Wakkagagerak 46 - Ala Wone Peenok Peebi Mbanak

Yakup akwe apuri inom o Metit nogogwaarak wone

¹ At Iterali nogo amindik-amendek abok aret ko'nok, o Metit naakit nduk tu paga o Mberetiyeba ari nanuk, at ogoba Itak ogoba Ala nogo ake ndomba warogo kani kungge logonet, alut eereegerak.

² Ala alut eeke mbareegi, at Ala nen oonikiya abinggaanggo paga Iterali yoge logonet, “Yakup wae. Yakup wae.” Yoge mbareegi, at Yakup nen, “Yu o, nogoba.”

³ Yoge mbareegi, Ala nen, “Kat kogoba ogoba Ala nogo an aret o. Kat o Metit namenggendak time keegak, kapuri wokkiriminggirak paga kanebunu nggwok aret wiganugun me, kat nen o Metit noorak kagabiti mbarugun o.

⁴ An nen enaani aret ndegenggiren o Metit nage logominggirik, ti'nuk peebi an nen mban kiyokan o Kanan yime wokkiren woraagin o. Ndi, Yutup eenggi ndoonak paga kangge keenok, nggween taambagagin o.”

^5-7 Yoge mbareegi, at Yakup nogo o Mberetiyeba mbo punuk, o Metit nage logonet, apurilogwe kumi-aap inom, inakuwi inom, ombowologwe kumi-aap inom, at paga nen wiganak kenok abok aret nggweendo at Pirawun nen nappereegerak nogo paga kwippiinok, wogoren wogo logonet, inaanggumi inom, inamindik-inamendek o Kanan logonet, kuwak eekkologogwaarak nogo inom, abok aret ko'nok o Metit nogogwaarak.

⁸ At Yakup apuri wiganak aakumi Iterali mendek o Metit nogogwaarak inendage yi o. At Yakup aput manggu ndarak endage Uruben.

⁹ Uruben, at apuri inendage ti, Kenok, Palu, Ketoron, Karimi inom,

¹⁰ Timeyon, at apuri Yemuwen, Yamin, Okat, Yakin, Tokat inom, Timeyon aput Tawun, kwe Kanan mendek nen ndareegerak nogo inom,

¹¹ Lewi, at apuri Nggeroton, Kekat, Merari inom,

¹² Yekura, at apuri Et Onan imbirak o Kanan kambeegwaarak iigak, apuri ando Tiyela, Peret, Tera, at Yekura nogo inom, Peret apuri Ketoron Kamun imbirak inom,

¹³ Itakat, at apuri Tola, Puwa, Ayup, Timoron inom,

¹⁴ Tebulon, at apuri Teret, Elon, Yakelen inom,

¹⁵ at Yakup apuri yi nogo ti, akwe Leya nen o Paran-Aram logonet, aagalogwe aap aret ndaganake logonet, aput ambi kolaga Ndina inom ndareegerak ti aret me, ineebe lambuk togon 33 aret o Metit nogwe,

¹⁶ Ndi, Nggat, at apuri Tipiyon, Kagi, Tiyuni, Etobon, Eri, Arori, Areli inom,

¹⁷ Atet, at apuri Yimana, Yitawa, Yitiwi, Mberiya, inom, it iniriluk kolaga Tera nogo inom, Mberiya at apuri Kebet Malikiyen imbirak inom,

¹⁸ at Yakup apuri yi nogo ti, at Laban nen apuluk Leya ayeloman logowak nduk, kwe Tilapa wogoreegerak nogo nen aagalogwe ndaganabeegerak paga nen wiganak ineebe lambuk togon 16 aret o Metit nogwe,

¹⁹ Ndi, Yakup akwe Araken nogo nen aagalogwe Yutup Mbeniyamin imbirak inom,

²⁰ at Yutup o Metit nogome wonage logonet, aap kugi unde Potipera awi Keliyopolit mendek apuluk kwe Atanat wagangge nagagerik, apuri Manate Eparayim imbirak ndaganabeegerak nogo inom,

²¹ Mbeniyamin, at apuri Mbela, Mbeket, Atiben, Nggera, Naaman, Eki, Oroti, Mupim, Kupim, Aren inom,

²² at Yakup apuri yi nogo ti, kwe Araken nen aagalogwe ndaganabeegerak paga nen wiganak ineebe lambuk togon 14 aret o Metit nogwe,

²³ Ndan, at aput Kutim imbirak inom,

²⁴ Natali, at apuri Yaketen, Ngguni, Yetet, Tiyilem inom,

²⁵ at Yakup apuri yi nogo ti, at Laban nen apuluk Araken ayeloman logowak nduk, kwe Mbilaka wogoreegerak nogo nen aagalogwe ndaganabeegerak paga nen wiganak ineebe lambuk togon 7 aret o Metit nogwe, eereegwaarak.

²⁶ At Yakup inom o Metit nogogwaarak ti, apuri-ombowologwe kumi-aap ineebe lambuk togon 66 aret kwe, ayinggelomini perak, inom lingginulik.

²⁷ Ndi, at Yutup o Metit logonet, apuri mbere'ndak ndaganabeegerak nogo inom, at Yakup apuri o Metit nogogwaarak nogo inom, abok lambuk togon ineebe ti, 70 aret.

Yakup akwe apuri inom o Metit unggwi nogogwaarak wone

²⁸ At Yakup nogo tu paga awo nage logonet, “Nit wogwe aret me, logowam o Nggoten nineenu eeppinaniyak yokkiruwak nduk, Yutup yori nak o,” yinuk, Yekura aa'nduk yonggo nappereegerak.

²⁹ Nappereegerak yori nage mbareegi, at Yutup nogo ogoba imbirak lambuniyak nduk, anggweendo paga lagangge nagagerik, at ogoba Iterali o Nggoten ari nagagerak wonage me ka nage nagagerik, imbirak panggeppunuk, leenggu kunik tit iigak o ndime agagerak.

³⁰ Le yippunuk, at Iterali nen Yutup yoge logonet, “Naput o. Yogondak perak, kat keenik wonage muk ketenggen keegirak me, an kambuurak kenok op aret o.”

³¹ Yoge mbareegi, ti'nuk, at Yutup nen oweewi inom, awuluk inom, at ogoba ame menggaarak inom, yorage logonet, “Nagalo-nogoba inom, nowe-nawot inom, o Kanan wonagaarak nogo muk neya wagaarak wonogwe o.

³² Ndi, it ineyabu ti, kambin-ndomba ndegeninako menggaarak me, wogo logonet, it inaanggumi ndomba-tapi inom, inamindik-inamendek inom, abok aret wogoren wagaarak o Nggoten wonogwe o, yinuk, Pirawun yori nage mbariminggi,

³³ at Pirawun nen wiigiramenggerak ka nogwe kiinok, yokkirage logonet, Kit yabu nano eeko monggotak o? yinuk, kin wokkiige kenok,

³⁴ kit nen, Nit ninombomini nen wande'me kambin-ndomba ndegeninako monggoorak o, yogwi kiinok, it aap Metit mendek nen ndomba unde logorak ineebi mbako menggaarak me, o Nggoten time logorak, E, yuwak nduk, yori nagin o,” yinuk, yoragagerak.