Wundeegwaarak 12 - Ala Wone Peenok Peebi Mbanak

Amiya tungga paga labunik kenok obaga mbo nagagerak wone

¹ At Aliku ALA nen Muta Karun imbirak o Metit wonogwe me yorage logonet,

² “Yi tahun ndi tahun wage paga tut yi penengge kenok, Tahun ngget mendek aret unggwi waga o, yinuk, abeko logomunggup o.

³ It Iterali wonogwe abok aret yoroorak nogo yi aret. Tut yi tanggal 10 paga it aap Iterali inalitik-inalitak inaaganapuri wonogwe nogo ineebe noorak ndak-ndak ndomba aagaluk ambitak mban wappunuk, inapurilogwe inom nunggwi,

⁴ ndi, ineebe mbereeluk mban wonogwe me ndomba ambit warak nogo inalik tigitogon noorak meek kenok, it inawi koorok wonogwe nogo ineebe liippiinok, ndomba noorak ndak-ndak kenok, inom lambumbunuk, warogo nunggwi, eeko logowak o. Ndomba wariyak nogo ti, aakumi ineebe linggimbunuk, noorak ndak-ndak mban wako logowak o.

⁵ Ndi, wariyak nogo ti, ndomba a, kambin a, aagaluk leenogo punuk, op wariyak kwe, ngguunok inawinde-inobaande eerak lek amuni mbanak ndarak iigak, tahun ambit eerak kenok mban leenogo

⁶ inanggenogona piinok, tanggal 14 paga oonegen kilu yi nage kenok, it aakumi Iterali wonogwe abok aret ne ambit ti paga wako logomenggaarik,

⁷ amiya ando waganogo ndomba warogo nawam o nogome abok tunggambe abeenok-abeenok paga inom, tunggambe irimbaga inom, labunogo punuk,

⁸ oonikiya ti paga aret enggaanggum kani paga worarogo nonggo logonet, mbiingga ale mendek inom, oroti piiruwak nduk ragi pega'lek kagak worarak mendek inom, nonggo logowak o.

⁹ Enggaanggum wora'naga'lek ki kagak nunggwi, niyo paga larogo nunggwi, ti eerugwaarik o. Ata, anobak inom, inikime mendek inom, iyogobit inom, eebe apit enaani aret worarogo nonggo logowak o.

¹⁰ Ndi, ko'lu nawak nduk, ando teppugwaarik o. Ata, ando mbanak awo nengga'lek iigak, o aret weege kenok, irip-ando mbanak apit enaani aret kani kunuwak o.

¹¹ Ndomba aagaluk warogo noorak nogo ti, Naliku an ALA nen amiya labunik kenok, iname obaga mbo naakit nduk, lariyak aret me, lako logonet, iniyok ogut yirikkologwe, inagabee'le mbam nggerenggologwe, inowaanggun ineenggime waganggwi, eeppunuk, mondok li'luk eerak logonet, ineyak tagana'lek mbet-mbet togon nonggo logowak o.

¹² Ti eekwi wonogwe iigak, Naliku ALA an aret me, oonikiya ti paga o Metit irip-irip abok aret nage logonet, aakumi Metit mendek inapuri manggu ndarak inom, inaanggumi aa'nduk ndarak inom, abok aret inooke, inagugi abok aret inomaawi lek eerogo piige, eerigin o.

¹³ Inoorit nage logonet kwe, it an napuri Iterali perak, an neenu agak amiya iname paga labunik nenegen kage logominggirik, inooka'lek iname obaga mbo nanuk aakumi Metit mendek mban inoorit nagin o.

¹⁴ An eeriminggirak yi eyom paga it mondok-mondok abeko logowak nduk, leenogo pigin me, yi tahun ndi tahun paga ne yi abeko logonet, it inom, inapurilogwe-inombowologwe nda'narit namenggaarak inom, Naliku ALA nalut eeriyak nduk, inale'nggen nen laago nggwok lako logowak o.

¹⁵ Ndi, oroti piika'lek mendek nogo mban nunggwi iigak, ne 7 logorak me, aap ambit-ambi nen ne aa'nduk nen nok ne 7 kuli ti paga oroti piiruwak nduk, ragi nogo yi mendek ndi mendek inom punuk nengge kenok, it aakumi Iterali inenggela'me nen aap ti enggaawak lek eerogo puurak me, ne iyaalok laago lariyak paga nen oroti pike menggerak mendek iname wonage ti abok aret mbo pogo logowak o.

¹⁶ Ne iyaalok paga inom, ne 7 paga inom, nogo ti, kuwak eeppunuk, nalut eeriyak nduk, an nake leenogo patigin me, ne aa'nduk paga nen nok, 7 ti kuli paga ineyabu ambi eeriyak mondok mage o. Ata, inambi noorak mban pipuk eerogo pako logowak o.

¹⁷ An nen ne yi paga inawuri lombok leenak o Metit nen wogoren wundi naminggirak me, Ne yi paga it inapuri-inombowologwe nda'narit namenggaarak inom mondok-mondok inale'nggen nen lako logorak inake koonogo pigirak yi, tahun ambi eekak eerit nogo logonet, laago endage oroti Piika'lek Mendek nogo ne yi paga aret inale'nggen nen lako logowak o.

¹⁸ Lako logonet, tut aa'nduk penenak tanggal 14 kiyoma paga nen nok, tanggal 21 o kiyoma ti paga kuli, oroti piiruwak nduk, ragi pega'lek kagak worarogo nonggo logowak o.

¹⁹ Oroti piiruwak nduk, pugwi ragi nogo ti, ne aa'nduk nen nok ne 7 kuli ti paga iname porogo logorak mondok mage o. Aap ambit-ambi aworak a, nggiru a, oroti piiruwak nduk, ragi nogo yi mendek ndi mendek inom punuk, worarogo nengge kenok, it Iterali inenggela'me nen aap ti enggaawak lek eerogo pogo logowak o.

²⁰ It mendek o yime ndime wonogwe abok aret oroti piiruwak Nduk ragi nogo yi mendek ndi mendek inom punuk, nenggelak-kenggelak aago kenok nagwaarik o. Ata, ragi inom pugu lek worarak kenok mban nonggo logowak, yegerak, yoret o,” yinuk, yoragagerak.

Obaga mbo nagagerak kenok laago aa'nduk lareegwaarak wone

²¹ Yorage mbareegi, at Muta nen it aakumi Iterali mendek inoweewi abok aret wiirage nagagerik, wogo mbareegwa, it yorage logonet, “Kit nen kinaaganapuri kinom noorak ndak-ndak kambin-ndomba leenogo piya nogo logomonggotik, Obagambo Noorak laago lariyak nduk ndomba aagaluk leenak nogo warogo punuk,

²² amiya togolowa'na tooppunuk, iri'ngga wumokot negen paga amiya nogo labumbunuk tunggambe peenok-peenok paga inom, irimbaga inom, labunogo punuk, kiname nen wundi naga'lek time mban kiigak o aret weeruwak o.

²³ Togop wonogwe kiigak, at Aliku ALA nen aakumi Metit mendek inooriyak nduk, o Metit ilin-unggut nage logonet, amiya tunggambe peenok-peenok paga inom, irimbaga inom, labunik kage kenok, o ti obaga mbo nage logonet, at malayikat ambi aakumi inooka nogo nen kiname unggwi nage logomenggerik, kinooke kero, non mbanogo pigin o.

²⁴ Wone yi nogo, kit kinapuri kinom mondok-mondok kineenggi pipporogo logonet, eeko logonu o.

²⁵ Ndi, at Aliku ALA nen nggween wokkiroorak abuk nggaruk togon yokkiragagim nogome unggwi nogo logomonggotik, Obagambo Noorak laago yi, lako logomunggup o.

²⁶ Ti lakwi kiinok, kinapurilogwe nen, Alom ngge nduk Obagambo Nagagerak laago yi lako ogotik? Yokkirogwe iinok,

²⁷ kit nen onggo yorogo logonet, At Aliku ALA nen aakumi o Metit mendek inapuri manggu ndarak kenok inoorit nage logonet, nit Iterali mendek niname o Metit wonogwe nogo ninili eerogo teppinaninuk, ninobaga mbo nagagerak eyom kenok, abeko logonet, Aliku ALA ake ndomba yi warogo lako ogoorik o, yinuk, yorogo logomunggup o,” yinuk, yoragagerak. Yoragagerak nogo yorogo mbareegwa, it aakumi Iterali nogo inendobanggun yindumbunuk Ala alut eereegwaarak.

²⁸ Alut eeppunuk, iname nogo nogogwaarik, Aliku ALA nen it Iterali eeko logowak nduk, Muta Karun imbirak yoragagerak nogo ndak-ndak aret eereegwaarak.

Eerubok mendek ambi inapuri aap manggu ndarak inooreegerak wone

²⁹ Ne ti paga o nogo iniki mbere eeke paga at Aliku ALA nen aap endagembogut kwi'ndak menggim kwi'ndak wonage Pirawun apuluk nogo nen nok, it aap keele maarogo mambiyareegwaarak inapurilogwe kuli inom, inaanggumi inom, o Metit paga manggu ndarak wonogwe, abok aret inoorogo piinet nagagerak.

³⁰ It aakumi Metit mendek nogo iname lombok manggu ndarak ambi ineenik wonogwe lek abok aret kambit nogogwaarak iinok, at Pirawun inom, at awuri inom wone koongga nogo inom, it aakumi o Metit ugun wonogwe inom, abok aret, nogo iniki mbere eeke paga ambugwi aret ineenik arit nogo nogogwaarik, o Metit nogome inoone ya-kwa agan nogo logonet, leenggu maarit nogogwaarak.

^31-32 Aap manggu ndarak abok aret kambit nogo mbareegwa, at Pirawun nen oonikiya nogo paga aret Muta Karun imbirak wiirage nagagerik, wogo mbareegwa, yorage logonet, “Kit Iterali mendek kinom abok aret nit niname yime nen mbet-mbet wundi nanip o. Wundi nogo logonet, yo'nogotak nogo ndak-ndak aret kinaanggumi kambin-ndomba inom, lembu-tapi inom, abok aret wonok, Aliku ALA alut eeri nawok o, yinuk, yogotak nogo aret eeri namunggup nduk, kinale'nggen noba paninuk, wundi nanip o,” yoragagerak.

³³ Yorage mbareegi, it aakumi Metit mendek nogo nen aakumi Iterali nogo wundi nawak nduk, inoone aganggen kerek togon yorogo logonet, “Peebi nit abok aret kambukwak, niname yime nen mbet-mbet aret wundi nanip o,” yinuk, yorogo mbareegwa,

³⁴ oroti worako logonet, piiruwak nduk, ragi pugwi nogo awo enggela'me pega'lek kagak, amok mbanak nogo mban amok mbanggo menggam eyo nenaarak nogome yonggoppunuk, kayin perenogo inuumbaga waganggwi,

^35-36 ndi, Aliku ALA nen it Metit mendek nogo iniki yanggonogo piyareegerak paga it aakumi Iterali mendek wone Muta yoragagerak nogo ndak-ndak aakumi Metit nen inamendek mbuti emas inom, perak inom, mbogoyum inom, ngginoorogo mbareegwa, wogorogogwaarak nogo inom waganggwi, ee'nuk, wundi wogogwaarak. It aakumi Metit mendek inamendek nogo aakumi Iterali wogorogogwaarak paga ineenggi lek aret ogogwaarak.

Aakumi Iterali o Metit mbo punuk wundi wogogwaarak wone

³⁷ It aakumi Iterali mendek nogo o Araametet nen o Tukot aret wogogwaarak. It wogogwaarak nogo ti, kumi elege-aabologwe inom linggininabulik, ata, aap mban ineebe lambunik ti, enam ratus ribu aret.

³⁸ Ndi, inaanggumi kambin-ndomba inom, tapi-lembu inom, wogoren wogo logonet, aakumi Iterali mendek mban lek aakumi alik mendek apit aret inom wogogwaarak.

³⁹ O Metit logonet, oroti tu paga nenet woroorak piiruwak nduk, ragi pugwi nogo pega'lek amok mbanak mban kagak mbet-mbet wumbiya wogogwaarak me, amok mbanak o Metit nen wonok wogogwaarak nogo piiruwak nduk, pega'lek kagak, longgo warogo oroti we worareegwaarak.

⁴⁰ It aakumi Iterali mendek nogo o Metit time wonogwe iigak, tahun empat ratus tiga puluh aret eereegerak.

⁴¹ Ndi, tahun empat ratus tiga puluh abu eeppunuk, ko'lu aret tahun ambi eeriyak panggo ari kagak, at Aliku ALA apuri aakumi Iterali mendek inawuri lombok leenak nogo o Metit nen wundi wogogwaarak.

⁴² Oonikiya ti eyom paga it aakumi Iterali mendek nogo o Metit nen wundi wogwe iigak, at Aliku ALA nen inarum wonagagerak me, aakumi Iterali inombowologwe wiganak nen yi tahun ndi tahun ari wage paga ne oonikiya wundi wogogwaarak ti eyom paga ari wage kenok, Aliku ALA alut eeko logonet, tum wako nogogwaarak.

Obagambo Nagagerak laago lako logonet eeko logorak wone

⁴³ Aliku ALA nen Muta Karun imbirak yorage, “Obagambo Nagagirak aberogo laago lako logonet, Ambi yi eeriyak, ambi ti eeriyak, yoragagerak nogo yi aret. Aap inambik kenok, laago kinom ugun nonggo logorak mage o.

⁴⁴ It aap kinayeloman onggo kunik mendek nogo inagabolo mbanak kenok mban laago kinom nonggo logorak op kwe,

⁴⁵ aap nggiru inom, aap onggo koloorak nduk yabu eekwi inom, it perak, laago kinom nonggo logorak mage o.

⁴⁶ Ndi, eebe nonggo logonet, mbanak ando endekem wonok wundi nogwe, owak nenenak ambi kalenogo pugwi, eeriyak ti mage o. Ata, o ambit me mban logonet, nonggo ogomunggup o.

⁴⁷ Obagambo Nagagirak laago ti, kit aakumi Iterali wonogwe abok aret kinale'nggen paga lako logomunggup o.

⁴⁸ Aap inambik kinom wonogwe nogo nen, At Aliku ALA aanggo warogo Obagambo Nagagirak laago lakwi ti, ninom ninale'nggen paga laruwok o, yogwe iinok, inagabolo mbana'lek kenok noorak mage o. Ata, it inom, inawuri inom, inagabolo mbambunuk, Nit Iterali mendek aret ogo o, yogwe iinok perak, kinom nonggo logorak op o.

⁴⁹ Kit aap kinaworak Iterali mendek inom, it aap alik mendek inom, Obagambo Nagagirak laago lako logonet eeko logorak yugu ambit ti mban aret eeko logomunggup o,” yinuk, yoragagerak.

⁵⁰ Yorage mbareegi, at Aliku ALA nen Muta Karun imbirak wone lengganogo yoragagerak nogo it Iterali mendek abok aret ndak-ndak eeko nogogwaarak.

⁵¹ Ndi, ne ti eyom paga aret at Aliku ALA nen it Iterali mendek inawuri leenok lombok abok aret o Metit nen wogoren wundi wagagerak.