Wakkagagerak 13 - Ala Wone Peenok Peebi Mbanak

Lot Abaram imbirak inalitak ogogwaarak wone

¹ Ndi, at Abaram nogo akwe inom, amindik-amendek inom, abok aret wonok o Metit nen wundi wogo logonet, at oweeluk aput Lot nogo inom o Kanan, o ame pa'nggwe karume nogome unggwi wogogwaarak.

² At Abaram nogo at aanggumi kambin-ndomba inom, tapi-keledai inom, mbuti emas inom, mbuti perak inom, amindik-amendek ambik aret me, at eenggi warak lombok aret wonagagerak.

³ O time wonagagerik, ti'nuk, peebi nen ambime unggwagak ambime unggwagak eerit o Mbeten ari nogo nogogwaarik, maan aa'nduk at o Mbeten agi nikkagak o Ayi ogu wukkagak oolo time ooliya wuppunuk,

⁴ yugum logonogo pereegim nogome unggwi nogo nogogwaarik, time nen at Aliku ALA endage kunogo alut eereegerak.

⁵ Nogome wonogo logonet, at Lot nogo Abaram imbirak nege logonet, aanggumi kambin-ndomba inom, tapi-keledai inom, akwe-apuri inom, ayeloman mini inom, ambik aret wonagagerak.

⁶ Ndi, it Abaram Lot imbirak inaanggumi apit ogogwaarak paga o taganak mbuuluk aret me, imbirak o ambi'me logorak meek aret age mbareegi,

⁷ Abaram aanggumi ndegeninaka inom, Lot aanggumi ndegeninaka inom, wone wako nogogwaarak. Ndi, ti eyom paga it aap inanebunu Kanan mendek inom, Perit mendek inom, time aret wonogogwaarak.

⁸ Togop aret wone wako mbareegwa, at Abaram nen wone koonogo Lot yoge logonet, “Nit nimbirak ambit aret me, kat an nimbirak inom, kat kawuri an nawuri inom, ndugwi puurak ti, mondok meek aret me,

⁹ ninalitak mogonak logowok nduk, kat nen keenggi kwaare'me nggwe nage keenok, an nen keenggi abeme nggwe nage, ndi, kat nen keenggi abeme nggwe nage keenok, an nen keenggi kwaare'me nggwe nage, eerigin me, kat mban miiru o.”

¹⁰ Yoge mbareegi, at Lot nogo enegen pe'nage nagagerik, o Eren Aliku ALA nen ogobakkigireegerak nogo inom, o Metit abeenok Towat pa'nggwe inom, imbirak abu obeelom wonagagerak ti kokwak, nggween niyo Yoraran ndirok kobappaga abu obeelom niyo eneeri wundit nage menggim nggween mili lombok aret kagagerak. Ti kagagerak nogo ti, at Aliku ALA nen o kota Torom inom, Nggomora inom, awo lek eerogo pega'lek kagak kagagerak.

¹¹ At Lot nogo niyo Yoraran ndirok kobappaga time abok aret op mbareegi, miikkolage nagagerik, oonegen lagi wage menggim pa'nggwe nogome aret nagagerak. Ti eeko nogogwaarik, it Abaram Lot imbirak inalitak ogo logonet,

¹² at Abaram nogo, o Kanan nogome puk age kagak, at Lot nogo niyo Yoraran ndirok kobappaga yaga'lelo ambik wurik enggela'me o Torom koorok time ooliya wuppunuk wonagagerak.

¹³ It aakumi o Torom nogome inobaabut mondok maluk lombok logonet, Aliku ALA enegen kagak, inagabiti mbaka'lek maluk eeko menggam kagak aret nagagerak.

At Abaram o Keboron nagagerak wone

¹⁴ At Lot Abaram imbirak inalitak ogo mbareegwa, at Aliku ALA nen Abaram owagam wage nagagerik, yoge logonet, “Kat keebe mi'ndak me taati nen o irip-irip agi nggwe ogu nggwe abok aret kenegen nakket o.”

¹⁵ Yoge nagagerik, “O yi taganak kat kenegen kagandak ti, abok aret kat inom, kat kapuri ndaganabemenggendak inom, unde eeppunuk, mondok-mondok logobagip nduk wokkiraagin o.”

¹⁶ Yoge nagagerik, “Mbini kale'ngga lingginiyak op nen lingginogo kapuri ndaganaburak ti, ndak-ndak wokkirigin, yokkiriyak kwe, lingginiyak meek me, Mbini kale'ngga lingginiyak meek ti kokwak aret wokkirigin o, yinuk, yokkigi o.

¹⁷ Togop me, O kat wokkirigin, yokkigirak kenegen kagandak ti, yogondak tigitogon aret wokkege me, irip agi-ogu, unggut aru-ogwe tigitogon kenegen yomboonit nak o.”

¹⁸ Yoge mbareegi, at Abaram nogo, o nogome teppunuk, o Keboron eyo teno alome o Mamere koorok nogome ari woraanuk, Aliku ALA alut eeke logonet, ake warogo wogoge logowak nduk, yugum logonogo pereegerak.