Wayu 14 - Ala Wone Peenok Peebi Mbanak

Ndawi ngget mendek tiyanggwi iyareegerak wone

¹ Yo'nege kage nagarik, wonage me, it aap ineebe apit seratus empat puluh empat ribu nogo Ndomba Aagaluk endage inom, at ogoba endage inom, inalitak lombok inenggaawak paga liiru mbanak Ndomba Aagaluk nogo inom puut Tiyon nogo paga mi'ndak wonogwe nenegen nagiigirak.

² Nagiige nagarik, niyoraakut oonebu ari, o ngguurubu iya tit ari, eeke nogo pogom, mbogut paga nen nggitat nggwok oone eekwi nogo pogom, oone nggwok ambi ari naruk konenggirak.

³ Konengge nagarik, at wone lengganogo yorage menggim menggerak eebe nogo inom, it aakumi nen iigulik mendek ineebe 4 nogo inom, ndi, it mbogut paga wonogwe inoweewi inom, wonogwe iigak, it ineebe seratus empat puluh empat ribu nogo nen inabu'me wanggeko logonet, ndawi ngget mendek wakwi iigirak. Ndi, ndawi wakwi iigirak nogo ti, it aakumi ugun nen mamumbunuk tiyaniyak abu meek o. Ata, at Ala nen, “It o nggween paga time logorak lek o,” yinuk, aap seratus empat puluh empat ribu inonggo mbaneegerak nogo nen mban tiyaniyak perak op me, tiyanggwi iigirak o.

⁴ It aap ti, kumi wogonakulik me, kumi inom mondok lambunulik aret menggaarak. Yi mendek ndi mendek aa'nduk mendek Ala ake pogo mengga kwak, aakumi ando iigak, it nogo mban Ala inom, at Ndomba Aagaluk inom, inake leenak logowak nduk, inonggo mbanogo inagap ndareegerak me, Ndomba Aagaluk nogo mban inom nugu menggaarak.

⁵ It nogo pilit wone ambi abu yogolik me, maluk ambi inoba mondok lek aret iigirak o.

Malayikat ineebe kenagan nen eekwi iyareegerak wone

⁶ Ti iige nagarik, wonage me, malayikat alik ambi mbogut oolo taati wuga agan nage logonet, “Kit aakumi kinanebunu alitak lombok inom, kinoone alitak inom, kinagabolo alitak inom, yi aakumi ndi aakumi nggween paga monggotak abok aret wone lek ageelik obeelom mondok menggerak wone yokkirage yi, konenggo logonip o,”

⁷ ari nagaarik, “Mbogut inom, nggween inom, niyo nggwok yenggenak laut inom, niyo eneeri wundit nage menggim inom, at Ala nen mban wakkagagerak me, yogondak Ala nen kinowak loongginaburak eyom abu koorok panggo yegerak me, kinagabiti nen at Ala mban ayuk wuko logonet, at abu'me tebe yinuk, endage tiyappogo logonip o,” yinuk, oone nggwok paga agan nage kagarak.

⁸ Agan nage mbaki, ore ambi wage logonet, “O kota nggwok Mbaben ti, kwe mbabilu ya wukak pogom me, amburu kumili aganaka nenok, ugun-ugun eerit nogo mengga kwak, maluk ugun eerit nugwi, iniki nengge kenok maluk ugun eerit nugwi, eeko logonet, Nit eekwi yi, it yi aakumi ndi aakumi inanebunu lombok abok aret ndak-ndak eeko logowak o, yinuk, mamuninako menggaarak me, inawi inom, ineebe inom, abu pup eerogo piigi o. Pup eerogo piigi o,” yinuk, ari naruk konenggirak.

⁹ It malayikat mbere nogo wone ti, yorogo mbaka, alik ambi wage nagaarik, oone nggwok paga ari logonet, “It aakumi nen nggeewo nogo inom, at ogut wakkagak kugiwak ogobakkigirik nogo inom, inalut eeko logonet, it inapuri yelok logowak nduk, ineenggi paga ilik, inenggaawak paga a, nggeewo endage liiru mbanak wonage kenok,

¹⁰ anggur amburu niyo inom toolak lek, at mban toolak nonggo logonet ale ambik kogo mengga kwak, at Ala nen it aakumi ti, inabuwa mbaka'lek anini mondok alik negen inoba piige logonet, kani kunik yugum anggen inom kwippiige mbaremenggi, it Ala ake leenak menggaarak malayikat inom, at Ndomba Aagaluk inom, inigen iigak, Kani omoonuk eyak o. Yugum yugu andi o, yinuk, yagan yobak-nggolak wako logogun o,” yinuk, ari naruk konenggirak.

¹¹ “It aakumi ineenggi paga ilik, inenggaawak paga a, nggeewo endage liiru mbanak logonet, nggeewo inom, at ogut wakkagak ogobakkigirik nogo inom, inalut eeko logomenggaarak nogo, kani kunik yugum anggen inom inoba kwippiyamenggerak ka'luk nogo nggaruk yaga'lek mondok-mondok inoba wungge kagak, liingge inom, oonikiya inom, tat yonggongga'lek mondok-mondok yagan wako logogun o,” yinuk, ari naruk konenggirak.

¹² Ari naruk konengge mbaki, at oone yo'nege nogo nen, “It iniki Yetut oba panggombunuk, oone yugu li'lak eerit nogwe, ndi, Ala nen, Yogop ee'nu ndogop ee'nu, yereegerak wone liirogon mugurok nogwe, eeko menggaarak at apuri ake leenak nogo, andi-pandi inoba piigwi iigak kwe, inogogumbuk logonet, waganggo logowak o,” yinuk, yo'nege kagarak.

¹³ Ti yo'nege mbaki, ti'nuk, mbogut paga nen wone ambinom yo'nege kage logonet, “Yogondak nen it aap ninowe inom kunik logonet kanggwi nogo, iniki ale'nggen aret mbako logogun o, yinuk, liiru mbanu o,” yo'nege mbaki, liiru mbangge me, Aberiniki nen, “Abet aret o. It kanggwi iinok, ineenik logonet, ta'liila eeginake kagak yabu eerit nugu nagaarak nogo, Ala nen kobak eerogo pigin lek me, iniki ale'nggen mbako logonet, tat yonggonggologo logogun o,” yinuk, ari naruk konenggirak.

Anggen kole agaarak me, mbangge kagagerak wone

¹⁴ Wone ari nogo naruk konengge nagarik, wonage me, aakumi inetenggen pogom ambi nggare-nggare mendaarak mbuti emas mendek anobak paga yirik, ndi, paloowi ena yomonak ngget ambik eenggime porogo logonet, ndugwi abinak lan ari nogo paga kwi'ndak wonage nenegen kagarak.

¹⁵ Kage mbaki, ti'nuk, malayikat alik ambi Ala awi wurik me nen wundi wage nagaarik, oone nggwok paga at ndugwi paga kwi'ndak wonage nogo yoge logonet, “O nggween paga ogu time anggen yugu abu kole agaarak mbaniyak eyom agaarak me, kobaloowi woppunuk, mbet-mbet mbani wambu o,” yinuk,

¹⁶ yoge mbaki, at ndugwi paga kwi'ndak wonage nogo nen abaloowi yomonak nogo paga o nggween paga time anggen yugu abu kole agaarak nogo, abok aret mbani wangge kagarak.

¹⁷ Wangge mbaki, mbogut paga Ala awi wurik nogome nen malayikat alik ambi wundi wage nagaarik, at kunduk, paloowi yomonak ngget ambik eenggime wonage kagarak.

¹⁸ Ti'nuk, malayikat alik ambi Ala ake warogo kani kungge menggerak unde nogo kani kungge menggim nogome nen wundi wage nagaarik, at malayikat obaloowi yomonak ngget ambik aa'nduk eenggime wundi wagaarak nogo, yoge logonet, “O nggween paga ogu time anggur anggen yugu nogo, abu kole agaarak me, kobaloowi ngget ambik ti paga mbanogo yonggoli wambu o,” yinuk,

¹⁹ yoge mbaki, at malayikat nogo nen anggur anggen mbanikit nduk obaloowi yomonak nogo nggween paga wuppi wage nagaarik, anggur anggen nogo abok aret mbanogo punuk, kubulogo Ala anini nen aambiranuwak nduk, aambirangge menggim nogome mambege kagarak.

²⁰ Mambege mbaki, anggur anggen amburu aambirangge menggim o kota yagat endekem nogome aambirangge kagak, aakumi inamiya niyo wurik negen yenggenit lagangge logonet, aloboguk ambik kuda anobak ndak-ndak age nagaarik, irip o nda tiga ratus kilometer ndak-ndak ari nage kagarak.