Wayu 13 - Ala Wone Peenok Peebi Mbanak

Nggeewo negen anini warak ambi nen eeke kagagerak wone

¹ Ti eeke kage nagarik, nggeewo negen ambi niyo nggwok yenggenak laut inikime nen wundi wage kagarak. At nggeewo negen nogo ti, aruk alom me eyak 10, ndi, anobak 7, wonage kagarak. Ndi, eyak 10 nogo paga nggare-nggare mendaarak abok yirik, ndi, anobak 7 nogo paga Ala endage miyuk-meya eerogo pugu liiru mbanak abok wonage kagarak.

² Ndi, nggeewo pogom anini ambik niyome nen wundi wage kagarak eebe nogo ti, nggeewo harimau negen aret me, iyok ti, yo'nggok beruang iyok pogom, ndi, eyagarin nogo ti, nggeewo singa eyagarin nde eerak nogo pogom wonage kagarak. At waalo nggwok tinambe pogom nogo nen, “An nomaawi paga eerit nage, an wone lengganogo yorage minggim logonet, wone lengganogo yorage, eeke logonok nduk, abok aret kat unde eeppagagi o,” yinuk, yoge kagarak.

³ Kage nagarik, nggeewo anobak ando nogo kagak, anobak ambit nogo wako mbaka, mondok kambuurak nduk eeke kagarak kwe, lek age mbaki, it aakumi nggween paga mendek abok aret, “Wi!” ugo logonet, at mban amugurok nogwe iigirak.

⁴ Ndi, waalo nggwok nogo nen at nggeewo negen niyome nen wundi wagaarak nogo, awone kiliregerak me, waalo nggwok nogo tiyappunuk, alut eekwi, ndi, nggeewo nogo kunduk alut eeko logonet, “Nggeewo yi kokwak ambi wonogwe mondok lek me, taani nen at inom wim namburiyak mbakop? Mondok lek aret o,” yinuk, at tiyappugwi, eekwi iigirak.

⁵ At nggeewo anini warak niyome nen wundi wagaarak nogo tut 42 penengge kagak, wogoppake logonet, Ala miyuk-meya eerogo pege, ndi, wone lengganogo yorage, eeke logowak nduk, waalo nggwok nogo nen awone kilirege kagarak.

⁶ Awone kilirege mbaki, nggeewo nogo nen at Ala eebe inom, at endage inom, at menggim inom, ndi, it mbogut paga menggaarak inom, it abok aret at oone paga miyuk-meya eerogo piinet nage kagarak.

⁷ It aap inanebunu alitak lombok inom, inoone alitak inom, inagabolo alitak inom, yi aakumi ndi aakumi abok aret at abu'me tebenogo piinok, at mban mondok tiyanak logowak nduk, waalo nggwok nogo nen awone nggeewo nogo kiliregerak me, at nggeewo nogo nen it Ala apuri ake leenak nogo inom wim nambuke logonet, tebenogo piinet nage kagarak.

⁸ Ndomba Aagaluk wareegwaarak nogo nen o maan mbogut-nggween yi awo wakkaga'lek kagak, aakumi o nggween paga menggaarak abok aret it inendage mondok-mondok ineenik aganaburak mbuku paga liiru mbanak wonage lek kenok, at nggeewo nogo alut eekwi iigirak.

^9-10 “It keele maarinaburak punik kenok keele maarinakwi, Kambuwak nduk mbuti tege paga inooriyak punik kenok, inookwi, Eeko logogun o, yinuk, yereegerak nogo aret aganabit nagun me, aganabit nogwe iigak, it Ala apuri ake leenak nogo nen, Yi nonggop ee'ninakwi o? yinuk, iniki lek-lek arugwaarik o. Ata, Obeelom eeppinaniyak yereegerak nogo abet aret eeppinanigin o, yinuk, iniki kwippunuk, inogogumbuk logonet, waganggo logowak o. Inaruk wonage kenok, wone ti, liirogon aret konenggo logowak o,” yinuk, yo'nege kagarak.

Nggeewo negen alik ambi nen eeke kagagerak wone

¹¹ Ti'nuk, peebi nen nggeewo alik ambi nggween enoona nen lagi wage kagarak. Nggeewo nogo ti, aruk alom me eyak mbere ndomba eyak pogom kwe, oone perak, waalo nggwok oone nogo pogom ari kagarak.

¹² Nggeewo aa'nduk niyo yenggenak me nen lagi wagaarak awone kiliregerak nogo li'luk eerogo wagangge nagaarik, it aakumi nggween paga wonogwe abok aret yorage logonet, “Kit nen nggeewo aa'nduk lagi wagaarak anobak ambi wako mbaka, kambuurak nduk eekerak kwe, lek agaarak nogo mban alut eeko logonip o,” yinuk, oone omaawi paga nabek togon yorage kagarak.

¹³ Ndi, nggeewo peebi nggween enoona lagi wagaarak nogo nen eerubok mendek iya tit eerit nage logonet, aakumi abok inenggaanom paga kani kunik mbogut paga nen nggween paga wuppi wage kagarak.

¹⁴ At nggeewo aa'nduk lagi wagaarak oone kiliregerak paga, eerubok mendek iya tit eerit nage logonet, “Nggeewo negen ambi mbuti tege paga wakaarak kwe, eenik agaarak nogo, ogut wakkagak ambi ogobakkigirogo punuk, at mban alut eeko logonip o,” yinuk, it aakumi nggween paga wonogwe nogo inambokan lagangge logonet, yorage kagarak.

¹⁵ Yorage mbaki, nggeewo aa'nduk lagi wagaarak ogut wakkagak ogobakkigirik nogo oone yuwak nduk, ambebubu inikime pu eerogo mambuurak unde eeppegerak me, pu eerogo mambege mbaki, ogut wakkagak ogobakkigirik nogo oone warak age nagaarik, at alut eeka'lek nogo anini nen inoorit nage kagarak.

¹⁶ At nggeewo ti nen it aap inendage warak inom, inendage lek inom, ineenggi warak inom, ineenggi lek inom, weelek mendek inom, aakumi inayeloman inom, abok aret ineenu agak ambi ineenggi abe'nggan paga ilik, inenggaawak paga a, liiru mbanogo piige nagaarik, yorage logonet,

¹⁷ “It aakumi ti, an nendage ilik, an nanomor a, ineebe paga liiru mbanak wonogwe lek kenok, inamendek onggo mbanggologwe, ndi, yi mendek ndi mendek kunggwi, eeko logorak mondok mage o,” yinuk, wone lengganogo yorage kagarak.

¹⁸ Kage nagarik, at wone yo'nege nogo nen ambinom yo'nege kage logonet, “Wone lengganogo yorage kagandak nogo ti, it aap iniki warak nen mban kin kogo logogun o. At nggeewo nogo nen liiru mbanggerak nogo ti, aakumi nen eekwi inanomor liiru mbanak 666 aret me, it aakumi iniki warak kenok, Yi aret kagi o, yinuk, liippogo logowak o,” yinuk, yo'nege kagarak.