Wundeegwaarak 18 - Ala Wone Peenok Peebi Mbanak

Yitoro Muta ka wagagerak wone

^1-6 At Muta apuri ineebe mbere ndaganabeegerak. Ambi aa'nduk nda'nage mbareegi, Muta nen ari logonet, “An aap nggiru nen inambik inanggween paga wage nagarik, naput yi ndakirak o,” yinuk, endage Nggeroton toongge, ndi, awuluk nda'nage mbareegi, Muta nen, “An nogoba ogoba Ala yeenggwa nege logonet, Pirawun nen nooriyak kwe, nagap ndareegerak o,” yinuk, endage Eliyetet toongge, eereegerak nogo inom, inagalo Tipora nogo inom, at ogoba Yitoro inom logowak nduk piya wage nagagerik, inom obeelom wonogwe iigak, Muta alik o Metit nagagerak me, Aliku ALA nen aakumi Iterali wogoren wundi wage logonet, Muta inom, Ala apuri aakumi Iterali mendek inom, eeppiyareegerak nogo abok aret at Muta aru aap Ala unde Miriyan mendek endage Yitoro nogo aruk konengge nagagerik, wone at Muta paga eerogo nappege logonet, “An nogo kat kakwe Tipora aagalogwe mbere inom wogoren kowagam wagi o,” yinuk, it apit aret wogoren at Muta karume Ala abuut paga awooliya wureegim nogome wonage me owagam wogogwaarak.

⁷ Owagam wogo mbareegwa, at Muta nogo awooliyana nen wundi nage nagagerik, Yitoro abu'me tebe yinuk, keyage warogo inagandin eyak mbambiinok, it inalitak lombok ineebe nonggop wonogwe nogo kin wogiinok awooliyana nogome wogoren unggwi wagagerak.

⁸ Unggwi wogogwaarak wonogwe me, at Aliku ALA nen it aakumi Iterali o Metit nen wundi nawak nduk, Pirawun aakumi Metit mendek inom eeppiige, ndi, aakumi Iterali tu paga wogo logonet, aaninggin inoba wonogwe iinok yeenggwaarage, eerit wagagerak nogo Muta nen liirogon mbininogo yoreegerak.

⁹ At Aliku ALA nen aakumi Iterali mendek obeelom eeppiige logonet, aap Metit ineenggime nen inagap ndareegerak wone nogo abok aret at Yitoro nogo konengge nagagerik, iniki ale'nggen ambik agagerak.

¹⁰ Iniki ale'nggen mbake logonet, “At Aliku ALA nen at Pirawun awuri Metit mendek inom ineenggime nen inagap ndake, ndi, aakumi Iterali it Metit mendek inabu'me tebembiinok wonogogwaarak nogo wondet eerogo piige, eekerak me, Aliku ALA, Wa! yinuk, alut eeki o.

¹¹ It aakumi Metit mendek iniki wogoppako logonet, aakumi Iterali eeppiigo mbareegwa, at Aliku ALA nen eeppiyareegerak ti paga, yi kugi ndi kugi inomaawi lek tebenak iigak, Aliku ALA alik mban omaawi ambik menggerak neenu agi o.”

¹² Ari nagagerik, ndomba ambi Ala ake warogo kani kungge, ndi, alik mendek ando inom Ala ake warogo wogoge, eeke mbareegi, at Karun inom, it aap Iterali yo'nggok inom, at Muta aru inom Ala enggaanom paga mbi nawak nduk, Yitoro ka wogo nogogwaarik, inom mbi nunggugwaarak.

Aap inowak loongga mippiyareegerak wone

¹³ Nogo yinuk, ko'lu at Muta nen aakumi Iterali inowak loonuwak nduk, at owagam mi'nari wogogwaarak nogo inenggela'me kwi'na'nuk, inowak loongge kagak, o kuubondendok nen nok-nok o kiip agagerak.

¹⁴ Inowak loongge nogo at Muta aru Yitoro nogo Muta nen aakumi Iterali eeppiinet nage enegen kage nagagerik, Muta yoge logonet, “Aakumi Iterali apit aret kat kalik mban kowagam mi'ndak iigak, o kuubondendok nen nok-nok o kiip age yi, nonggop nduk eeke agandik?”

¹⁵ Yoge mbareegi, at Muta nen aru nogo yoge, “It aakumi yi, Ala mbake menggerak nogo liirogon ineenu eeppiyaakit nduk, neya wogo menggaarak me,

¹⁶ ne ambi paga it inenggela'me nen wone ambi inoba agaatak wonok nowagam wogwe iinok, inawone koonogo piige, Ala nen yoragagerak wone lengganak inom, ndi, eeko logorak wone yugu inom, yorage, eeke minggirak o.”

¹⁷ Yoge mbareegi, at Muta aru Yitoro nogo nen Muta yoge logonet, “Kat togop eeke ti, aaninggin aret eeke keegi o.

¹⁸ Kat eeke ti, aaninggin ambik me, kalik nen mban aakumi inawone amburu mbangge logonet, it aakumi kinom ta'liila eekkinake kagak eekwi ti, kalik eeke logorak meek aret me,

¹⁹ Ala kimbirak logonet, eeriyak ambi yokkirikit nduk, karuk konengge logot o. Aakumi inoone wonok Ala owagam nage logonok nduk, inenggela'me mi'ndak logonet, wone ambi inoba agaatak kenok, Ala yoge,

²⁰ wone lengganak inom, it eeko logorak wone yugu inom, abok aret mamuninake, ndi, ineenik logonet, inobaabut logorak inom, eerit nogo logorak inom, koonogo piige, eeke ti op aret kwe,

²¹ yeenggwa kugo logowak nduk, it aakumi inanebunu lombok inenggela'me nen aap ineebe wone koongga kenok, Ala inagabiti mbaka kenok, wone yo'nuk, Abet aret eerigin, mbaka kenok, iniki yanggo yuwak nduk, wu wogogaatak waganggeelik kenok, leenogo piige logomenggendik, at ambi nen aakumi ineebe seribu unde logowak nduk mippege, at ambi nen aakumi ineebe 100 unde logowak nduk mippege, at ambi nen aakumi ineebe 50 unde logowak nduk mippege, at ambi nen aakumi ineebe 10 unde logowak nduk mippege, eeru o.

²² Togop eeremenggendak me, it nen ko'lu-kii'me inowak loonggo logonet, wone teeluk kenok, inalik nen koonogo piigwi, ndi, wone aaninggin kenok, kat nen inowak loonenok nduk, kowagam wogwe, eekwi iinok, it kinom aret eekwi paga teeluk aret age kaamunggun o.

²³ At Ala nen, Yogop eeru o, yokkege kagak, inowak looninake me, yabu nogo aaninggin lek teeluk aret eeke keenok, iniki ale'nggen mbakak iname aret nogo logogun o,” yinuk, yoreegerak.

²⁴ Yoge mbareegi, at Muta nen aru Yitoro nen yoreegerak nogo konembunuk ndak-ndak aret eereegerak.

²⁵ Eeke logonet, aakumi Iterali inenggela'me nen aap wone op koongga kero, yanggigik-ndanggigik eeppiinok, leenogo piige nagagerik, ambi ineebe seribu unde logowak nduk mippege, ambi ineebe 100 unde logowak nduk mippege, ambi ineebe 50 unde logowak nduk mippege, ndi, ambi ineebe 10 unde logowak nduk mippege, eereegerak.

²⁶ Eeke mbareegi, inarum kumogotak lombok logonet, ko'lu-kii'me inowak loonggo logonet, wone teeluk kenok inalik nen koonogo piigwi, ndi, aaninggin kenok, Muta owagam wogoren wogwe, eeko nogogwaarak.

²⁷ Ti eeriyak yoreegerak nogo abu aret eeke nagagerik, aru Yitoro nogo ame iyokan nawak nduk, nappege mbareegi, aret nagagerak.