Wayu 4 - Ala Wone Peenok Peebi Mbanak

Mbogut paga Ala alut eekwi iyareegerak wone

¹ Ti yo'nege mbaki, nabinggaanggo ambi kage logonet, o mbogut paga time tungga ambi paarak kage neegak, nogome nen aap ambi nen oone nggwok eeka trompet oone nggwok ari pogom aa'nduk yo'nege konenggirak nogo ambinom yo'nege logonet, “Yogondak eeriyak kagandak nogo eeppunuk, peebi eeriyak nogo titikkirikit nduk lagi mok o,” yinuk,

² awo aret yo'nege kagak, Aberiniki ninikime lik ari nagaarik, wo'neren pani laganggerak mban kagarak. Pani laganggerak wonage me, mbogut paga time wone lengganogo yorage menggim eyo ndoonak nogo paga, aap ambi kwi'ndak wonage kagarak.

³ Wu kirin abinak pindan-pindan eeke menggi kwak, aap kwi'ndak wonage nogo etenggen ti, yugum yatipit pogom, yugum taririt pogom, eerak wonage kagarak. Ndi, at kwi'ndak menggim irimbaga liware yugum tamurut etenggen kunik negen wanggerak wonage kagak,

⁴ it mbogut paga wonogwe inoweewi ineebe 24 nen inayum yanggwi negen yirikwi, mbuti emas paga nggare-nggare mendaarak inanobak paga yirikwi, eeppunuk, wone lengganogo yorage menggim oolo kagak, it wone lengganogo yorogo menggam eyo ndoonak 24 wanggerak wonage nogo paga inoweewi 24 nogo ti paga kwi'ndak wonogwe iigirak.

⁵ At wone lengganogo yorage menggim time nen o kimbik pindanggage kagak, oone ngguurubu agan wundi wage kagarak. Ndi, wone lengganogo yorage menggim enaame nggwe taati ndi 7 wuninik wonage kagarak. Ndi 7 nogo ti, Ala Aberiniki eeke menggerak alom 7 nogo aret o.

⁶ Ndi, wone lengganogo yorage menggim eyo ndoonak abu'me taati pugagi abu abe tabak lombok yilaa'nggun kole yenggenak kibu-kibu pege nogo pogom wonage kagarak. Ndi, aakumi nen iigulik mendek ineebe 4 enaagan-ambokan inigen abok wonage me, wone lengganogo yorage menggim oolo taati wanggerak wonogwe iigirak.

⁷ Ineebe nogo ti, ambi nggeewo singa etenggen pogom, ambi tapi ngguunok etenggen pogom, ambi ti, aakumi inetenggen pogom, ndi, ambi ti, towe wu a'naabit wiganak nogo pogom, wonogwe iigirak o.

⁸ Aakumi nen iigulik mendek ineebe 4 nogo ti, inalitak lombok ina'naabit 6 aret me, ineebe paga apit aret inigen warak mban wonogwe iigirak. It nogo puk aga'lek ko'lu-kii'me inoone yogo logonet, “Maan wonagagindak, yogondak wonage, peebi logomunggun, nogo ti, kat mondok itok komaawi lombok menggendak ninogoba Ala aret me, Kat mondok obeelom alik leenak aret o. Kat mondok obeelom alik leenak aret o. Kat mondok obeelom alik leenak aret o,” yinuk, yogak mban eeko logonet,

⁹ at mondok-mondok eenik menggerak wone lengganogo yorage menggim kwi'ndak wonage nogo, “Wa,” yinuk, alut eekwi, endage tiyappugwi, eekwi iigak,

^10-11 it inoweewi ineebe 24 nogo nen at mondok-mondok eenik itok menggerak wone lengganogo yorage menggim eyo ndoonak paga kwi'ndak wonage nogo, abu'me tebe yinuk, alut eeko logonet, “Ninogoba Ala wa. Kat kiniki koombunuk yi mendek ndi mendek abok aret wakkaakit o, yinuk, wakkagagindak kat mban kalik nggwok aret me, Yi aakumi ndi aakumi abok kat kabu'me tebe yinuk, kendage tiyappagago logonet, kalut eeko logowak o,” yinuk, inenggare-nggare mendaarak yirik nogo, nggoorogo at abu'me pi wogwe iigirak o.