Wakkagagerak 37 - Ala Wone Peenok Peebi Mbanak

Yutup owewologwe inom eereegwaarak wone

¹ At Yakup nogo o alik me noolik at ogoba wonagagim o Kanan nogome aret wonagagerak.

² Wonage logonet, apurilogwe inom eerit nogo nogogwaarak wone yi aret. Yutup nogo wulaga awo tawe tahun 17 ari nagagerak kagak, Yakup akuwi mbere Mbilaka Tilapa imbirak inaagalogwe wologwe nogo inom inogoba aanggumi kambin-ndomba ndegeninako logonet, oweewi nogo maluk eekwi iinok, Yutup nen wone wonok ogoba yori wagagerak.

³ At Iterali nogo abu anggok logonet, aput Yutup ndakkolagagerak me, at oweewi nogo we ambo'me negen piinok, at Yutup nogo mban iniki kunik eeke logonet, ambogoyum obeelom lombok tikarik-tikarok agago penggaarege nagagerak.

⁴ Inogoba nogo nen oweewi nogo ambo'me piinok, at Yutup mban iniki kunik eeke nogo oweewi inigen kogo nogogwaarik, Yutup ineebi ombako logonet, inoone panggok togon mban at yogo nogogwaarak.

^5-7 Togop eekwi wonogwe iigak, ne ambi paga at Yutup nogo abi kage nagagerik, oweewi mbininogo yorage logonet, “Noweewi o. An nabi kagarak wone yokkiraakit nen kinaruk logonip o. Nit abok aret nineyabu yarak me ninombato keele maarogo pit nogo mbako, an nombato keele maarak nogo abera'lek me oolo tiyak ari kagak, kit kinombato keele maarak nogo an nombato keele maarak abu'me yuwo-yuwo wangge kagarak o,” yinuk, yorage nogo oweewi konenggo nogogwaarik, abunuk ineebi lombok ombako logonet,

⁸ “Kat ninowe kendagembogut arikit nduk yagan a? Kabu'me pinanege logomenggendik, wone lengganninake logorak mbaken ya?” yinuk, yogo nogogwaarik, at Yutup abi kagagerak mbininogo yoragagerak paga mondok inanini oba pereegwaarak.

⁹ Ti'nuk, ne ambi paga at Yutup nogo abi alik ambi kage nagagerik, oweewi mbininogo yorage logonet, “Nabi alik ambi kagarak me, yokkiraakit nen kinaruk logonip o.” Ari nagagerik, “Oonegen inom, tut inom, laaluguragan ineebe 11 inom, an nabu'me tebe yinuk, nayuk wukwi iigirak o,” yinuk, yoragagerak.

¹⁰ Abi kagagerak nogo oweewi mbininogo yorage nagagerik, ti'nuk, ogoba yoge mbareegi, ogoba nen enggali wappege logonet, “Kabi ti ngge ndak-ndak kagandak? Kagalo-kogoba inom, koweewi inom, abok aret wogo logomonggoorik, kabu'me nggween paga tebe yinuk, kayuk wuriyak nduk yagan ya?”

¹¹ Yoge mbareegi, it at oweewi inikime nen, “Nit niigak at mban mippuurak ari ilik?” mbako logonet, mondok inanini agaket yogwe iigak, at ogoba perak, abi kagagerak nogo iniki nen liippunuk, abeke, koongge, eeke nagagerak.

Yutup onggo punuk, wonok o Metit nogogwaarak wone

¹² Ne ambi paga at Yutup oweewi abok aret o Tikem koorok time inogoba aanggumi kambin-ndomba ndegeninakwi a nogogwaarak iigak,

¹³ at Iterali nen Yutup yoge logonet, “Kat koweewi kambin-ndomba o Tikem koorok nogome ndegeninakwi wonogwe nogo lek a? Kenegen pegiya nak o.” Yoge mbareegi, at Yutup nen, “E o. Naakit o.”

¹⁴ Ari mbareegi, at Yakup nen ari logonet, “Kat nage logomenggendik, koweewi ineebe nonggop wonogwe nogo liippiige, ndi, kambin-ndomba kunduk nonggop wonogwe nogo liippege, eeke logomenggendik, wone wonok an yo'niri woraanok nduk, nak o,” yinuk, iname o Keboron kobappaga nogome nen nappege mbareegi, at Yutup nogo o Tikem aret nagagerak.

¹⁵ At Yutup nogo o Tikem unggwi nage nagagerik, ineebe lek iinok, agi nagak ogu nagak agan nege me, aap ambi nen kage nagagerik, Yutup yoge logonet, “Wulaga. Kat ta kwaarit nege agandik o?”

¹⁶ Yoge mbareegi, at Yutup nen, “An noweewi kwaaginabit wagarak me, it kambin-ndomba nggeeme ndegeninakwi wonogwe nogo kat keenu kero yo'niru o.”

¹⁷ Yoge mbareegi, at aap nogo nen, “O Ndotan noorak yogwe konenggirak me, muk nagaarak mbaki o.” Yoge mbareegi, at Yutup nogo oweewi muguren o Ndotan wonogwe me iya naakit nduk,

^18-19 inowagam panggo yi naga'lek tayorogon taati nage oweewi ina nakka wogo nogogwaarik, it mban-mban yogo logonet, “Abi kaga nogo wage ti, kinigen wondekkanip o. Alik nanonggwan wagaarak me mondok waruwok o,” yinuk, iniki ambit eeppunuk wariyak wone mbanggo logonet,

²⁰ “At abi kegerak nogo, Nonggop age kaamun? Liippuwok nduk, eebe mondok warogo mbuun ambe ambime wuppunuk, Nggeewo ta'ngge aakumi nibininaka nogo nen nenggerak, yuwok o,” yinuk, yereegwaarak.

²¹ Wariyak yogwe nogo at Uruben aruk konengge nagagerik, “Mbawok agap ndarikit,” mbake logonet, “Wologo wae. Nit ninawuluk aret me, eebe wariyak mage o.”

²² Ari nagagerik, “At amiya wunogo wakwi, at eebe paga andi-pandi eeppugwi, eeriyak mondok lek o. Ata, we enaani mbuun me karume koorok yime wurabuwok o.” Ti yoragagerak nogo ti, eebe mbawok waganogo ogoba wonage me nappikit nduk, yoragagerak.

²³ Yogwe wonogwe me, at Yutup iya wage mbareegi, at oweewi nogo nen ambogoyum obeelom lombok tikarik-tikarok eerak yirik nogo nggoorogo waganggo nogogwaarik,

²⁴ at eebe waganogo mbuun me nogome mbo wuppereegwaarak. Mbuun nogo ti, niyo yenggenak lek woloonak aret wonagagerak.

²⁵ Wuppogo nogogwaarik, mbi nunggwi wonogwe me, aap inanebunu Itamayen mendek o Nggileyat nen o Metit nawok nduk, obari obeelom mendek inom, kundali inom, yibinggami inom, waganeegwaarak nogo abok waganogo unta amborowak paga punuk, luurik-maarak aago wonok tu mbin eerak wogwe iyareegwaarak.

²⁶ Wogwe iigo nogogwaarik, at Yekura nen at oreewi nogo yorage logonet, “Ninawuluk yi, warogo punuk, amiya nogo kumaarogo pumonggoorak paga nit ambi eekkoloorak lek me,

²⁷ at ninawuluk ninamiya mogonik aret me, oba andi-pandi eeppuurak mage o. Ata, it aap Itamayen mendek wogwe yi, nanonggwan aret me, inoona onggo nggerenuwok o.” Yorage mbareegi, at oreewi nogo nen, “Op aret yagan o,” yereegwaarak.

²⁸ “Op aret o,” yinuk, wonogwe me, it aap Miriyan mendek yi mendek ndi mendek kungga nogo wogo mbareegwa, at Yutup mbuun me wonage nogo oweewi nen nippi wogo nogogwaarik, aap Itamayen mendek nogo wogorogo mbareegwa, onggo wu mbuti perak 20 wogorogo nogogwaarik, Yutup wonok o Metit nogogwaarak.

²⁹ Wonok nogogwaarak nogo, at Uruben eenggo'lek me, Yutup mbuun me wonage nduk wondekka nage nagagerik, eebe lek mbareegi, ambogoyum nibinik-ndelenak agago punuk,

³⁰ iyok paga yungguninuk awuri wonogwe me wage nagagerik, yorage logonet, “Wologo wae! Wulaga ti, eebe lek me, an nonggop eeri o?” yinuk,

³¹ iniki aaninggin a'nuk wonage kagak, it nogo nen kambin ngguunok ambi wappogo nogogwaarik, inawot ambogoyum abu obeelom tikarik-tikarok eerak nogo waganogo amiya nogo paga labuk-mbabuk ee'nuk,

³² wonok inogoba nikka nogo logonet, “Nit mbogoyum wonok wogoorak yi, kat kaput ambogoyum aret kaamunggun ilik, lek a, pekket o,” yinuk, wogoreegwaarak.

³³ Wogogo mbareegwa, at Yakup nogo nen yum nogo pekkage nagagerik, “Yi an naput ambogoyum aret o. Nggeewo ta'ngge nen nibinogo nenggerak me, naput Yutup abet aret kanggerak kagi o.”

³⁴ Ari nagagerik, ambogoyum nogo abu nibinik-ndelenak eerogo pake nagagerik, mbogoyum maluk nibinik mendek yippunuk, erabun ndoombunuk, ale ari nagagerak.

³⁵ Le ari wonage me, at apuri wologwe nen, komologwe nen, abok aret wogo nogogwaarik, Yakup iniki yanggonuwok nduk eereegwaarak kwe, iniki yanggo yuurak eebi nen it yorage logonet, “Le ari tit neegak, napuluk kambunuk nogo menggam nagaarak wonage me time aret ka nagin o,” yinuk, aput abuwa nen le mban ari nagagerak.

³⁶ Le ari wonage kagak, aap Miriyan mendek nogo nen Yutup o Metit wonok nogo nogogwaarik, aap endagembogut Pirawun arum waka inowe endage Potipat nen onggo kunggolage nagagerik, imbirak aret wonagagerak.