Wundeegwaarak 14 - Ala Wone Peenok Peebi Mbanak

Pirawun awuri inom nen Iterali muguren wogogwaarak wone

^1-2 Ti'nuk, at Aliku ALA nen Muta yoge, “Aakumi Iterali ti, iniyokan yungguninuk nogo logomenggaarik, o Migoron iru kagak, niyo nggwok yenggenak Laut Merah ogwe kagak, o Mba'an-Tepon agi pa'nggwe kagak o Pi-Kakirot koorok yi aa'nggi paga taati ooliya wuri nawak nduk yoret o.

³ At Pirawun nen, Aakumi Iterali togop eeko agaarik o, yinuk, yogwe nogo aruk konengge logomenggerik, It aakumi Iterali tu kobak ogo nagaarik, o karume time ku'mbanak agaarik o, mba'nuk, kit mukkiren woraawak nduk

⁴ an nen Pirawun iniki omaawi eerogo pigin o. Iniki omaawi eerogo piminggirak paga kit mukkiren wogwe iinok, an tiyanak minggirak nogo nen at Pirawun awuri ineegin warak inom ambi eeppiige neenok, it aakumi Metit mendek nen Naliku ALA an aret ineenu arugun o,” yinuk, yoge mbareegi, Muta yoreegerak nogo it aakumi Iterali mendek nogo nen ndak-ndak aret eereegwaarak.

⁵ Eeko mbareegwa, it aakumi Metit mendek nen, “It aakumi Iterali o Metit mbo punuk, mbaganit nogo agaarik o,” yinuk, aap Metit mendek endagembogut Pirawun nogo yogo mbareegwa, at Pirawun inom, awuri wone koongga inom, iniki alik koonggo nogogwaarik, yogo logonet, “Nit ninayeloman tebembiirogo monggoorak nogo, nawak nduk nonggop nduk teppiigo o?”

^6-8 Yogo nogogwaarik, it aakumi Iterali mendek nen, “At Ala ninarum wonage o,” yinuk, o Metit nen wundi wogwe nogo muguren woraawak nduk, at Aliku ALA nen Pirawun iniki omaawi eerogo pege mbareegi, at Pirawun nen at anggweendo pipuk eerogo pege, at awuri ineegin warak nogo kuwak eerogo piige, eeke nagagerik, yi nggweendo ndi nggweendo wim eeka o Metit wonogwe nogo inom, nggweendo wim eeka abu obeelom enam ratus kuli it yigin unde inoweewi inalitak Lombok wonok nugu menggaarak nogo inom, abok aret li'luk ee'nuk Iterali muguren wogogwaarak.

⁹ At Pirawun anggweendo inom, kuda nggweendo wim eeka nikkenok nogwe inom, wonok nega aap ineebe inom, nggween paga nogwe inom, it aap wim eeka Metit mendek abok aret it Iterali mendek nogo, niyo yenggenak ambet paga o Mba'an-Tepon eraanu o Pi-Kakirot koorok time aret inawooliya wuppunuk wonogwe me, taati aret panggo yi wogogwaarak.

¹⁰ Panggo yi wogo mbareegwa, it aakumi Iterali mendek ina na'nogo nogogwaarik, aakumi Metit mendek muguren inowagam panggo yi wogo mbareegwa, inagabiti nen inoone nggwok paga Aliku ALA yoreegwaarak.

¹¹ Yogo nogogwaarik, Muta yogwi, “Nonggop eeppinaniyak nduk, o Metit nen wo'niren wundi wagandak? O Metit nggween taambinaniyak lek kenok, o karume yime kambuwok nduk, wo'niren wagandak ya?

¹² It aakumi Metit mendek inayeloman logonet, ineyabu eeko logorak op aret me, teppinanu o, yinuk, o Metit logonet, yokkogo nogogurak nogo lek a? Nit aakumi Metit mendek ineyabu eeppiigo logorak op aret kagak, karume yime kambuwok nduk, wo'niren wagandak keego o,” yinuk, yoreegwaarak.

¹³ Yogo mbareegwa, Muta nen it yorage logonet, “At Aliku ALA nen nonggop agago kinagap ndarigin nogo yogondak aret kinigen kaamunggup me, kinagabiti mbaka'lek kiniki kwippunuk logonip o. It aakumi Metit mendek yogondak kinigen iigwi ti, peebi nen kinigen iyaamunggup mondok lek o.

¹⁴ At Aliku ALA nen kinake wim eerigin me, kit we kinoone lek puk mban aret logonip o,” yoragagerak.

Niyo mogoneegerak paga Iterali wunda wogogwaarak wone

¹⁵ Yorage mbareegi, at Aliku ALA nen Muta yoge, “Kat koone nabenak mban nonggop nduk yo'nege agandik? It aakumi Iterali ti, nawak nduk, yoret o.

¹⁶ Yorage logomenggendik, niyo nggwok yenggenak laut yi mogonna'nuk, nggween woloonak kin aremenggerak paga it aakumi Iterali wunda nawak nduk, kowaanggun keenggime wagangge logomenggendik, niyo nogo paga keenggi titik iru o.

¹⁷ Titik ige keenok, niyo mogonnaremenggerak paga aakumi Iterali wunda nogwe me, it Metit mendek muguren wunda nawak nduk, iniki omaawi eerogo piyaminggirak paga muguren wunda nogwe iinok, Pirawun anggweendo inom, it nggweendo wim eeka kuda paga punuk, wonok nogwe ineebe nogo inom, an ambi eeppiige neenok, it Pirawun awuri yigin unde menggerak inom abok aret, Ala wi! yinuk, nendage tiyappugun o.

¹⁸ At Pirawun awuri inom, anggweendo inom, it nggweendo kuda paga punuk wonok nega ineebe inom, an nendage tiyappanuwak nduk eeppiige neenok, it aakumi Metit mendek nen, Naliku ALA aret, ineenu ogo logonet, nendage tiyappugun o,” yinuk, yoreegerak.

¹⁹ Yoge mbareegi, ti'nuk, it aakumi Iterali ineegin warak wogwe iigak, Ala ayonggo malayikat aa'nduk wage nogo inambokan ari nage, ndi, ndugwi aa'nduk wage nagagerak nogo kunduk Iterali inambokan ari nage, eeko nogogwaarik,

²⁰ it Metit mendek ineegin warak inom, aakumi Iterali ineegin warak inom, oolo ogoorogo piinok, wonage logonet, it Metit mendek wonogwe me, o apit eerogo pege, ndi, it Iterali wonogwe me, o eya eerogo pege, eereegerak me, oonikiya paga it ambi nen it ambi inowagam wagak eeka'lek aret wonogogwaarak.

²¹ Togop eerak wonogwe iigak, at Muta nogo nen niyo nggwok Yenggenak laut nogo paga eenggi titik eeke mbareegi, at Aliku ALA nen o wiya oonegen lagi wage menggim pa'nggwe nen nappi wagagerak omaawi nabuninuk wage logonet, oonikiya ti paga niyo laut nogo oolo mogonogo nggween kin eeppunuk, woloonogo pereegerak.

²² Ndi, niyo mogonak nogo agi-ogu yagat wurik pogom eeppunuk wonage kagak, aakumi Iterali mendek nogo nggween woloonak paga aret wunda wogogwaarak.

²³ Wunda wogwe iigak, it aap Pirawun anggweendo wim eeka kuda paga punuk wonok wogwe inom, it aap nggweendo wim eeka wonok wogwe ineebe inom, it aap kuda paga yarugu wogwe inom, it aap ineegin warak Metit mendek abok aret aakumi Iterali inambokan muguren nok-nok niyo oolome aret unggwi wogo mbareegwa,

²⁴ kuubondendok towe oone awo ari kagak, at Aliku ALA ndi wuninik ndugwi enggela'me wonage nogo nen ena wu'nage logonet, aap ineegin warak Metit mendek Iterali muguren wogwe enegen iige nagagerik, inaganak waganogo piige,

²⁵ inanggweendo nogo iyok nomonogo piige mbareegi, purok me yobo-yobo wambeegwaarak me, noorak meek age, eeke mbareegi, it Metit mendek nen, “At Aliku ALA nen Iterali inom a'nuk, ninooke me, mbo piinok, mbaganuwi o,” yereegwaarak.

²⁶ Yogwe iigak, at Aliku ALA nen Muta yoge logonet, “Niyo nogo obaane'me lambunggage logonet, aakumi Metit mendek inom, inanggweendo wim eeka inom, nggweendo kuda paga punuk wonok nega ineebe inom, abok aret ndonggoninabuwak nduk, keenggi niyo paga titik iru o.”

²⁷ Yoge mbareegi, at Muta nogo nen niyo ogumbaga eenggi titik ege nagagerik, o weege kagak niyo mogonik wonagagerak nogo lambunggage mbareegi, it aakumi Metit mendek nogo mbaganit nawok nduk, eereegwaarak mendek, Aliku ALA nen niyo inikime tebenogo piyareegerak.

²⁸ Tebenogo piige logonet, inanggweendo wim eeka inom, nggweendo wonok nugwi ineebe inom, it ineegin warak Metit mendek nen it Iterali mendek muguren wogogwaarak nogo abok aret ambit-ambi teppiyoolik tigitogon aret niyo ndonggoninabeegerak.

²⁹ It nogo abok aret niyo ndonggoninabeegerak kwe, Iterali nogo perak, niyo agi-ogu yagat wurik pogom wonage kagak, nggween woloonak paga wunda wogogwaarak.

³⁰ Ne ti eyom paga at Aliku ALA nen aakumi Iterali nogo it Metit mendek ineenggime nen inagap ndarogo piyareegerak wonogo logonet, it Metit mendek ineebe kambit nogogwaarak niyo aa'nggi paga wumbiinet wagagerak wonogwe iyareegwaarak.

³¹ It aakumi Iterali mendek nen Aliku ALA omaawi paga it Metit mendek eeginabeegerak nogo iigo nogogwaarik, Aliku ALA ayuk wuko logonet, at Aliku ALA inom, ayeloman Muta nogo inom, inoone abet mbareegwaarak.