Wundeegwaarak 20 - Ala Wone Peenok Peebi Mbanak

Ala nen wone 10 lengganogo pereegerak wone

¹ Ala nen eeko logorak wone yoragagerak nogo yi aret o.

² “Kit o Metit inayeloman agago pinaganuk tebembinagago wonogwe me, wokkiren wundi wagagirak Naliku kinogoba Ala an aret o.

³ An wonage neegak, nobaane'me kugiwak ambi mippunuk, alut eeko logorak mage o.

⁴ Kit nen yi mendek ndi mendek agi mbogut paga menggerak inom, nggween paga menggerak inom, nggween abu'me niyo inikime menggerak inom, inogut wakkagak ogobakkigirogo punuk,

⁵ wogoppiigo logonet, inabu'me tebe yi unggwogwe, inayuk wukwi, eeko logorak mage o. Naliku kinogoba Ala an nalik aret neegak, nobaane'me ambi mippunuk, ayuk wukwi kiinok, Neebi o, yinuk, nanini mbake minggirak me, yi aap ndi aap inanini nombako logonet, maluk eekwi nogo ti, it ineebe inom, inapuri inom, inombowologwe inom, it paga nen wiganak inom, an nen aaninggin inoba piige logogin kwe,

⁶ it yi aakumi ndi aakumi apit lombok an nabuwa nen, Yogop ee'nu ndogop ee'nu, wone yokkirage minggirak nogo liirogon konembunuk eekwi iinok perak, inombowologwe wiganak inom apit aret niniki kunik eeginake logogin o.

⁷ Naliku an kinogoba Ala nendage we ugun yuurak ti mage o. Aap ambi nen an nendage we ugun agan nege kenok, Naliku an ALA nen aap ti mondok maluk eeppigin o.

⁸ Nogo 6 yippunuk, ko'lu ti, nake leenak aret me, abeko logonip o.

⁹ Ne aa'nduk nen nok 6 paga ti, kineyabu eekkologwe, yi mendek ndi mendek ambi eeriyak kenok eekwi, eeko logorak op aret kwe,

¹⁰ ko'lu paga ti, Naliku an kinogoba Ala nake leenogo pateegirak me, kit inom, kinapuri kumi-aap inom, kinayeloman kumi-aap inom, kinaanggumi inom, aap nggiru ambi kiniya wogwe iinok inom, kit apit aret ne ti paga yi eekak ndi eekak eeko logorak mage o.

¹¹ Naliku an ALA nen mbogut-nggween inom, niyo inom, yi mendek ndi mendek abok aret wakkage neegak, ne 6 wonagagirik, ko'lu paga yonggonggolagagirak me, ko'lu ti, Naliku ALA nale'nggen mbake logonet, nake leenogo pateegirak o.

¹² Naliku an kinogoba Ala nen kinanggween wokkiraawam time logonet, li a'nuk kanggo logomunggup nduk, kinagalo-kinogoba inayuk wuko logonet, inoone liirogon konenggo logomunggup o.

¹³ Aap wariyak mage o.

¹⁴ Kumi ugun wurinaburak mage o.

¹⁵ Yi mendek ndi mendek yogoot kiraariyak mage o.

¹⁶ Kit kinore ambi eeremenggerak kinigen liirogon koolik kagak aap owak loongga pilit wone inom nabenogo yoroorak mage o.

¹⁷ Aap ambi awi wurik a, akweeluk a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbariyak mage o,” yinuk, wone ti abok aret at Ala nen aret yoragagerak.

Ala pegiya wambi woroorak inagabiti mbareegwaarak wone

¹⁸ It aakumi abok aret nen o yabok kunik-kunik pindanggage logonet, ngguurubu eeke nogo inigen kogwe, enggela'me trompet oone nggwok pu eeke nogo inaruk konenggwi, ndi, puurom paga ka'luk yarugu-parugu lagangge nogo inigen kogwe, eeko nogogwaarik, inagabiti nen inaganak wake mbareegi, tayorogon taati mi'ndak logonet,

¹⁹ Muta nogo yogwi, “Kat mban wone yo'niroorak koneniyak op aret kwe, at Ala nen yo'niroorak kenok ti, nit kambuurak aret me, at nen yo'niroorak mage o,” yinuk, yoreegwaarak.

²⁰ Yoreegwaarak kwe, Muta nen it yorage logonet, “At Ala nen, An inagabiti nombako logonet, maluk eerugun lek, mba'nuk, kinabut mbaniyak nduk kiya wagaarak me, kinagabiti mbarugup o.”

²¹ Yorage nagagerik, it aakumi Iterali nogo tayorogon taati mi'ndak iigak, at Muta alik aret ameraakot yumak-lumak aago Ala wonage me panggorogon taati aret ari nagagerak.

Alut eeko logorak yoragagerak wone

²² Ari nage mbareegi, Aliku ALA nen Muta yoge, “Kat nen it aakumi Iterali mendek wone yi yoret o. An Ala mbogut paga nen ari neegaarak nogo ti,

²³ an wonage neegak, mbuti perak mendek inom, mbuti emas mendek inom, nogo paga inagugi ogut ambi ogobakkigirogo patinuk, it an ninom lambumbunuk nalut eerugwaarik o.

²⁴ Ata, an nake warogo kani kunggak yuurak nduk nggween ambi waganogo ogobakkigirogo punuk, at paga kambin-ndomba inom, tapi inom, warogo nake kani kunggwi, ninom lambunuwok nduk, warogo an wo'nugwi, eeko logowak o. Ndi, an eeginabeegirak abeko logonet, nendage tiyappanugo logowak nduk, ogobakkigirogo pit namenggam nogome abok aret pegiinet nage logonet, nale'nggen inoba piinet nage logogin o.

²⁵ It an nake warogo kani kunggo logowam yugum paga wuko logonet kenok, mbuti tege paga nggaganogo punuk wuriyak kenok ti, wone mage yugu kagak taganogo punuk wuriyak me, ugun nggaganogo punuk wurugwaarik o. Ata, yugum nggaganak lek tumbu paga mban wuko logowak o.

²⁶ An nake warogo kani kunggo logorak owak nggorek wurik me, ya'na wuppunuk, lagi nogwe iinok, inakom kaanom iyookwak, owak nggorek wurugwaarik, yegerak, yoret o,” yinuk, yoreegerak.