Wayu 10 - Ala Wone Peenok Peebi Mbanak

Mbuku mbuuluk perenak pekkagagerak wone

¹ Eekwi nogo iige nagarik, ti'nuk, malayikat alilaakwi ambi, ndugwi nogo ayum negen pirik-perek eerak mbogut paga nen wambi wage kagarak. Anobak paga liware negen nggare-nggare yirik logonet, etenggen ti, oonegen pogom, ndi, iyok ti, eyo yinik paga kani wunuk ari nogo pogom logonet,

² mbuku mbuuluk pirik-perek eerak ambi eenggime mbigamborogo wonage kagarak. Iyok abe'nggan niyo nggwok yenggenak laut nogo ogombaga pege, ndi, iyok kwaare'nggan nggween paga pege, eeppunuk logonet,

³ nggeewo singa oone mondok ku ari menggi kwak, oone nggwok ari mbaki, o ngguurubu ne 7 paga ari naruk konenggirak.

⁴ O ngguurubu ne 7 paga ari naruk konembunuk, ari nogo liiru mbanikit nduk eeke me, mbogut paga nen oone ambi yo'nege logonet, “O ngguurubu ne 7 paga ari konenggendak nogo ti, liiru mbanugun o. Ata, kinikime mban kumaapporogo logot o,” yinuk, yo'nege kagarak.

⁵ Yo'nege mbaki, nenegen neegak, malayikat iyok ambi niyo nggwok yenggenak laut ogombaga pege, ndi, ambi nggween paga pege, eeppunuk, mi'ndak wonage kagarak nogo nen, Abet aret ari, mbaruwak nduk eenggi abe'nggan mbogut paga nippunuk,

^6-7 at mbogut inom, mbogut paga wonogwe inom, nggween inom, nggween paga wonogwe inom, niyo nggwok yenggenak inom, inikime wonogwe inom, abok aret wakkagagerak mondok-mondok itok eenik menggerak nogo endage kungge logonet, “At Ala nen, Kit nagote wone kumaarak nogo ando yokkiragagirak kwe, irip pagaluk ando kumaarak wonage nogo, peebi kineenu arumunggup o, yinuk, at ayeloman mini yorage kagak, yoraga nen yoragagerak nogo, ambinom kumaapporogo logogin lek o. It malayikat ineebe 6 nen oone nggwok eeka trompet nogo oone muk eekaarak kwe, ambiret 7 nogo ti, awo eeka'lek me, eeke kenok, wone nogo pagak yigin o,” yinuk, ari naruk konenggirak.

⁸ Naruk konengge nagarik, wonage me, mbogut paga oone ambi yo'nege kagarak nogo nen ambinom yo'nege logonet, “At malayikat iyok peenok nggween paga pege, ndi, peenok niyo nggwok yenggenak laut paga pege, eeppunuk, mi'ndak mbuku mbanak eenggime mbigamborogo wonage ti, kola nak o,”

⁹ Yo'nege mbaki, malayikat nogo owagam nage nagarik, “Mbuku mbuuluk ti, wo'niru o,” yoge mbaki, at nen wo'nege logonet, “Waganogo namen o. Nengge keegak, kambe paga nggiin amburu negen ombat abe kaamenggendak kwe, kaanagale paga perak, alembere agan nage kaamunggun o,” yinuk, yo'nege kagarak.

¹⁰ Yo'nege mbaki, mbuku malayikat eenggime wonage nogo waganogo nengge neegak, nambe paga nggiin amburu negen ombat abe kagarak kwe, naanagale paga perak, alembere agan nage kagarak o.

¹¹ Mbuku nogo nengge mbaki, mbogut paga oone yo'nege kagarak nogo nen ambinom yo'nege logonet, “Aakumi inanebunu alitak lombok inom, inagabolo alitak inom, inoone alitak inom, aap inendagembogut inom, yi aakumi ndi aakumi apit wone yi abok aret, Ndogop arigin, yorage logonu o,” yinuk, yo'nege kagarak.