Wakkagagerak 22 - Ala Wone Peenok Peebi Mbanak

Ala nen Abarakam abut mbaneegerak wone

¹ Ti'nuk, ne ambi paga at Ala nen Abarakam iniki abut mbanikit nduk, yoge logonet, “Abarakam wae,” yoge mbareegi, at Abarakam nen, “Yu o, nogoba.”

² Yoge mbareegi, at Ala nen, “Kat kapuluk ambolom ambit ndakendak kiniki kunik Itak nogo, wonok o Moriya time namenggendak me, puut ambi an nen yokkege neenok, nake warogo kani kunggo mengga kwak, puut ti paga at eebe warogo an nake pi nanu o,” yoreegerak.

³ Yoge mbareegi, ko'lu kuubondendok at Abarakam nogo eenik age nagagerik, Ala ake warogo kani kuniyak nduk, kani nggaganogo nggerembunuk, keledai paga pege nagagerik, aput Itak wagangge, aap ayeloman mbere'ndak, “Woraanip o,” yorage, eeke nagagerik, inom o Ala nen yoreegim nogome aret nogogwaarak.

⁴ Nogo logonet, tu paga nogo mbere yippunuk, ko'lu at Abarakam nogo enegen na'nage nagagerik, puut nogo abu nda aret nakkagagerak.

⁵ Nda aret nakkage nagagerik, at Abarakam nen it aap ayeloman mbere inom nogogwaarak nogo yorage logonet, “An napuluk yi mban nimbirak puut ti paga laganggo logomonggoorik, Ala alut eeppunuk kiniya wambi woraagun me, kit keledai porogo ya'i logonip o.”

⁶ Yorage nagagerik, at Abarakam nen Ala ake warogo kani kuniyak nduk, kani nggaganak nogo waganogo Itak uum paga pege nagagerik, at kani kunik inom, waruk inom, wonok imbirak aret nogogwaarak.

⁷ Imbirak nogo logonet, at Itak nen Abarakam yoge logonet, “Koba wae.” Yoge mbareegi, at Abarakam nen, “Nano o, napuluk?” Yoge mbareegi, at Itak nen, “Kani wurik inom, kani kunik inom, ti abok aret wonok nogwe yi kwe, ndomba warogo kani kuniyak nogo perak, eebe nggeeme wonage o?”

⁸ Yoge mbareegi, at Abarakam nen, “At Ala ake kani kuniyak nduk, at alik nen mban ndomba aagaluk ambi punogo pigin o, napuluk,” yinuk, yorit imbirak aret nogogwaarak.

⁹ Nogo nogogwaarik, Ala nen yoreegim nogome ari nanuk, at Abarakam nogo yugum abena ndoombege nagagerik, kani obaga punuk, aput Itak nogo eenggi keele, iyok keele, maarogo kani ndoonak nogo paga pereegerak.

¹⁰ Pege nagagerik, apuluk warikit nduk, waruk eenggime wagangge mbareegi,

¹¹ at Aliku ALA yonggo malayikat mbogut paga nen oone ari logonet, “Abarakam wae. Abarakam wae,” Yoge mbareegi, at Abarakam nen, “Yu o, nogoba,”

¹² Yoge mbareegi, at Ala yonggo malayikat nogo nen, “Wulaga ti warugun o. Kaput ambolom ambit aret kwe, ili yuulik an nake mondok nggaruk togon aret wo'negendak ti paga kat abet aret Ala kagabiti mbake keegirak me, kaput ti, oba andi-pandi eeppugun o,” yinuk, yoreegerak.

¹³ Yoge mbareegi, at Abarakam nogo ena logurogon pe'nage nagagerik, ndomba ngguunok ambi eyoongga ku'mbanak me, eyak yili-mali aago wonage kage nagagerik, wa nanuk, aput obaane'me Ala ake warogo kani kuneegerak.

¹⁴ Kani kungge nagagerik, at Abarakam nen o nogo endage, “Ninogoba Ala Nen Punogo Pereegim o,” yinuk, tooneegerak me, puut nogo endage, “Iniki Mbakwi Punogo Piige Menggim Ala Abuut o,” yinuk, yogwe wonogwe aret o.

¹⁵ Ti'nuk, Aliku ALA yonggo malayikat mbogut paga nen Abarakam ambinom yoge logonet,

¹⁶ “At Aliku ALA nen, At Abarakam apuluk ambolom ambit ndarak iniki kunik aret kwe, ili yuulik mondok nggaruk togon wo'negerak me,

¹⁷ an nen abet aret nale'nggen nggwok togon oba pege logonet, ombowologwe laaluguragan mbogut paga wonage inom, mbini kale'ngga niyo aa'nggi paga wonage inom, ti pogom abu ngginu-ngginu eerogo wogorigin o. Ombowologwe nda'naremenggaarak nogo nen inawim tebenogo piinok, inawi time aret unde a'nuk logogun o.

¹⁸ Ndi, at nen an yogirak nogo konembunuk liirogon eekerak me, yi aakumi ndi aakumi o nggween paga yime menggaarak nogo abok aret at ndaremenggerak paga inale'nggen kogo logogun o, yinuk, Naliku ALA nobaalombok nendage paga kumbuk mbanggolage logonet, yagi, yegerak me, yokkigi o,” yinuk, yoreegerak.

¹⁹ Wone nogo yoge mbareegi, at Abarakam aput imbirak iniyokan ayeloman piinok laganeegwam nogome wambi wogo nogogwaarik, iname o Mberetiyeba wogogwaarak. Wogo nogogwaarik, at Abarakam nogo o Mberetiyeba time aret wonagagerak.

Nakot apuri wigannogogwaarak wone

²⁰ Ti'nuk peebi nen, “Kat koweeluk Nakot akwe Milaka nogo aagalogwe at ogonggelo obaane'me wologwe ndarogo piigerak ti,

²¹ manggu wulaga endage, Ut. Ambo'me mendek endage Mbut. Ti'nuk, Aram ogoba endage Kemuwen.

²² Ti nen, Ketet, Kato, Pilarati, Yiralat, Mbetuwen, aret ndaganabeegerak o,” yinuk, yogwe at Abarakam aruk koneneegerak.

²³ Ndi, at Mbetuwen nogo nen apuluk kolaga Iribaka aret ndareegerak. It wologwe ineebe 8 yi ti, kwe Milaka nen aret at ogonggelo Abarakam owe Nakot nogo obaane'me ndarogo piyareegerak.

²⁴ Ndi, Nakot kwe ayeloman mendek wogo endage Erewuma nogo nen kunduk aagalogwe inendage Teba, Nggakam, Takati, Maaka, aret ndaganabeegerak.