Wayu 16 - Ala Wone Peenok Peebi Mbanak

Ala anini togolowa'na toolak kagagerak wone

¹ Ti eeke kage nagarik, Ala awi wurik me nen oone nggwok ambi it malayikat ineebe 7 nogo yorage logonet, “Ala anini togolowak 7 paga toolak ti, wonok, aakumi nggween paga wonogwe ti, inoba kilirogo wuppiya nanip o,” yinuk, yorage konenggirak.

² Yorage mbaki, at malayikat ambi nen Ala anini arologowa'na toolak nogo, wonok nggween paga kilirogo wuppege mbaki, it aakumi nggeewo endage inenggaawak paga liiru mbanak wonogwe nogo inom, at ogut wakkagak ogobakkigirik alut eekwi nogo inom, abok aret inawin maaluget inoba nik ari mbaki, aakumi nen ogole ambik yogwe iigirak.

³ Malayikat nen Ala anini arologowa'na toolak nogo kilirogo wuppege mbaki, ore ambi nen arologowa'na toolak nogo niyo nggwok yenggenak laut nogo paga kilirogo wuppege mbaki, niyo nogo aakumi inookaatak inamiya negen age logonet, niyo inikime nugu menggaarak nogo mendek abok aret kambit nogwe iigirak.

⁴ Malayikat mbere nogo nen Ala anini inarologowa'na toolak nogo, abu kilirogo wuppogo mbaka, ambi arologowa'na toolak nogo wonok niyo nage paga inom, eneeri wundit nage paga inom, kilirogo wuppege mbaki, niyo ti abok aret aakumi inamiya pogom age mbaki,

⁵ at malayikat niyo ti, unde menggerak nogo nen ari logonet, “Aa'nduk wonagagindak yogondak wonage kat nogoba Ala kalik leenak kitok obeelom logonet, a'me nggelok mban eeke menggendak me, It maluk eekaarak onggo kanini inoba piige yi ti, op aret eeke keegi o.

⁶ It kapuri kake leenak inom, kat yorage keegak yoraga inom, inamiya wunogo inooreegwaarak nogo, Onggo aakumi inamiya yi, niyo negen nonggo logowak nduk, eeppiigendak me, op aret eeken o,” yinuk, yoge kagarak.

⁷ Yoge mbaki, Ala ake warogo kani kunggo menggam nogome nen oone ari logonet, “Wone ti, abet aret yigi o. Komaawi lombok menggendak ninogoba Ala kat aret o. Aakumi eekwi onggo mondok ndak-ndak a'me nggelok mban eeppiige menggendak me, abet aret yigi o,” yinuk, ari naruk konenggirak.

⁸ Malayikat ineebe 3 nogo nen Ala anini inarologowa'na toolak nogo kilirogo wuppogo mbaka, ambi nen arologowa'na toolak nogo oonegen paga kilirogo nappegerak. Nappege mbaki, oonegen nogo aganggen ambik age logonet, mo aganggen nen aakumi yaganinabit nage logowak nduk, omaawi eeppege kagarak.

⁹ Eeppege mbaki, aakumi yaganinabit nage kenok, it nen yogo logonet, “Andi-pandi yogobi eeppinanege me, ninomaluk mbo punuk, Ala endage tiyappogo logowok o,” yinuk, yuurak op aret kwe, kagak, inomaluk iniki kundugu patogo logonet, at andi-pandi eeppiiga unde menggerak Ala nogo endage miyuk-meya eerogo pit nogwe iigirak.

^10-11 Ndi, it malayikat ineebe 4 nogo nen Ala anini inarologowa'na toolak nogo aakumi inoba kilirogo wuppogo mbaka, ambi nen arologowa'na nogo nggeewo negen wone lengganogo yorage menggim nogome kilirogo wuppege kagarak. Wuppege kage nagarik, nenegen neegak, nggeewo nogo wone lengganogo yorage menggim time o apit age mbaki, at abu'me logonet, oone waganggo menggaarak nogo, kugi andi aganake, inawin maaluget inoba nik ari, eeginakerak nogo, andi nen ineyak nggilik maako logonet, “Ninomaluk mbo puwi o,” yinuk, mbo puurak op aret kwe, kagak, inomaluk iniki kundugu patogo logonet, Ala endage miyuk-meya eerogo pugwi iigirak.

¹² It malayikat ineebe 5 nogo nen Ala anini inarologowa'na togolowak inalitak lombok kilirogo wuppogo mbaka, ambi nen arologowa'na toolak nogo niyo nggwok endage Eparat paga kilirogo wuppege kagarak. Wuppege mbaki, niyo nogo porok yegerak. Niyo porok yegerak ti paga it aap inendagembogut oonegen wundi wage menggim nen woraawak nduk, inaru koonogo piige kagarak.

¹³ Kage nagarik, nenegen neegak, waalo nggwok tinambe pogom nogo ambeme inom, nggeewo anini warak niyome nen wundi wagaarak nogo ambeme inom, ndi, aap pilit wone pugunogo yorage menggerak nogo ambeme inom, time nen ogolem pogom kugi maluk lombok ineebe kenagan wundi wogwe iigirak.

¹⁴ It inambeme nen wundi wagaarak nogo ti, kugi Tile awuri aret me, At Omaawi Lombok Menggerak Ala mondok iya eeppiyoorak eyom nogo paga it yi aap ndi aap inendagembogut o nggween paga menggaarak abok aret at Ala nogo inom wim namburiyak kuwak eeri woraawak nduk, it ogolem pogom nogo nen yonggo nogo logonet, aakumi abet mbaruwak nduk, eerubok mendek eerit nogwe iigirak.

¹⁵ Ti'nuk, at oone yo'nege menggerak nogo nen, ambinom yo'nege logonet, “An aap yogoot wagangga pogom abera'lek me woraagin me, aakumi inenggaanom nggwok paga kinagap mbelanak nogwe kiinok, kinenggali ogwe kiyo, liippogo logonip o. Kinayum abu ndigik-ndegek eerogo patinuk, kinagaket paga wonogwe me, an wage neenok, kiniki ale'nggen eekkinake kaamunggup o,” yinuk, yo'nege kagarak.

¹⁶ Ndi, it kugi ogolem pogom nogo nen aap nggween paga inendagembogut abok aret o endage Iberani inoone paga Aramageron nogome aret kuwak eeppiya wogwe iigirak.

¹⁷ Malayikat ineebe 6 nogo nen Ala anini inarologowa'na toolak nogo abu kilirogo wuppogo mbaka, ambi nen arologowa'na toolak nogo o oolo yayi kilirogo wuppege mbaki, Ala wone lengganogo yorage menggim Ala awi wurik me nen oone nggwok ambi ari logonet, “Abu age yobok togon aret eeki o,” yinuk, ari kagarak.

¹⁸ Ari mbaki, o yabok mondok kunik-kunik eeke, o ngguurubu ari, ndi, maan aakumi wakkagagerak kuli nen, nok, yogondak kuli paga togop eekeelik kwe, o mi mondok alik negen nuk eerit wage logonet, nggween mondok abut laganak-mbaganak eeke, eeke kagarak.

¹⁹ Ti eeke kage nagarik, wonage me, o kota nggwok nogo nggween mondok nggoguk ari logonet, kenaga'ndak mogonnage, ndi, yi awi ndi awi nggween paga kota-kota nogo abok aret yigirik-noonom arit nage, eeke kagak, at Ala nen, “O kota nggwok Mbaben nogo perak, at maluk eeke onggo anggur amburu toolak kwak an nanini lombok ombake minggirak toolak nogo, yogondak aret oba kilirogo wuppigi o,” yinuk, kilirogo wuppege kagarak.

²⁰ Wuppege kagak, niyo nggwok yenggenak nggween oolo kup mbanak inom, puut-puut inom, abok aret eenggi-iyok lek, lek age kagak,

²¹ o mayu kumulinggen yo'nggok lombok aaninggin wakkage logonet, 40 kilo negen mbogut paga nen aakumi inoba wuppit wage mbaki, mondok iya tit kambit nogo logonet, “Ala anini nen mayu kumulinggen paga ninooke yi, nineebi a,” yinuk, inanini agaket yogwi iigirak o.