom tungga'nggi paga taati piya wage logomenggendik, niyo paga inabin koorogo piyaamunggun o.

⁵ Inabin koorogo piige logomenggendik, it aap an neebe unde inayum penggaariyak yokkigirak nogo waganogo Karun yirippege logonet, yum akem agi yirika nggorek nogo yippege, yum epod endekem nggwe kagak yum nggorek akem yiriyak nogo yippege, yum agale warak epod nogo yippunuk, agabee'le yonggon negen ineenggi amburu yariyak nogo nggerembege, yum ko'no negen mendaariyak nogo amiguwak paga nabenogo pege,

⁶ yum anobak paga perenogo punuk, meeli tabak paga, Aliku ALA Ake Leenak, ayo wogo logorak nogo yum anobak paga pereniyak nogo paga pugunogo pege, eerumunggun o.

⁷ Eeke logomenggendik, aap mippiigo logonet, amburu kilippiigak toolak nogo wagangge logomenggendik, anobak paga kilirogo wuppi woraamunggun o.

⁸ Ti eeke logomenggendik, Karun apuri nogo kowagam piya woraanuk, inayum akem agi yirika nggorek nogo yirippiinok,

⁹ inagabee'le inobate paga nggerenogo piige, inabetagi inanobak paga perenogo piige, eerumunggun o. An neebe unde logowak nduk, aap mippiige ti, mondok-mondok eeko logowak nduk, an nen wone koonogo pigirak me, at Karun apuri inom togop aret eerogo piinok, mippiyaamunggun o.

¹⁰ Ti eeke logomenggendik, tapi ngguunok nogo wonok ninom lambungge logowam nawooliya wuremenggenom enaame taati pi wage keenok, Karun apuri inom nen tapi anobak nogo ineenggi lebembunuk wonogwe iigak,

¹¹ an ninom lambungge logowam nawooliya wuremenggenom tu unggwogo logowam Naliku ALA nenggaanom taati nen tapi ti, warogo pumunggun o.

¹² Warogo pege logomenggendik, amiya ando keenggi paga woppunuk, an nake warogo kani kunggo logowam eyo owak mippugu irip-irip agi to eerogo pugu nogo paga labunogo pege logomenggendik, amiya nogo apit aret an nake warogo kani kunggo logowam abu'me time kilirogo pumunggun o.

¹³ Pege logomenggendik, tapi wariyak aan paga mendek amok inom, ogogun paga nabenak ape inom, apenggen imbirak amok inom, abok aret wagangge logomenggendik, kani kunggo logowam nogome kani kuniyak kwe,

¹⁴ tapi ngguunok eebe inom, agabolo inom, aanagale inom, nogo ti, wonok nawooliya owa'nagat wuremenggenom endekem time kani nawak nduk, kuni wundumunggun o. Ti eeriyak ti, inomaluk mbo nappikit nduk, nake wo'niriyak nogo ti aret.

¹⁵ Ti eeke logomenggendik, ndomba ngguunok ore nogo wonok wage keenok, Karun apuri inom nen ndomba anobak ti, ineenggi tebembunuk wonogwe iigak,

¹⁶ kat nen warogo pege logomenggendik, amiya waganogo an nake warogo kani kunggo logowam irip aru-ogwe, ambe agi-ogu, eyo nabenemenggendak paga abok aret werenogo pit namunggun o.

¹⁷ Ti eerogo punuk, ndomba eebe nogo mbanogo pege logomenggendik, aanagale inom, aawi mbanak inom, niyo paga koorogo punuk, anobak inom, ando mbanak inom, lambunogo pege logomenggendik,

¹⁸ eebe nogo abok aret kani kunggo logowam nogome kani kunumunggun o. Ti eeriyak nogo ti, Naliku ALA nake warogo kani kunggwi iinok, obari obeelom kage logonet, niniki ale'nggen kaakit nduk, eeriyak nogo ti aret.

¹⁹ Ti'nuk, ndomba ngguunok ore nogo waganogo pi wage keenok, aap Karun apuri inom nen ndomba ti, anobak ineenggi lebembunuk, wonogwe iigak,

²⁰ kat nen warogo pege logomenggendik, amiya ando waganogo aap Karun apuri inom inaruk irip abe paga labunogo piige, ineenggi iyagalo abe paga labunogo piige, iniyok iyagalo abe paga labunogo piige, eerogo piige logomenggendik, ndomba amiya nogo apit aret an Ala nake warogo kani kunggo logowam irip aru-ogwe, ambe agi-ogu eyo nabenemenggendak paga abok aret werenogo pumunggun o.

²¹ Ti eeppunuk, ndomba amiya kani kunggo logowam wonage nogo ambi wagangge, aap mippiigo logonet amburu kilippiigwi nogo mendek ambi wagangge, ee'nuk, aap Karun apuri inom inoba werenogo piige, inayum yirikak paga werenogo piige, eerumunggun o. Ti eeremenggendak nogo ti, aap Karun apuri ineebe inom, inayum inom, an neebe unde logonet abu leenak logowak nduk, eerumunggun o.

²² Ti eeke logomenggendik, ndomba nogo amok wagangge, ageewak amok inom wagangge, aan paga mendek amok wagangge, ogogun paga nabenak ape wagangge, apenggen imbirak amok inom wagangge, ndi, aap an Ala neebe unde mippiigwi iinok, ndomba ngguunok wariyak yi aret me, aawi abe'nggan kinik wagangge, ee'nuk,

²³ oroti worariyak inom, oroti amburu amok mbanogo punuk longgo warogo worariyak nogo inom, oroti tabak worariyak inom, Naliku ALA nake pugu oroti ragi inom pega'lek worariyak muun yarak me yonggoliyak nenggaanom paga logorak nogo ambitak mban waganogo

²⁴ aap Karun apuri inom ineenggi paga piige keenok, Yi Kaliku ALA kake o, yinuk, titik eerogo wo'nugwi nogo mendek it ndak-ndak aret titik eerogo wo'niruwak o.

²⁵ Ti eekwi iinok, Naliku an ALA obari abe kage logonet, niniki ale'nggen mbarikit nduk, ineenggime nen waganogo Naliku ALA nake warogo kani kunemenggendak nogo inom kani kunumunggun o.

²⁶ Ndi, it aap an Ala neebe unde mippiigo logonet, ndomba ape uruwak kenok, it aap mippiigwi unde ti kologo logogun me, aap Karun apuri inom an Ala neebe unde logowak nduk, mippiige logonet, ndomba ape uruwak mbaniyak ti, Yi Kaliku ALA kake o, yinuk, titik nege logomenggendik, kat aret kolaamunggun o.

²⁷ Ndi, aap Karun apuri inom an Ala neebe unde logowak nduk, mippiigo logonet, ndomba wariyak ape uruwak inom, aawi kiniyak inom, Yi Kaliku ALA kake o, yinuk, titik eerogo wo'nege aap Karun apuri inom koloorak nogo ti, togop aret nake nggomoorogo pumunggun o.

²⁸ Nake nggomoorogo puurak yokkigirak ti, it Iterali nen pi wogwe iinok, aap Karun apuri inom inake aret me, wogorogo logorak mondok-mondok koonogo pigirak me, it aakumi Iterali nen, At ninom lambunik logowok o, yinuk, Naliku ALA nake warogo wo'niri wogwe iinok, ape uruwak inom, aawi kinik inom, ti aap Karun apuri inom aret kologo logowak o.

²⁹ Ndi, at Karun ayum yirika leenak ti, at apuri an Ala neebe unde logowak nduk, mippiigwi iinok, yiriko logorak me, Karun apuri wiganak inake aret logowak o.

³⁰ Inogobamini inobaane'me an Ala neebe unde logowak nduk, mippiigwi iinok, yum ti, yirik logonet, an ninom lambungge logowam nawooliya wuremenggenom time aakumi inake eeri unggwogwe iigak, ne 7 aret age logowak o.

³¹ Karun apuri inom an Ala neebe unde logowak nduk, mippiige logonet, ndomba ngguunok wariyak eebe ti, waganogo nake pugwi iinok, lakak yuurak leenogo puurak nogome nen lake logomenggendik,

³² oroti muun yarak me yonggolemenggendak wonage nogo, ndomba warak eebe lariyak nogo inom wonok an ninom lambungge logowam nawooliya wuremenggenom tungga'nggi paga pi nage keenok, aap Karun apuri inom nen nonggo logowak o.

³³ Aap Karun apuri inom nake leenogo mippiigo logonet, ninom lambunik logowok nduk, nggami aanggo wakwi kwak nake warogo wo'niri wogo logorak mbanemenggaarak nogo ti, abu mage nake leenak lombok me, aakumi ugun noorak mage o. Ata, Karun apuri inom mban nonggo logowak o.

³⁴ Nonggo logomenggaarik, ndomba warak mbanemenggaarak nogo inom, oroti nogo inom, ndiinnaremenggerak kagak o aret weege kenok, ake pugun ti, abu mage nake leenak lombok me, noorak mage o. Ata, kani nawak nen apit aret kani kumbogo logowak o.

³⁵ Karun apuri inom an neebe unde logowak nduk, mippiyoorak wone lengganogo yokkigirak yi, eeppiige keegak, ne 7 aret aruwak o.

³⁶ Eeke logonet, aakumi inomaluk lek aruwak nduk, nake warogo wo'nugwi nogo mendek nggami aanggo wakwi kwak tapi ngguunok ambit mban warogo pit nage keegak, ne aa'nduk nen nok, ne 7 aret ari nawak o. Ti eeke logonet, kani kunggo logowam inom obeelom eerogo punuk, an nake leenak logowak nduk, amburu obaga kilirogo pumunggun o.

³⁷ Ndi, nggami aanggo wakwi kwak ne aa'nduk nen nok, ne 7 ti paga nake wariyak kani kunggo logowam abu mage lombok nggomoorak aruwak nen togop aret eeke keenok, kani kunggo logowam ti, abu mage nake leenak lombok aremenggerak me, aakumi nen ti mbaanggogwe iinok, it kunduk abu mage lombok aret ogo logogun o,” yinuk, yoreegerak.

Ko'lu-kii'me Ala ake warogo kani kunggo logorak wone

³⁸ Yoge nagagerik, ambinom yoge logonet, “O ne ambit weege paga ndomba mbere ndarak kagak tahun ambit eerak kenok, warogo kani kunggo logowam pogo logorak nogo yi aret.

³⁹ Ndomba ambi warogo kuubondendok nake pugwi, ndomba ambi warogo kiyoma nake pugwi,

⁴⁰ eeko logonet, kuubondendok ndomba warogo nake wo'nogo logonet, gandum yigirik abu obeelom 2 liter negen eyo tayitun anggen aambiranogo amburu toolak 1 liter inom, amok mbanogo pugu inom, eyo anggur amburu nake kilirogo puurak 1 liter negen toolak inom, pogo logowak o.

⁴¹ Ndi, ndomba kiyoma warogo wo'nogo logonet ti, an obari obeelom kage logonet, niniki ale'nggen kaakit nduk, kuubondendok lako logonet, gandum yigirik inom, anggur amburu inom, nake pemenggaarak nogo ndak-ndak inom aret Naliku ALA nake kani kunggo logowak o.

⁴² Kunggwi iigak, an ninom lambungge logonet, it ninom wone mbangge logorak me, it inapuri nda'narit namenggaarak inom mondok-mondok aret an ninom lambungge logowam nawooliya wuremenggenom tungga'nggi paga taati aret Naliku ALA nake warogo kani kunggo logowak o.

⁴³ Ndi, tungga'nggi paga taati aret it aakumi Iterali kunduk ninom lambuni wambi wage logogin o. Ninom lambuni wambi wage neenok, an abu tiyanak pi wo'nakwi ti paga o taati abu mage leenak lombok aret arigin o.

⁴⁴ Eeriminggirak ti paga an nen ninom lambungge logowam nawooliya wuremenggenom inom, nake kani kunggo logowam inom, mage lombok leenogo pege logominggirik, Karun apuri inom an neebe unde logowak nduk, leenogo piyaagin o.

⁴⁵ Eerogo piige logominggirik, an aakumi Iterali inenggela'me wonage, ndi, an nen inogoba Ala aret age, eeke logogin o.

⁴⁶ Inenggela'me wonage neenok, it nen, At Aliku ninogoba Ala nogo ninenggela'me logokit nduk, o Metit nen wo'niren wundi wagagerak kogo o, yinuk, ineenu arugun o. Naliku inogoba Ala an nen aret yagi o,” yinuk, yoreegerak.