Wayu 3 - Ala Wone Peenok Peebi Mbanak

Ala apuri o Taririt kuwak eekwi nogo yoragagerak wone

¹ “Ndi, ambi, at malayikat Ala apuri o Taririt kuwak eekwi inarum menggerak nogo nen apuri yoraawak nduk, yoriyak, yokkiri o. Laaluguragan 7 neenggime porogo logonet, Ala Aberiniki eeke menggerak alom 7 unde minggirak nen, Ala apuri o Taririt eerit nogo menggaarak ti, an neenu aret o. It abu ndeyak kambak negen aret wonogwe iigak kwe, aakumi nen, Lek o. Aap eenik omaawi nege menggi kwak, it Ala apuri nggereya ti paga kuwak eekwi nogo mondok inomaawi aret wonogwe iigo o, yinuk, yogwe nogo neenu aret kwe,

² it eerit nogwe nogo an nogoba Ala nen, Op aret eekwi, inombaka'lek me, it abu ndeyak kambuurak negen aganake nogo mbet-mbet ineenik a'nuk, Ala wone mbuuluk mugurok nogwe iigirak nogo nggwok togon mugurok nogo logowak nduk, inomaawi eekkolaawak o.

³ It wone mamunirogwe iigak, inaruk konembunuk waganeegwaarak nogo abeppunuk, inomaluk mbo pogo logomenggaarik, wone koneneegwaarak nogo aret liirogon porogo logorak yoraawak nduk yokkigi o. Ndi, Nit nonggop eeko ogoorik o, yinuk, inomaluk mbo pugwi lek iinok perak, aap yogoot woorak nduk wage menggi kwak, an o ndiyom paga woroorak ineenggo'lek iigak, togop aret abera'lek me perak togon inowagam woraagin o.

⁴ Togop kwe, it Taririt mendek ando mbuuluk mban inayum mili eekkolaga'lek obeelom mban eerit nugwi me, Kit obeelom aret o, yinuk, inayum laambu abe yirik ninom nugu logogun o.

⁵ Ndi, it Ala wone mbo pega'lek mondok nu'lek porogo logonet, mugurok nogwe me, an wage logominggirik, aakumi mondok-mondok ineenik logorak inendage mbuku paga liiru mbanak wonage nogo, an kagaarigin lek o. It togop aret inayum abu laambu yippiige logominggirik, an nogoba inom, at ayonggo malayikat inom, inenggaanom paga, It aap yi, an nawuri aret o, yinuk, yoraagin o.

⁶ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret at malayikat Ala apuri o Taririt kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Pilarelipiya kuwak eekwi nogo yoragagerak wone

⁷ “Ndi, ambi at malayikat Ala apuri o Pilarelipiya kuwak eekwi inarum menggerak nogo nen apuri yoraawak nduk, yoriyak, yokkiri o. An Ndawut agunci nogo porogo logonet, tu paake neenok aakumi nen nakwi, ndi, nake neenok paakwi, eekulik an mban unde logonet, pilit ariilik abet mban ari minggirak nalik leenak minggirak nogo nen,

⁸ it Ala apuri o Pilarelipiya eerit nogo menggaarak nogo an neenu aret o. Neenu aret me, it an nendage mbo pega'lek porogo logonet, inomaawi mbuuluk wonage nogo paga an noone mugurok nogo menggaarak me, it ambi eeko logowak nduk, tu paarogo piyareegirak nogo, aakumi nen narogo piyoorak mondok meek aret o.

⁹ It aap Tile eeke menggerak ndak-ndak eeko logowok nduk, kuwak eeko menggaarak nogo, it Yakuri mendek lek kagak we piliret, Nit Yakuri mendek aret o, yinuk, yogo menggaarak nogo nen, Yi Ala apuri inom iniki abe kunik wonogwe iigo o, yinuk, it Ala apuri o Pilarelipiya mendek inabu'me tebe yi wa'nuk inoone konenggo logowak nduk, eeppiige neyaagun o.

¹⁰ Ndi, Kit kinogogumbuk kiniki kwi'ndak logonet eeko logonip o, yinuk, yoragagirak nogo, konembunuk liirogon aret eekwi me, peebi yi aakumi ndi aakumi nggween paga menggaarak abok aret inabut mbanikit nduk, aaninggin-paaninggin inoba piya woroorak eyom nogo paga, it an napuri ti, inoba arukwak, an nen ndegeninake logogin o.

¹¹ An logonuk lek mbet-mbet aret woraagin o. Ndi, wage logominggirik, it abet mba'nuk waganeegwaarak nogo liirogon porogo wonogwe iinok, nggare-nggare mendaarak nogo mendek yippiya woraagin me, aakumi nen waganggwi iyo, liippunuk, tum wako logowak o.

¹² It Ala wone mbo pega'lek liirogon porogo wonogwe me, an wage logominggirik, o omaawi logowak nduk, tiru oolo yinggo mengga kwak, it aakumi ti, Ala awi wurik me togop aret mippiinok, an nogoba Ala endage inom, Ala awi wurik o kota Yerutalem ngget mendek nogoba Ala mbogut paga nen wuppi woraagin nogo endage inom, ndi, an nendage ngget toonak nogo inom, inalitak lombok inoba liiru mbanogo piyaminggirak wonogwe me, it peebi time nen wundi nagun abu lek o.

¹³ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti, abok aret at malayikat Ala apuri o Pilarelipiya kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Laworikiya kuwak eekwi nogo yoragagerak wone

¹⁴ “Ndi, ambi at malayikat Ala apuri o Laworikiya kuwak eekwi inarum menggerak nogo nen apuri yoraawak nduk, yoriyak, yokkiri o. At Ala nen yi mendek ndi mendek wakkaakit mbake kagak, wakkagagirak alom an aret me, Ala nonggop menggerak mondok liirogon abet aret paganogo ari minggirak nendage Amin nogo nen,

¹⁵ it Ala apuri o Laworikiya eerit nogo menggaarak nogo an neenu aret o. Iniki miin lek aganggen togon lek we niyo tarom ombat negen wonogwe iigirak me, iniki aganggen logorak mbakwi kenok, aganggen aret wonogwe, ndi, iniki miin logorak mbakwi kenok, miin aret wonogwe, eeko logorak op aret mbake kwe,

¹⁶ iniki aganggen lek, miin lek, we niyo tarom ombat negen wonogwe me, niyo kulubit ombat kenok inambeme nen kilirogo wumbogo mengga kwak, it ineebe togop aret kilirogo wumbiyoorak mbake agarik o.

¹⁷ It nogo nen, Ninigen mbuk ninagap mbelanak nineenggi lek niniki ale'nggen mondok lek aaninggin ndugu aago nugu logonet, agan nugu monggoorak kogo o, yinuk, mbaka'lek logonet, Nit ninamendek ambi lek ti lek, abok aret wonage me, nineenggi warak aret o, yinuk, yogo menggaarak me, it eeko logorak yoraawak nduk, yoriyak wone ambi yokkiri o.

¹⁸ It inagap mbelanak nugwi me aakumi nen inigen iigwi iinok, inenggali ogwe iyo, inayum laambu yanggwi negen yikkolaawak nduk kunggologwe, inigen mbuk nogo obeelom a'nuk yi mendek ndi mendek inigen kaawak nduk, amburu inigen me puurak kunggologwe, ndi, abe mendek paga ineenggi warak aruwak nduk, an nawu mbuti emas abe kani paga worarak nogo mendek inom onggo kunggologwe, eeko logorak yoraawak nduk, yoriyak, yokkigi o.

¹⁹ It aakumi an niniki kunik eeginake minggirak nogo ti, inaruk wake, iniki koonnaruwak nduk yawi inooke, eeke minggirak me, iniki koombunuk, inomaluk nggaruk togon mbo puwak o.

²⁰ An tunggambe paga mi'ndak logonet, tu puk-puk eeke nogo liippanuwak o. Aap ambi an tu puk-puk eeke nogo, aruk konembunuk, tu paa'neege kenok, an ka unggwage logominggirik, nimbirak niniki ambit lambunik nore-kore logonet, mbi nonggo logogun o.

²¹ Ndi, it an noone mbo pega'lek mondok nu'lek porogo logonet mugurok nogwe iinok, an nogoba yo'nereegerak nogo abu worok togon eeppunuk, at wone lengganogo yorage menggim nimbirak kwi'ndak wonage nogo ndak-ndak, it kunduk an noone lengganogo yorage minggim ninom kwi'ndak logowok nduk, Neya woraanip o, yinuk, yoraagin o.

²² Aberiniki nen it Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti abok aret at malayikat Ala apuri o Laworikiya kuwak eekwi inarum menggerak nogo nen apuri yoraawak nduk, liiru mbanogo nappu o,” yinuk, yo'nege kagarak o.