Wakkagagerak 48 - Ala Wone Peenok Peebi Mbanak

Yakup nen Manate Eparayim ale'nggen eeppiyareegerak wone

¹ Ti'nuk peebi nen at Yutup yogo logonet, “Kat kogoba nogo andi eekerak wonage o.” Yogo mbareegwa, at Yutup nogo ogoba Yakup pekka naakit nduk, nage logonet, apuri mbere'ndak Eparayim Manate imbirak wogoren nagagerak.

² Nage mbareegi, “Kaput Yutup wage o,” yogwe nogo at Iterali aruk konengge nagagerik, at eebe abu meek aret eereegerak kwe, omaawi negen eekko'nok, nogo yege menggim taati mi'nagagerak.

³ Mi'ndak wonage me, at Yutup nogo ka wage mbareegi, Yakup nen yoge logonet, “An o Kanan tini ambi Lut nogome wonage me, at Omaawi Lombok Menggerak Ala nogo nen an nimbirak lambumbunuk, ale'nggen noba panege logonet,

⁴ Kat kapuri ndaganabit nage logonet, kombowologwe apit wigannaremenggaarak paga nen yi aakumi ndi aakumi inanebunu lombok ambik arugun o. Ndi, it kat kombowologwe ndappiyamenggendak nogo o Kanan yi, mondok-mondok unde logowak nduk wogoraagin, yo'nereegerak o.”

⁵ Yoge nagagerik, at Yakup nen wone ambinom yoge logonet, “Togop aret yo'nereegerak me, an o Metit keya waga'lek neegak, kapuri mbere'ndak o Metit logonet ndaganabeegindak Eparayim Manate imbirak an napuri Uruben Timeyon kokwak aret inombaki o.

⁶ Ndi, kat kapuri ando ndaganabumunggun ti perak, kat kapuri aret kwe, ineyate koloorak kenok ti, it inendage paga kologo logogun lek o. Ata, it mbere yi inendage paga aret kologo logogun o.

⁷ Ndi, an yogondak kat yi eeppagage ti, an o Paran-Aram nen name woroorak nduk, awo wage me, kagalo Araken o Kanan nen o Eparata koorok aret kagak kangge mbareegi, niniki abu wakkolage logonet, at eebe o Eparata, endage ambi Mbe'lekem nogome, tu ambet paga time nggween taambereegirak nogo aagaluk manggu kat aret me, nduk eeppagagi o.”

⁸ Yoge nagagerik, at Iterali nogo nen Yutup apuri enegen iige nagagerik, “Wologwe yi tamini o?”

⁹ Yoge mbareegi, at Yutup nen, “Lek o. An o Metit yime wonage me Ala nen wo'nereegerak yi an napuri aret o.” Yoge mbareegi, at Iterali nen, “An nen nale'nggen inoba piyaakit nduk, wogoren an nowagam ya'i panggoppiya mok o,” yoreegerak.

¹⁰ At Iterali nogo aakelo age logonet, enegen ogut agagerak me, yi mendek ndi mendek enegen kaga'lek aret wonage kwe, at Yutup nen at apuri wogoren Iterali owagam piya wage mbareegi, panggeppiinok, inagandin eyak mbaninabeegerak.

¹¹ Inagandin eyak mbaninake nagagerik, Yutup yoge logonet, “An nen kat ketenggen ambinom keyaagin lek mbareegirak kwe, at Ala nen koonggerak paga kat ketenggen keege, kapuri yi kunduk nenegen iige, eeki o.”

¹² Yoge mbareegi, at Yutup nen wologwe nogo Yakup enaame nen tayoppiige nagagerik, Yakup abu'me ena nggween paga wandinik logonet, keyage wareegerak.

¹³ Ti eeke nagagerik, at Yutup nen apuri mbere nogo wogoren Iterali owagam nage nagagerik, awuluk Eparayim nogo Yutup eenggi abeme piganok, Iterali eenggi kwaare'me pege, ndi, oweeluk Manate nogo Yutup eenggi kwaare'me piganok, Iterali eenggi abeme pege, eereegerak kagak kwe,

¹⁴ at Iterali eenggi abe'nggan paga waganogo awuluk Eparayim nogo anobak paga tebengge, ndi, eenggi kwaare'nggan paga waganogo oweeluk Manate anobak paga tebengge, eereegerak.

^15-16 Nogo eeppege nagagerik, ari logonet, “Nogoba Ala wa! An nombo Abarakam inom, nogoba Itak inom, imbirak kat kiniki kunik me, kenegen wogoren nege, An nda'nagagirak kuli nen nok yogondak kuli aap ndomba ndegeninako mengga kwak, an ndegenneren nege, Ndi, an maluk noba age kero, malayikat negen a'nuk, pi'neren nage, eeke menggendak kat Ala aret me, It wologwe yi, kale'nggen inoba piige logomunggun o. An nendage inom, nombo Abarakam endage inom, nogoba Itak endage inom, it wologwe yi nen ki eerit nogo logowak o. Ndi, inombowologwe o nggween paga yime ambik aret wigannarit nogo logowak o,” yinuk, Yutup ale'nggen oba pereegerak.

¹⁷ Oba pege mbareegi, Yakup eenggi abe'nggan paga Eparayim anobak paga wonage nogo Yutup kage nagagerik, eebi mbake logonet, ogoba eenggi at Eparayim anobak paga wonage nogo waganogo oweeluk Manate anobak paga puwak nduk,

¹⁸ ogoba yoge logonet, “Koba wae! Togop lek o, nogoba. Manggu ndarak ti, Manate yi aret me, keenggi abe'nggan ti, waganogo at anobak paga tebenu o.”

¹⁹ Yoreegerak kwe, at ogoba nogo nen, “Lek o, naput! Yagandak ti neenu aret o. At kunduk anebunu ambik age logomenggerik, endage nggwok aret arigin kwe, awuluk perak, endage mondok nggwok lombok age logomenggerik, apuri ndappiyamenggerak wigannarit nogo logonet, inanebunu ambik aret arugun me nduk, eeki o,” yoreegerak.

²⁰ Yoge nagagerik, ale'nggen inoba piige logonet, “It aakumi Iterali mendek nen inale'nggen aap ambi oba pogo logonet, kit mban kinendage kumbunuk, yogo logonet, Ala nen Eparayim Manate eeppiyareegerak ndak-ndak eeppagage logogin, yogo logogun o,” yinuk, wone togop aret yoragagerak paga at Manate manggu aret kwe, peebi mendek negen agago pege, ndi, at Eparayim peebi mendek nogo manggu negen eerogo pege, eeppunuk, ale'nggen inoba piyareegerak.

²¹ Ale'nggen inoba piige nagagerik, at Iterali nen Yutup yoge logonet, “An logonuk lek mbet-mbet aret kambigin kwe, Ala perak, kinarum aret logonet, wokkiren o kombomini inanggween paga nogome pinagi nagin o.

²² Koreewi ti, nggween alik wogorage logonet, kat perak, nggween mili aloobaga it aap Amori mendek inanggween kwe, neegin-narege paga mugogo wumbiinok unde eekkolagagim ti, kat aret wokkigi o,” yinuk, yoreegerak.