Wayu 2 - Ala Wone Peenok Peebi Mbanak

Ala apuri o Epetut kuwak eekwi nogo yoragagerak wone

¹ Yo'nege kage nagarik, wonage me, “At malayikat Ala apuri o Epetut kuwak eekwi inarum menggerak nogo nen apuri yoraawak nduk, yoriyak, yokkiri o. Neenggi abe'nggan paga laaluguragan 7 porogo logonet, ndi wuninogo pegak mbuti emas paga ogobakkigirik 7 inenggela'me nege minggirak an nogo nen

² Ala apuri o Epetut eerit nogo menggaarak nogo an neenu aret o. It ndeyak aganake kagak mbo pega'lek mondok nabenak mban eerit nogwe, It aap maluk mendek nit ninenggela'me yime logorak mondok lek o, yinuk, ineebi mbakwi, it aap ando nappiigak mendek lek kwe, wogo nagaatik, Ala nen nappinani wagaarak o, yinuk, yorogwe iinok, inabut mbambunuk, Yi pilit agan wagaarak o, yinuk, mbo piigwi,

³ ndi, an nendage mban yi awi ndi awi wigak yuwak nduk, eerit nogwe paga aaninggin-paaninggin eeppiinet nogwe iigak, iniki kwippunuk waganggo logonet, ta'liila eeginake kagak mondok nabenak mban eekwi, eerit nogo menggaarak nogo ti, an neenu aret o.

⁴ Neenu aret kwe, mbuuluk ambi eekwi iigirak nogo perak, apuri yoraawak nduk, yoriyak yokkiri o. Aa'nduk it iniki kunik lombok ee'nako nogogwaarak kwe, yogondak perak, ninom kunik lek mbo panugwi iige nagarik, yagi o.

⁵ It aa'nduk an ninom kunik logonet, iniki aganggen paga noone mugurok nogo nogogwaarak nogo mbo punuk, yogondak mondok alik eerit nogwe nogo, liippatinuk, inomaluk mbo pogo logomenggaarik, yungguninuk iniyok paga woraanuk, aa'nduk eeko nogogwaarak nogo ndak-ndak eerit nogo logowak o. It iniki koombunuk inomaluk mbo pugwi lek iinok perak, an wage logominggirik, ndi wuninogo pegak inenggela'me wonage nogo nggiginogo mbo wumbi woraagin o.

⁶ Ndi, ambi op negen eekwi iigirak nogo ti, it aap Nikolawut oone mugurok nogo logonet, eerit nogo menggaarak ti, an neebi lombok mbake minggirak nogo, it ndak-ndak ineebi mbakwi iigirak me op aret o.

⁷ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o. Ndi, it Ala wone mbo pega'lek, iniki nu'lek porogo logonet, liirogon mugurok nogwe iinok, eyoonggen aakumi ineenik eeginake menggerak Ala eyabu me wonage nogo, It noorak op aret yoraagin o, yinuk, wone yi yagarak nogo abok aret at malayikat Ala apuri o Epetut kuwak eekwi inarum menggerak nogo nen apuri yoraawak nduk, liiru mbanogo nappu o.”

Ala apuri o Timirina kuwak eekwi nogo yoragagerak wone

⁸ “Ndi, at malayikat Ala apuri o Timirina kuwak eekwi inarum menggerak nogo nen apuri yoraawak nduk, yoriyak, yokkiri o. An kangge nagagirik, neenik a'nuk mi'nagagirak aa'nduk togon wonagagirak me, peebi irip paga mondok logogin nogo nen

⁹ it Ala apuri o Timirina eerit nogo menggaarak nogo, an neenu aret o. It aaninggin-paaninggin inoba age logonet, ineenggi lek age kwe, agi mendek paga ineenggi warak negen wonogwe nogo an neenu aret o. Ndi, it Yakuri mendek lek Ibilit eeke menggerak ndak-ndak eeruwok nduk kuwak eeko menggaarak nogo mendek kagak, we piliret, Nit Yakuri mendek aret o, yinuk, Ala apuri o Timirina mendek inoone miyuk-meya eerogo piigwi ti, neenu mban.

¹⁰ Togop eeppiigwi iigak kwe, it Ala apuri eeppiyoorak koonak wonage nogo ti, lek aga'lek awo aret wonage me, inagabiti mbakwi iyo, apuri yoraawak nduk, yoriyak, yokkigi o. Tile nen ari logonet, An aaninggin-paaninggin inoba piige neenok, nonggop eekwi iyaamun? yinuk, inabut mbanikit nduk, aakumi iniki nggagangge mbaremenggi, it Ala apuri o Timirina ineebe keele maarogo o mbuuluk me mambiyamenggaarak wonogwe iigak, nogo aap ambit eenggi aret yugun o. It nogo nen, Eeppinanugwi iigak, kambi noorak kuli ariyak op aret o, yinuk, mondok inogogumbuk logonet, waganggwi iinok, mondok-mondok ineenik logorak mendek nggare-nggare mendaarak nogo yippiyaagin o.

¹¹ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o. Ndi, it aaninggin-paaninggin nogo mendek abok aret inoba age kwe, kagak, Ala wone mbo pega'lek mondok inogogumbuk logonet liirogon mugurok nogwe iinok, ne mbere paga kambugun lek o, yinuk, wone yi yagarak nogo abok aret at malayikat Ala apuri o Timirina kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Peragamut kuwak eekwi nogo yoragagerak wone

¹² “Ndi ambi, at malayikat it Ala apuri o Peragamut kuwak eekwi inarum menggerak nogo nen apuri yoraawak nduk, yoriyak, yokkiri o. An mbuti togowa ngget peenok-peenok maarak porogo minggirak nogo nen,

¹³ it an napuri o Peragamut time nggeeme wonogwe nogo an neenu o. It Ibilit oone konenggo menggam inenggela'me inom time aret menggaarak kwe, naput ambi noone liirogon woppunuk ko'lu-kii'me yoranet nege nagagerak Andipat nogo, it inenggela'me Tile wonage menggim inagota time aret wako mbareegwa, it iniki abet mba'nuk, an noone waganeegwaarak nogo, Mugurok noorak nineebi o, yinuk, yuurak kwe, kagak, Lek o. Nit ninowe Keritut aret me, at oone waganggoorak nogo ti, mondok aret porogo logowok o, yinuk, yogwe iigirak o.

¹⁴ Togop aret yogwe iigirak kwe, mbuuluk ambi ninggin eekwi iigirak nogo perak, yoraawak nduk, yoriyak, yokkiri o. It aakumi Iterali mendek nen Ala wone mbo punuk kugi aanggo warak nunggwi, ndi, kumi we ugun-ugun wurinabit nogwe, eeko logowak nduk, at Mbileyam nen aap Mbalak mamunege mbareegi, aap Mbalak nen Iterali mendek mamuniragagerak wone nogo, it Ala apuri o Peragamut wonogwe ando nen wone ti, mugurok nogwe,

¹⁵ ndi, ando nen at Nikolawut oone mugurok nogwe, eekwi iigirak me,

¹⁶ it maluk eekwi nogo ti, iniki koombunuk, mbo pogo logowak o. Mbo pega'lek iinok perak, an mbet-mbet wage logominggirik, mbuti togowa an nambeme wonage yi nogo paga inoori wambi woraagin o.

¹⁷ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok liirogon aret konenggo logowak o. It Ala wone mbo pega'lek nu'lek porogo logonet liirogon mugurok nogwe iinok, mbi mbogut paga mendek kumaarak wonage nogo wogorage, ndi, it waamenggaarak nogo mban ineenu logowak nduk, inendage ngget toonogo yugum yanggwi negen lan ari nogo paga liiru mbanogo wogorage, eerigin o, yinuk, wone yi yagarak nogo abok aret at malayikat Ala apuri o Peragamut kuwak eekwi inarum menggerak nogo nen apuri yoraawak nduk liiru mbanogo nappu o.”

Ala apuri o Tiyatira kuwak eekwi nogo yoragagerak wone

¹⁸ “Ndi, ambi at malayikat Ala apuri o Tiyatira kuwak eekwi inarum menggerak nogo nen apuri yoraawak nduk, yoriyak, yokkiri o. An nenegen kani omoonuk wunuk ari pogom logonet, mbuti tembaga kani kunik me mambugwi iinok, eyak kwindagala eerogo pegetak me, abinak pigan-pigan eeke menggi kwak, niyok togop ndak-ndak pigan-pigan eeke minggirak nogo nen,

¹⁹ it Ala apuri o Tiyatira eerit nogo menggaarak nogo an neenu aret o. It aakumi iniki kunik aganakwi, abet mba'nuk iniki noba panggombanugwi, inoreewi yeenggwaaranet nugwi, aaninggin-paaninggin eeppiigwi iigak, inogogumbuk logonet waganggwi, eerit nogwe nogo abok neenu aret o. Ndi, aa'nduk we mbuuluk eeko nogogwaarak kwe, yogondak nggwok togon eerit nogwe ti, neenu mban aret kwe,

²⁰ mbuuluk ambi ninggin eekwi iigirak me, yoraawak nduk, yoriyak, yokkiri o. Kwe Iteben nogo nen, An Ala wone yorage minggirak mendek aret o, yinuk, an nayeloman mini ineebe ambik nomoniren nage logonet, kumi ugun-ugun wurinabit nogwe, ndi, kugi aanggo warak nunggwi, eerit nogo logowak nduk, mamunirage kagak kwe, mberega'lek, Op aret o, yinuk teppugwi iigirak me, abu neebi lombok ee'nake kenok yagi o.

²¹ At kwe ti, iniki koombunuk, omaluk mbo puwak nduk, tokkagarak kwe, An ee'nabuwak, mbarit nege nogo mbo puurak neebi o, yinuk, eerit nage me,

²² andi yagan yobak-nggolak wake logowak nduk, aaninggin oba kwippege logonet, it ando kwe ti inom maluk eerit nogo menggaarak nogo kunduk, iniki koombunuk inomaluk mbo pugwi lek iinok, it togop aret aaninggin mondok luurik-maarak agago inoba kwippiige neyaagun o.

²³ Kwe ti, aagalogwe nogo abok aret inoorit nage neenok, it an napuri yi awi ndi awi kuwak eeko menggaarak nogo abok nen, Nit niniki mbakwi inom, niniki koombunuk eerit nogwe inom, abok aret liippinaninuk onggo ndak-ndak wo'nirage menggerak ti, at aret kogo o, yinuk, an neebe ineenu arugun o.

²⁴ Ndi, it ando o Tiyatira wonogwe nogo, kwe ti, oone inom, Tile eeke menggerak kote kumaarak yogo menggaarak wone nogo inom, it mugurok naga'lek mbo pereegwaarak me, an nen aaninggin mendek ambi inoba piyoorak mbarulik kwe,

²⁵ it abet mba'nuk waganeegwaarak nogo mondok nu'lek porogo wonogwe me, An aret woraagin, yegerak o, yinuk, yoraawak nduk, yoriyak, yokkigi.

^26-27 It Ala wone mbo pega'lek mondok nu'lek porogo logonet, an eeriyak mbake minggirak nogo eerit nogwe iigak, o age yobok ari wage kenok, an nogoba nen aakumi inanebunu lombok inarum logokit nduk, mippaneegerak nogo kokwak, it togop aret, yi aakumi ndi aakumi inabu'me piinok, wone lengganogo yorogo logowak nduk, mippiyaagin o. Ala nen ari logonet, Mbim obate mbanak eenggime logonet, Oone omaawi paga wone lengganogo yorage, Ndi, yi mendek ndi mendek nggween nggabok paga ogobakkigirik nogo, Telenogo pogo mengga kwak, eerogo piige, Eerigin o, yinuk, yereegerak nogo ndak-ndak eeko logogun o.

²⁸ Ndi, it Ala wone mondok nu'lek porogo wonogwe me, an wage logominggirik, o weerikit nduk eeke kagak laaluguragan abinak kere ari nogo aret wogora woraagin o.

²⁹ Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret at malayikat Ala apuri o Tiyatira kuwak eekwi inarum menggerak nogo nen apuri yoraawak nduk liiru mbanogo nappu o.”