Wakkagagerak 49 - Ala Wone Peenok Peebi Mbanak

Yakup awoneninu kiligiragagerak wone

¹ Ti'nuk, at Yakup nen, “Kit peebi eekkinake logorak wone yokkiraakit nduk, an nowagam panggorogon kuwak ari woraanip o,” yinuk, yoragagerak at apuri abok aret kuwak eeko mbareegwa, yorage logonet,

² “Kinogoba an Yakup napuri yi wae! Kinogoba an Iterali noone ari konenubagip nduk, Kuwak eeppunuk, kinaruk logonip o.

³ Kat Uruben nogo ti, Napuri ndaganabikit nduk wakkage logonet, Nomaawi paga naput manggu iyaalok togon kat aret ndakkabeegirak o. Koreewi ando inendage lek we tebenak iigak, Kat perak, kendage mondok tiyanak komaawi ambik aret wonage kwe,

⁴ Kogoba nogo yege minggim kena ni'nage logonet, Kogoba akwe nogo eeriyak mage yugu kagak, Maluk eeppereegindak me, Kat aap abe mendek lek O wiya nen niyo muninuk nage-wage eeke menggi kwak Togop aret logomunggun o.

⁵ Kat Timeyon kawuluk Lewi kimbirak ti, Kinanini wulo logonet, Yigin nogo mban piyanggagak eeko logomunggup o.

⁶ Kinanini nen aap inookwi, Kiniki mba'nuk tapi-lembu iniyok omanggen mbanogo piigwi, Eeko monggotak me, An ninom niniki ambit eeppunuk, ninom kuwak eeke, Ninom wone koongge, Eeke logogin lek o.

⁷ Kiniki aagi nen kinanini ambik age, Ndi, kiniki aagi mi'na'nuk, Kinanini nen aakumi aret inoorit nogwe, Eeko monggotak me, Mondok pulunogo pinagaminggirak me, An Yakup napuri inenggela'me Yi awi ndi awi mbo tek eerogo nappinagage. Aakumi Iterali inenggela'me mak eerogo pinagage, Eerigin o.

⁸ Kat Yekura ti, Kinom wim inenggaanok nggubu eerogo piinet nage kenok, Koreewi nen wogoppagagwi, Kogoba apuri nen kabu'me mban tebe yogwe, Eeko logogun o.

⁹ Nggeewo singa aagaluk nen enggaanggum uugwe eeke kenok Warogo ndonggorogon nenok, Iyok paga awina wage nagaatik, Eenggi-iyok yungguk-pangguk eeppunuk, Winnagaatak me, Aap ambi agabiti nen singa nogo Eenik eeppegeelik ti kokwak, Kat naput Yekura togop aret logomunggun o.

¹⁰ Aap endagembogut ambin mbanak Mondok kat Yekura keenggime aret wonage, Ndi, ogoba nen aput awone kilirigetak nogo Porogo wonage menggi kwak, Kat keebe paga wiganak nogo nen mban wone ti, Eenggime pipporogo wonage, Eerit namenggi-namenggi Wone Alom Unde nogo kin ari wage kenok, Yi aakumi ndi aakumi inanebunu lombok abok aret At ari kenok mban eeko logogun o.

¹¹ At aap nggwok ti nen, Aanggo keledai eyo anggur ero nogo paga mbarembege, Ndi, aanggo keledai aagaluk nogo ti, Eyo anggur abe mendek miippunuk, Eno'mbak paga yilinogo pege, Anggur amburu paga ayum kookkolage, Ndi, anggur amburu inamiya negen paga Ayum agi yirika nogo koorogo pege, Eerigin o.

¹² Anggur amburu mili menggi kwak enegen mili age, Yilak amburu yanggwi menggi kwak, eyak abinak yanggwi age, Eerigin o.

¹³ Kat Tebulon ti, Niyo nggwok yenggenak laut aa'nggi paga mban Kawi wuppatinuk wonage me, Yiiro-ndiiro niyo nggwok paga nugu menggaarak nogo Kat wonage me unggwi wogo logogun o. Ndi, kat kanggween ti, O Tiron kuli aret logogin o.

¹⁴ Kat Itakat ti, Keledai owak omaawi ambik me, Iri'ngga-kale'ngga amborowak peenok-peenok Luurik-maarak aago keele maarak kagak, Aaninggin mbaka'lek eebe oolo ugun pogonik Nogo yege nagaatik,

¹⁵ O yi ti abu obeelom aret me, Yime op aret yonggonggolagi o, mba'nuk, Aaninggin oba puurak eekwi iinok, Amborowak koonogo wogorage, Ndi, inoone omaawi paga yogwi iinok, Inayeloman pogom, E o, yinuk, piyaninuk nege, Eeke menggi kwak Aret logomunggun o.

¹⁶ Kat Ndan ti, Inanebunu Iterali mendek wone ambi inoba age kenok, Inenggela'me mi'na'nuk, Inowak loongga aret logomunggun o.

¹⁷ Kat nogo ti, Kuda aakumi amborowak paga kwi'na'nuk wogwe me, Waalo muuru tu ambet me nen Kuda iyok eyak nggarunggage kenok, Puruk ari logonet, Aakumi amborowak paga kwi'ndak nogo Nggininik-paninik eerogo ambo'me wuppiige menggi kwak, Aret logomunggun o.

¹⁸ Kaliku ALA wae! Nagap ndarogo panenok nduk, tokkake agarik o!

¹⁹ Ndi, kat Nggat ti, Aap yogoot iyagalo ambi aago nen koori wogwe iinok, Kat nen melak ari logonet, Inandelen anggut kogonogo piinet nage logomunggun o.

²⁰ Kat Atet kame ti, Kambi-mbiingga abe amburu warak mban wonage me, Aap inendagembogut noorak nduk, Inake pipuk eeke logomunggun o.

²¹ Kat Natali ti, Rusa kooli anggenogona wonage lek We wondet aago nege logonet, Aagalogwe amuni mbanak lombok ndaganake menggi kwak Aret logomunggun o.

²² Kat Yutup ti, Eyo niyo eneerime wonage me, Eno'mbak ambik wigangge nagaatik, Yugum yagat wurik paga engga ndoonogo pege menggi kwak Aret logomunggun o.

²³ Aap yi nineebi o, yinuk, kooriyak nduk, Ineegin-inomaale li'luk ee'nuk wogwe, Inanini nen maale paga wondep wukkakwi, Eerumenggaarak kwe,

²⁴ At Omaawi Ambik Menggerak an Yakup Yeenggwa Nega nen yeenggwa kege, At Omaawi Ambik Yugum nu'lek menggi kwak logonet, An Iterali Ndegennaka nen kat ndegenggake, Eeke menggerak me, Keenggi aaninggin ambik lek teeluk aret wonage, Keegin keenggime nu'lek porogo wonage, Eeke logomunggun o.

²⁵ An kogoba nogoba Ala nen yeenggwa kege, At Omaawi Lombok Menggerak nen ale'nggen koba pege, Eeke logonet, Agi mbogut paga nen wuppagi wage, Ogu nggween abu'na nen obeelom eerogo nippagi wage, Ndi, kakwe ndaganake menggim obeelom eerogo pege, Elak amburu ambik eerogo pege, eeremenggerak paga Kapuri obeelom aret ndarogo wokkege, Eeke logowak o.

²⁶ Puut mondok tiyanak itok menggerak inom, Puut lunik mondok taati menggerak paga Anggen abe yarak mban kologwe inom, Kat kombomini nogo ti, ti kwak logonet, Inale'nggen noba paneegwaarak mbuuluk negen kwe, An kogoba nen koba pagage ti, nggwok negen aret me, Koreewi inenggela'me nen kat mban tiyanak wonage keenok, It ninom lambuk togon ninale'nggen abu iya koba pagago o.

²⁷ Kat Mbeniyamin ti, Nggeewo ta'ngge anini warak mendek mbi abu nen O kuubondendok wam-pagi kwaarogo wake nagaatik, Tigitogon nengge, Ndi, kiyoma kwaarogo wake nogo oreewi nawak nduk, Ando teppegetak me, neenok ndi yogwe, Eeke menggi kokwak Aret logomunggun.”

²⁸ It Iterali mendek inanebunu 12 paga wigannogogwaarak ti nogo, inogoba nen ale'nggen inoba piige logonet, inalitik-inalitak eeko logorak ndak-ndak kenok mban eeko logowak nduk, awoneninu kiligiragagerak nogo ti aret.

Yakup kangge mbareegi, nggween taambereegwaarak wone

^29-31 Awoneninu abu aret kilirirage nagagerik, wone ambi lengganogo at apuri yorage logonet, “Napuri o. An nombomini kambunuk, kuwak ari nogogwam nggwogoba wonogome iya nagin me, nage neenok, neebe waganogo at Abarakam nen, An mendek kanggwi iinok, yime aret mambiigo logowok o, yinuk, o Kanan nggween taganak Mamere time aap Ket mendek ambi endage Eporon eyabu yarak me ndo endage Makepela inom onggo mbangge mbareegi, Abarakam akwe Tara imbirak mambiigwi, ti'nuk, Itak akwe Iribaka imbirak mambiigwi, ti'nuk, an nen nakwe Leya nogo mambege, eeko monggom nogome aret mambani namunggup o,” yinuk, yoragagerak.

³² Yabu yarak me ndo inom wonage nogo ti, it aap Ket mendek inoona onggo mbaneegim me, nduk, yoragagerak.

³³ Yakup nen wone nogo apuri abu yorage nagagerik, nogo yege menggim taa'nogo winna'nuk kangge nagagerik, ombomini kambunuk kuwak ari nogogwam nggwogoba wonogome nogome iya nagagerak.