Wundeegwaarak 22 - Ala Wone Peenok Peebi Mbanak

Yogoot waganggwi iinok, eeko logorak wone

¹ Yoge nagagerik, ambinom yoraawak nduk, yoge logonet, “Aap ambi nen aap alik ambi aanggo tapi a, ndomba a, kiraarogo onggo kunggolage, warogo nengge, eeke kenok, lembu ambit kumaaremenggerak nogo obaane'me lembu 5 aret wogoge, ndi, ndomba ambit kumaaremenggerak nogo obaane'me ndomba 4 aret wogoge, eeruwak o.

² Ndi, aap ambi nen yogoot kiraarikit nduk, aap ambi ame tu paake me, aap ambi nen kwaakkage logomenggerik, waremenggerak kangge kenok, at aap waremenggerak nogo ti, amiya eenggi paga logogin lek kwe,

³ o weeremenggerak paga waremenggerak kangge kenok perak, amiya at eenggi paga aret logogin o. Aap ambi nen aap alik amendek yogoot wagangge kenok, obaane'me awi yakkaawak o. Ndi, awi yariyak amendek lek kenok perak, aap ambi ayeloman age logomenggerik, at eebe onggo nggerenak wu nogo paga aap amendek kiraaremenggerak nogo, obaane'me awi yakkaawak o.

⁴ Ndi, lembu a, keledai a, kiraaremenggerak nogo eenik wonage me, kwaakkogwe iinok perak, at ambiret kiraaremenggerak kwe, obaane'me aanggumi mbere aret wogoruwak o.

⁵ Aap ambi nen aanggumi liirogon piirogo wonage lek we eraanggi teppiyamenggerak paga aap alik eyabu yarak mbi a, anggur a, nengge kenok, aap aanggo unde nogo nen mbi namenggerak kenok, obaane'me mbi iyaalok aret awi yakkage, ndi, anggur mbanogo namenggerak kenok, obaane'me anggen iyaalok yugu aret awi yakkage, eeruwak o.

⁶ Aap ambi eyabume iri'ngga takkani pemenggerak paga wiganinuk nage logonet, aap alik ambi eyabume mbato awo yarak a, abu kole mbaniyak nduk, eeke a, yi mendek ndi mendek yarak abok aret kani nen yaganogo pit nage kenok, at takkani pemenggerak nogo nen obaane'me awi yakkaawak o.

⁷ Aap ambi nen awu a, amendek a, oreeluk ambi porogo logowak nduk wogoremenggerak ame wonage me, aap alik ambi nen kote kumaake kenok, at aap kumaaremenggerak eebe kwaappunuk, ambiret kumaaremenggerak kwe, obaane'me mbere aret awi yakkaawak o.

⁸ Ndi, at aap kumaaremenggerak nogo aakumi nen inigen koolik kenok, aap ame pemenggerak nogo aap inowak loongga wonogwe me nage logomenggerik, Ala enegen wonage me, noreeluk amendek ti, an abu woolik aret o, yinuk, kumbuk mbanuwak o.

⁹ Ndi, aap ambi nen aanggo lembu a, keledai a, ndomba a, ayum a, amendek a, lek aremenggerak kwaarit nege logonet, amendek nogo aap ambi porogo wonage enegen kage logomenggerik, it imbirak nen, Yi an namendek, yi kat kamendek, yogo logonet, wone wariyak nduk eekwi iinok, inowak loonggo menggam inowak loonuwak nduk, piya nogwe iinok, inowak loongga nen, Kat aret kumaakendak o, yinuk, oba lenggengge kenok, ambiret kumaaremenggerak kwe, onggo mbere aret awi yakkaawak o.

¹⁰ Aap ambi nen aanggo keledai a, lembu a, ndomba a, aanggo alik mendek a, at oreeluk piirogo logowak nduk wogoremenggerak kangge kenok a, iyok kalok ari kenok a, aakumi inigen lek iigak, aap ambi nen kumaake kenok a,

¹¹ piirogo wonagaarak nogo nen aanggo unde nogo yoge logonet, at Aliku ALA enegen wonage me, an nen woolik aret o, yinuk, kumbuk mbangge kenok, at aanggo unde nogo nen, Abet aret kagi, yinuk, obaane'me awi ya'niru o, yoriyak lek o.

¹² Abet aret at nen kumaaremenggerak kin age kenok perak, aap porogo wonagaarak nogo nen at aanggo unde nogo obaane'me awi yakkaawak o.

¹³ Ndi, aanggo nogo nggeewo ta'ngge nen nibinogo namenggerak eyagate pugu nogo wonok at aanggo unde kaawak nduk, wogori wage kenok, Onggo awi ya'niru o, yinuk, yoriyak lek o.

¹⁴ Aap ambi oreeluk yoge logonet, An luulu kat kaanggo ti, porogo logokit o, yoremenggerak porogo wonage me, at aanggo nogo eebe kangge a, iyok kalok ari a, eeke kenok, at aanggo unde eebe lek kagak agaarak me, obaane'me awi yakkaawak o.

¹⁵ At aap aanggo unde nogo imbirak wonage kagak kangge kenok perak, obaane'me awi yakkoorak lek o. Ndi, luulu porogo logorak ti, onggo wogo'nuk wonok namenggerak maluk age kenok perak, Onggo abu pugu me, op aga o, yinuk, teppuwak o,” yoraawak nduk, yoreegerak.

Kwe tawe ambi maluk eeppugwi iinok, eeko logorak wone

¹⁶ Yoge nagagerik, wone ambinom yoraawak nduk, Muta yoge logonet, “Kolaga ambi aap miikka'lek awo tawe wonage me, aap ambi nen oone amburu ndik-ndik paga, Nimbirak nogo yuwok o, yinuk, imbirak nogo yege kenok, mbo puurak mage o. Awu aret punuk, at akwe mondok aret kolaawak o.

¹⁷ Ndi, at ogoba nen apuluk kolaga nogo, Aap ti wogoriyak mondok neebi o, ari kenok, komologwe aap inom lambungga'lek awo tawe iinok, inawu pogo mengga kwak, imbirak nogo yegerak onggo togop ndak-ndak aret puwak o.

¹⁸ Kwe ambi tili pagangga kenok, eenik logowak nduk teppuurak mage o.

¹⁹ Aap ambi nen wam-nggeewo kagak wuke, ndi, wam-nggeewo nen kwe wuke, eeke kenok, kambuwak nduk, mondok warogo puwak o.

²⁰ It aakumi nen Naliku an ALA mban nalut eeriyak kagak, kugi alut eeko logonet, ake warogo pugwi kenok, it ineebe mondok inoorogo piyaawak o,” yinuk, yoraawak nduk, yoreegerak.

Aakumi eekkoloorak meek kenok eeppiigo logorak wone

²¹ Yoge nagagerik, ambinom yoraawak nduk, yoge logonet, “It aa'nduk o Metit aap nggiru negen wonogwe iigak, eeppiigo nogogwaarak nogo ineenu me, aap nggiru ambi inenggela'me wonage kenok, inoone maluk yogwi, tebenogo pugwi, eeriyak mage o.

²² Ndi, kumi togwe inom, elege wonebela inom, iniki aaninggin wonogwe me, abunuk iniki aaninggin eeppiyoorak mage o.

²³ Iniki aaninggin eeppiyamenggaarak inoone nggwok paga an yo'nugwi iinok, an abet aret naruk konengge logominggirik,

²⁴ it inakuwi togwe piigwi, inapurilogwe wonebela ogwe, eeruwak nduk, nanini wu agan mi'nage logonet, nawooluwak paga inoori woraagin o.

²⁵ Aap ambi nen awu aap alik ambi wogoge logonet, An nawu wogogirak obaga lunogo peebi ambi inom wo'niruwak, mba'nuk wogoge menggi kwak, an napuri ineenggilek kagak, togop eeppiigo logorak mage o. Ata, Wogogirak yi mban wo'niruwak, mbake logonet, wogoge logowak o.

^26-27 Aap ambi nen oreeluk awu luulu woorak nduk, nggino yoge kenok, oreeluk nogo nen wu wogoge logonet, Kayum kolage logonet, obaane'me wu pegak wa'nok nduk kayum ti porogo logokit o, yinuk, wu wogoge logomenggerik, ayum porogo wonage kagak, oonegen kilu yi noorak ti mage o. Ata, ayum ambit ti paga togwi kenok, yikkolage, nogo yege, eeke menggerak me, mbet-mbet aret wogoriyak o. Mbet-mbet wogoga'lek elaambirik porogo wonage paga oone yo'nege kenok, an yi aap ndi aap inabuwa mbake minggirak me, aap ti abuwa mbake logonet, at oone aret konenigin o,” yinuk, yoraawak nduk, yoreegerak.

Wone eegu alitik-alitak eeko logorak yoreegerak wone

²⁸ Yoge nagagerik, Iterali yoraawak nduk, Muta ambinom yoge logonet, “At Ala miyuk-meya eerogo pugwi, aap inowe inarum menggerak nogo inoone maluk, Kambu o, yogwi, eeriyak mage o.

²⁹ It nen mbi iyaalok ndarak inom, amburu anggur iyaalok toolak inom, Yi Ala ake aret o, yinuk, pogo logomenggaarik, iname elaambirik porogo logorak mage o. Inapuri manggu ndarak nogo nake leenogo panugo logowak o.

³⁰ Manggu ndarak kenok, leenogo panugwi kwak, inaanggumi lembu-tapi inom, kambin-ndomba inom, inaagalogwe ndaka'lek me, iyaalok nda'nogwe iinok, inagalo inom iigak, ne 7 logonuk, ko'lu paga nake leenogo panugo logowak o.

³¹ It nen an namendek nake leenak logowak nduk, miirogo piyareegirak me, nggeewo ta'ngge nen inaanggumi ambi nibinogo pege kenok, it noorak ti mage o. Ata, it nggeewo nen aret nawak nduk, wogorogo logowak o,” yinuk, yoraawak nduk, yoreegerak.