Wayu 12 - Ala Wone Peenok Peebi Mbanak

Kwe ambi waalo imbirak nen eekwi iyareegerak wone

¹ Eeke kage nagarik, mbogut paga time eerubok mendek mondok iya lombok ambi eeke kagarak. Kage logonet, kwe ambi tut eebe paga mi'ndak wonage me, ambogoyum negen ti, oonegen aret yirik, ndi, anobak paga nggare-nggare mendaarak enggela'me laaluguragan 12 nabenak wonage kagarak.

² Kwe nogo, abila wonage me, aagaluk ndariyak nduk enegen paganak andi nen yagan wake logonet, kwa ari kagarak.

³ Kwa ari mbaki, mbogut paga time inagabiti warak mendek alik ambi eeke kagarak. Kage logonet, waalo nggwok tinambe pogom agabolo maa'ngga kunik me, eebe ambit aret kwe, anobak 7, ndi, anobak nogo paga eyak 10, ndi, anobak 7 nogo paga nggare-nggare mendaarak abok aret yirik kagarak.

⁴ At waalo nogo age paga laaluguragan mbogut paga wonage nogo ando iigak, ando sepertiga nogo pelenogo nggween paga mbo wuppit wage kagarak. Kage nagarik, waalo nggwok nogo nen, “Kwe nogo aagaluk ndake kenok, naakit o,” yinuk, kwe nogo owagam enaarak wonage kagak,

⁵ yi aakumi ndi aakumi endekem konenggulik mendek abok aret inarum logonet, mbim obate mbanak ineenggime logonet, inoone omaawi paga yorogo mengga kwak, oone omaawi paga wone lengganogo yorage logowak nduk, at kwe nogo nen aagaluk aap aret ndake mbaki, elege nogo ndininuk, wone lengganogo yorage menggim at Ala owagam pi lagangge kagarak.

⁶ Pi lagangge mbaki, agalo nogo, logowam Ala nen ogobakkigirogo pereegim karume aakumi lek me time kole nagaarak wonage me, Ala nen arum wonage kagak, nogo seribu dua ratus enam puluh yit nage kagarak o.

⁷ Ti eeke kage nagarik, at Mikayen awuri malayikat mendek inom nen at waalo nggwok tinambe pogom nogo, awuri inom mbogut paga time wim nambukwi iigirak.

⁸ Nambuko logonet, it nen waalo nggwok nogo awuri inom tebenogo piigo nagaarik, “O mbogut paga yime logorak lek o,” yinuk,

⁹ at waalo nggwok nogo awuri inom mbelenogo nggween paga mbo wuppiya wage kagarak. Wuppiya wage mbaki, waalo nggwok mbo wuppi wagaarak nogo ti, o maan nen yi aakumi ndi aakumi abok aret inambokan lagangge menggerak Ibilit nogo ti, Tile aret me, at awuri inom abok aret mbogut paga nen mbelenogo nggween paga wuppiya wogwe iigirak o.

¹⁰ Mbelenogo wuppiya wogo mbaka, oone nggwok ambi mbogut paga nen ari logonet, “At Ala enggaanom paga ninoreewi Ala apuri ko'lu-kii'me pilit wone inoba piige menggerak nogo, muk wuppi wagaarak me, At Ala omaawi paga Tile tebenogo punuk, apuri inagap ndake, Ninogoba Ala nen it yi aakumi ndi aakumi abok at abu'me piige, Ndi, Kinowe endagembogut yi aret o, yinuk, leenogo pereegerak Keritut nogo, oone mban konenggwi, Eeke logorak eyom ari waga o.

¹¹ It ninoreewi nogo nen Ndomba Aagaluk amiya wundeegerak abet mba'nuk, iniki ti paga panggombunuk logonet, Ninooriyak op aret o, yinuk, Inagabiti lek Ala wone wonok yoranet nugwi paga Tile tebenogo pugwi me,

¹² Kat mbogut inom, kit mbogut paga monggotak inom, kiniki ale'nggen mbako logonip o. It nggween paga wonogwe nogo inom, niyo nggwok yenggenak laut paga wonogwe nogo inom, nogo perak, Inenggela'me at Tile wuppi wagaarak nogo nen, An ne mbereeluk logonuk, nenggaawak lek arigin kagi, mba'nuk, Anini nen aakumi lale-pale eerogo piyaakit nduk, wambi nagaarak wonage me, inabuwa o,” yinuk, ari kagarak.

¹³ Ndi, at waalo nggwok nogo nen, “An nggween paga abu aret mbo wuppani wagaarak kagi,” mbake nagaarik, kwe aagaluk wulaga ndakerak nogo, mugurok nage mbaki,

¹⁴ wake kero, o at logowam ogobakkigirogo pereegim karume nogome nawak nduk, Ala nen towe wu a'naabit kokwak, kwe nogo, a'naabit warak eeppege mbaki, wuga agan o nogome namenggerak wonage me, Ala nen arum wonage kagak, tahun kenagan eeppunuk, ambi oolo eeruwak nduk, nage kagarak.

¹⁵ Ndi, nage kagak, niyo nen kwe ti wonok nawak nduk, niyo nggwok wu'nuk nage menggi kwak, at waalo nggwok nogo ambeme nen niyo kilirogo aru nggaruk nappegerak kwe,

¹⁶ nggween nogo nen kwe nogo yeenggwaage logonet, ambe nggaganogo punuk, niyo kole nage kwak ambeme nen kilirogo nappegerak nogo, nggween ambe nggaganak me time wuppege kagarak.

¹⁷ Ti eeke mbaki, at waalo nggwok nogo nen anini agaket ari nagaarik, “Ala nen, Yogop ee'nu ndogop ee'nu, ari menggerak wone liirogon eerit nogwe inom, Yetut nen paganogo yoragagerak wone abet mba'nuk mugurok nogwe inom, kwe nogo aagalogwe ando it aret me, Ninom wim namburi naakit o,” yinuk,

¹⁸ niyo nggwok yenggenak laut aa'nggi paga enaa'nari nagaarak wonage kagarak.