Wundeegwaarak 17 - Ala Wone Peenok Peebi Mbanak

Niyo yugum enoona nen wundi wagagerak wone

¹ It aakumi Iterali wogwe nogo abok aret o Tin karume nogome mbo punuk, at Aliku ALA nen yoragagerak ndak-ndak o ambime nen ambime agak wogo logonet, o Arapirim Meriba nogome ari wogo nogogwaarik, inawooliya wukko'net wogogwaarak kwe, o taati nogo niyo lek me, abu aret wonogogwaarak.

² Niyo abu aganake mbareegi, ineebi nen Muta inoone yi-wu yogo logonet, “Nit niyo noorak nduk ambi wo'niret o.” Yogo mbareegwa, at Muta nen it yorage, “Kit kinoone yi-wu yo'nugwi, ndi, at Aliku ALA nogo abut mbanggwi, eekwi ti, nonggop nduk eeko ogotik?”

³ Yoragagerak kwe, it aakumi nogo niyo abu lombok eeginabeegerak me, Muta ineebi-ineeba yogo logonet, “Ninapurilogwe inom, ninaanggumi inom, niyo abu nen aret kambuurak kagak, nonggop nduk o Metit nen wo'niren wundi wagandak?”

⁴ Yogo mbareegwa, Muta nen Aliku ALA yoge, “It aakumi yi, yugum paga nooriyak eekwi me, it inake an nonggop eeppiya o?”

^5-6 Yoge mbareegi, at Aliku ALA nen Muta yoge, “Kat kowaanggun niyo Nin wareegindak nogo wagangge logomenggendik, it aap yo'nggok Iterali mendek wogoren aakumi Iterali peebi eeppiigak, kinaa'nduk o Korep yugum kole wonage me nogome nogo logomonggotik, an yugum irimbaga taati neegak, niyo kilak togon wungge kenok, aakumi nawak nduk, yugum ti wari nak o.” Yoge mbareegi, nogo nogogwaarik, at Muta nen aakumi Iterali yo'nggok inigen iigak, yoreegerak nogo ndak-ndak aret eeke mbareegi, niyo nogo nunggugwaarak.

⁷ Ndi, it aakumi Iterali nen, “O ya'i at Aliku ALA ninenggela'me abet aret wonage ilik, lek a?” yinuk, inoone yi-wu yogwi, Aliku ALA abut mbanggwi, eereegwaarak me, o nogo endage Mata-Meriba tooneegwaarak.

Amalek inom wim nambureegwaarak wone

⁸ It aakumi Iterali nogo o Arapirim nogome wonogwe me, aakumi Amalek mendek nen inom wim namburiyak nduk wogogwaarak.

⁹ Wogo mbareegwa, at Muta nen Yotuwa yoge, “An ko'lu Ala owaanggun nogo neenggime porogo puut paga mi'ndak neegak, aap Amalek kinom wim nambuko logobagip nduk, aap leenogo piyet o.”

¹⁰ Yoreegerak nogo eeke nagagerik, Muta yoreegerak nogo ndak-ndak at Yotuwa nen it aakumi Amalek inom wim nambuke kagak, Muta inom, Karun inom, Kut inom, puut kirin paga lagi nogo nogogwaarik,

¹¹ Muta nogo mi'ndak eenggi tiyapporogo kagak, it aakumi Iterali nen Amalek mendek inoorit nogwe, ndi, eenggi tebeppege kenok, it Amalek mendek nen Iterali mendek inoorit wogwe,

¹² togop eekwi iigak, at Muta obaak tayok ari mbareegi, Karun Kut imbirak yugum ambi waganogo at Muta yugum nogo paga kwippunuk, Karun nen eenggi abeenok pigagangge, ndi, Kut nen eenggi abeenok paga pigagangge, eeppunuk tiyapporogo nu'lek wonogwe iigak, oonegen aret kilu yi nagagerak.

¹³ Ti eereegwaarak paga at Yotuwa nen yigin-tege paga it Amalek mendek nogo mondok inoorit nagagarak.

¹⁴ Inooke mbareegi, at Aliku ALA nen Muta yoge, “An nen eeppiyaminggirak paga yi aakumi ndi aakumi o nggween paga yime wonogwe nogo abok nen, It aakumi Amalek mendek arop ambi inanobak ki wonogwe yi o, yinuk, yogo logogun lek me, yogondak eerogo piigirak nogo mondok-mondok aberak logobagip nduk, mbuku paga liiru mbangge, ndi, at Yotuwa aruk paga pege, eeru o,” yoreegerak.

^15-16 Yoge mbareegi, at Muta nen, “Aliku ALA wone lenggenogo yorage menggim ndak-ndak nineenggi nippunuk, wonogwe niigak, yeenggwa niragaarak me, ake warogo kani kunggak eeruwok nduk, yugum logonogo punuk, endage ti, Nineegin Tiyak Yigi o, yinuk, ndiimbu yirik nogo mengga kwak at Aliku ALA aret o,” yinuk, toongge nagagerik, “Aliku ALA nen aap Amalek mendek nda'narit nogwe nogo inom mondok-mondok wim mbanak logogin o,” yinuk, yereegerak.