Wundeegwaarak 13 - Ala Wone Peenok Peebi Mbanak

Manggu nda'nogwe iinok, Ala wogogo logorak wone

^1-2 Wogoren wundi wage logonet, at Aliku ALA nen Muta yoge, “Aakumi Iterali inapurilogwe aap manggu nda'nogwe, inaanggumi ndugum ndaka'lek me, iyaalok ngguunok nda'nogwe, eekwi iinok ti, an namendek me, an nake mondok-mondok leenogo panugo logomunggup o,” yinuk, yoreegerak.

Oroti piika'lek mendek laago lakwi wone

³ Yoge mbareegi, at Muta nen it aakumi Iterali yorage, “Kit aakumi Metit mendek inayeloman eerak wonogwe me nen ne yi paga aret Aliku ALA eenggi omaawi paga wokkiren wundi woramenggerak me, ne yi paga ari wage kenok, abeko logonet, laago nggwok aret lako logomunggup o. Lako logonet, oroti piiruwak nduk, pogo menggaarak ragi nogo yi mendek ndi mendek enggela'me punuk, amok mbanogo nonggo logorak mage o.

⁴ Tut yogondak iyaalok Abip penenak yi paga aret o Metit mbo punuk, wundi namunggup o.

⁵ Wundi nogwe me, at Aliku ALA nen wokkiren it aakumi Kanan mendek inom, Ket mendek inom, Amori mendek inom, Kewi mendek inom, Yebut mendek inom, wonogo menggam yilak amburu inom, nggiin amburu inom, niyo eneeri negen kila-kila wungge menggim kinombomini wogoraagin o, yinuk, kumbuk mbanogo yoragagim nogome pinagi namenggerak wonogo logonet, tut yi peneni wage kenok, laago yi, lariyak abeko logonet,

⁶ oroti piiruwak nduk, ragi pega'lek kagak larogo nenet nogwe kiigak, ne aa'nduk nen nok

⁷ aret ari nagin me, irip paga ti, Aliku ALA alut eeko logonet, kinale'nggen paga laago nggwok lako logomunggup o. 7 Oroti piiruwak nduk ragi pega'lek nenet nogwe kiigak, ne 7 eeriyak me, oroti piiruwak nduk, ragi pogo menggaarak nogo mendek kineenggime inom, kiname inom, porogo logubok o.

⁸ Laago ti, lako logonet, kinapurilogwe aap ndarak kenok, yorogo logonet, Nit o Metit wonogwe me, at Aliku ALA nen ne yi paga wumbinani wagagerak kenok, eeko ogoorik o, yinuk, mbininogo yorogo logonu o.

⁹ At Aliku ALA eenggi omaawi paga kit o Metit nen wokkiren wundi wagagerak kenok, laago yi lako logorak me, at Aliku ALA nen, eeko logorak wone lengganogo yokkiragagerak kinikime mondok-mondok porogo logorak yereegerak aberak logomunggup nduk, kineenggi paga inom, kinenggaawak paga inom, ligi negen te'mulunik aret logowak o.

¹⁰ Ndi, eekak yuurak wone lengganak yi, yi tahun ndi tahun wage paga, Ndiyom paga eeko logorak, wone yugu nogo mondok-mondok eeko logomunggup o,” yinuk, yoragagerak.

Wologwe manggu nda'nogwe iinok, eeko logorak wone

¹¹ Yorage nagagerik, ambinom yorage logonet, “Kit kinombomini kinom aakumi Kanan mendek inanggween wokkiraagin o, yinuk, Ala nen kumbuk mbanogo yokkiragagim nogome at Aliku ALA nen wokkiren pinagi nage logomenggerik, unde logomunggup nduk, wokkirage kenok, time logonet,

¹² kit apit aret kinapuri aap manggu nda'nogwe iinok, kinaanggumi anebunu lombok abok aret inaagalogwe iyaalok ngguunok nda'nogwe iinok, ti at Aliku ALA amendek me, at ake aret leenogo piigo logomunggup o.

¹³ Ndi, kinaanggumi keledai aagaluk ndaka'lek me aa'nduk nda'nage kenok obaane'me ndomba aagaluk aret leenogo pugwi, ndi, ndomba wogoriyak lek kenok, keledai aagaluk nogo enggaanok kogonogo pugwi, eeko logomunggup o. Togop eeriyak kwe, it aap manggu nda'nogwe iinok perak, inobaane'me Aliku ALA ake wu aret pogo logomunggup o.

^14-15 Ndi, peebi ne ambi paga kinapuri nen, Kit eekwi yi, wone eebe ngge nduk eeko ogotik? Yokkirogwe iinok, kit nen yorogo logonet, At Pirawun iniki omaawi logonet nit wundi woraawok nduk, teppinaniyak eebi mbake nagagerik, pippinanogo wonage mbareegi, Aliku ALA nen aakumi Metit mendek inapuri manggu ndarak inom, inaanggumi ndaka'lek me aa'nduk ndarak inom, inooke nagagerik, eenggi omaawi paga o Metit nen wo'niren wundi wagagerak kenok, ninaanggo ndaka'lek iyaalok lombok nda'nogwe iinok, at Aliku ALA ake leenogo pugwi, ndi, ninapuri aap manggu ndarak Aliku ALA wogoriyak ineebi mbakwi iinok, inobaane'me wu aret pugwi, eeko monggoorak o.

¹⁶ Yi eekwi nogo ti, at Aliku ALA eenggi omaawi paga o Metit nen wo'niren wundi wagagerak nogo nineenu agak mendek aberak logowok nduk, nineenggi paga inom, ninenggaawak paga inom, ligi negen te'mulunogo pogo ogoorik o, yinuk, yorogo logonu o,” yoragagerak.

Ala nen ndugwi paga inom, ndi eya paga inom, wogoren wagagerak wone

¹⁷ At Pirawun nen Iterali mendek woraawak nduk teppiige mbareegi, Ala iniki mbake logonet, “Napuri Iterali yi, inawim nen inooriyak eekwi iinok, Ninooriyak kagak wogoorak nineebi o, yinuk, iniyokan yungguninuk o Metit nookwak me,” yinuk, aakumi Pilitin mendek wonogwe me, tu koorok ti paga wogoren noolik.

¹⁸ Ata, tu karume time wangge'nuk niyo nggwok yenggenak Laut Merah nogo ambet paga ari nogogwaarak. Ndi, it aap Iterali mendek nogo o Metit nen wundi wogo logonet, wim eeriyak nduk, yigin-maale li'luk ee'nuk nogo mengga kwak togop aret ee'nuk wundi wogogwaarak.

¹⁹ O maan Yutup nen it aap Iterali apurilogwe wone lengganogo yorage logonet, “Ala nen abet aret wokkiren o Kanan pinagi nagin me, wokkiren nage kenok, an nowak nenenak wonok namunggup nduk, kumbuk mbaninip o.” Yorage mbareegi, kumbuk mbaneegwaarak me, at Muta o Kanan wage logonet, Yutup owak nenenak nogo inom wonok wagagerak.

²⁰ It aakumi Iterali nogo o Tukot mbo punuk, o Etam karume ambet paga time aret inawooliya wukkola wogogwaarak.

²¹ Wogwe iigak, at Aliku ALA nogo aa'nduk a'nuk, o liingge kenok, ndugwi paga mugurok wogo logowak nduk mippege, o kiip age kenok, ndi eya paga wogo logowak nduk, ndi wuninogo mippege, eereegerak paga aakumi Iterali nogo liingge-oonikiya aret wogo nogogwaarak.

²² O liingge paga ndugwi mippege, oonikiya paga ndi wuninogo pege, eereegerak nogo mondok-mondok enaame paga wonage kagak, wundi wogo nogogwaarak.