Wundeegwaarak 1 - Ala Wone Peenok Peebi Mbanak

Aakumi Metit mendek nen Iterali aaninggin-paaninggin inoba piigo nogogwaarak wone

¹ At Yakup apuri inakuwi inapuri inom leenok lombok aap Yakup eebe inom o Metit unggwi nogogwaarak nogo inendage yi o.

² Uruben inom, Timeyon inom, Lewi inom, Yekura inom,

³ Itakat inom, Tebulon inom, Mbeniyamin inom,

⁴ Ndan inom, Natali inom, Nggat inom, Atet inom, ti aret.

⁵ At Yakup apuri-ombowologwe wiganak ineebe lambunik ti, 70 aret kwe, apuluk Yutup nogo perak, aa'nduk o Metit nagagerak wonage me, ka nogogwaarak.

^6-7 Ka nogogwaarak inom wonogogwaarik, ti'nuk, peebi nen Yutup inom, owe-awot inom, at inom ndak-ndak ndarak inom, abok aret kambeegwaarak iigak kwe, it aakumi Iterali nogo inapuri nda'narit nogo logonet, it mendek mban ambik aret wigannarit nogwe, ineebe apit mondok iya negen aret ogwe, eeko nogogwaarik, o Metit time yagabit aret ogogwaarak.

⁸ Yagabit ogogwaarak wonogwe iigak, aap endagembogut Metit mendek at Yutup eenggo'lek alik ambi mi'nage nagagerik,

^9-10 at apuri it aakumi o Metit mendek yorage logonet, “Aakumi Iterali yi, nit nineebe ndak-ndak lek nggwok aret wigak yogwe me, abunuk wigak yogo logomenggaarik, aakumi ninom wim nggaganggwi niinok, it nen ninawim inom lambumbunuk, nit tebenogo pinaninuk, o Metit yime mbo punuk, mbaganggwi iyo, ambik nda'nogwe ti, lek aruwak nduk, nit nano wone koonogo yoraawok o.”

¹¹ Yorage nagagerik, it aap Metit mendek nen aakumi Iterali mendek inarum logonet, inoone omaawi paga yabu aaninggin inoba piigo logowak nduk mippiige mbareegi, it aap Iterali mendek nogo aap Pirawun ake yi mendek ndi mendek pogo logorak o Pitom Araametet imbirak taganak nogome, o yaga'lelo nambit-mbit wurogo pit nogogwaarak.

¹² Ndi, it aakumi Iterali ineebe wigak yukwak nduk aaninggin-paaninggin togop aret inoba piigaatak kwe, kagak aret, wiganit nogo logonet, ineebe ambik lombok ogo mbareegwa, it Metit mendek nogo inagabiti ambik ogogwaarak.

^13-14 Inagabiti ogo nogogwaarik, inogogumbuk a'nuk, Iterali mendek nogo ineebi mbakwi iigak, inoone omaawi paga inabuwa mbaka'lek, “Yabu mban liirit-laarit ee'nip o,” yinuk, yorogo mbareegwa, it nogo nggween nggabok yugurogo worarogo punuk, o wukwi, yi yabu ndi yabu alitak lombok eerit nugwi, eeko logonet, it aakumi Iterali mendek iniki keebaro agan nage nagagerak.

¹⁵ Togop wonogwe iigak, aap endagembogut Metit mendek nogo nen kumi Iberani mendek elege ndaganaka inendage Tipara Puwa imbirak yorage logonet,

¹⁶ “Kit nen kumi Iberani mendek ndariyak inigen pagak ari kenok, tebeninako logonet, aap nda'nogwe iinok ti, inuut nggubunogo piigwi, ndi, komologwe nda'nogwe iinok, ineenik teppiigwi, eeko logonip o,” yinuk, wone lengganinabeegerak.

¹⁷ Wone togop aret lengganinabeegerak kwe, it kumi elege ndaganaka nogo nen Ala inagabiti mbako logonet, aap endagembogut Metit mendek nen yoragagerak nogo ndak-ndak inooko logolik ineenik teppiigo nogogwaarak.

¹⁸ Togop eeko mbareegwa, aap endagembogut Metit mendek nogo nen kumi elege ndaganaka nogo wiiragagerak wogo mbareegwa, yorage logonet, “Elege aap nda'nogwe iinok, inooriyak yokkiragagirak kagak, kit nonggop nduk ineenik teppiigo ogotik?”

¹⁹ Yorage mbareegi, kumi elege ndaganaka nogo nen Pirawun yogwi, “It kumi Iberani mendek ti, kumi Metit mendek ninom ndak-ndak lek me, nit awo nogwe niigak, it inomaawi ambik me mbet-mbet aret ndaganako menggaarak o,” yinuk, yoreegwaarak.

²⁰ It kumi elege ndaganaka nogo togop aret eekwi iinok, Ala ale'nggen inoba piyareegerak me, it aakumi Iterali mendek abunuk wiganggo logonet, ineebe ambik aret ogogwaarak.

²¹ Ndi, kumi elege ndaganaka ti, Ala mban ayuk wuko nogogwaarak me, Ala nen it inogonggelomini inom, inaagalogwe inom, wogoragagerak.

²² It Iterali mendek togop aret wigannarit nogo mbareegwa, at Pirawun nen at apuri aakumi Metit mendek apit aret yorage logonet, “Kumi Iberani mendek nen aap ndaganakwi iinok, yi nggwok Nin inikime mbo piya nogwe, ndi, kumi nda'nogwe iinok, ineenik teppiigwi, eeko logonu o,” yinuk, wone lengganogo yoragagerak.