Wakkagagerak 11 - Ala Wone Peenok Peebi Mbanak

O Mbaben ta'mban-mban wukwi me mappiyareegerak wone

¹ O nggween paga yime apit aret yi aakumi ndi aakumi inoone unggut alitik-alitak abu lek inoone ambit mban aret yogo nogogwaarak.

² It inoone ambit aret wonogo logonet, it abok aret luuwi mondo agan oonegen wundi wage menggim pa'nggwe time ari nogo logonet, o Tineyat kobappaga time kwaappogo nogogwaarik, nogome aret ye mbanggologogwaarak.

^3-4 Ye mbanggologo nogogwaarik, time wonogo logonet, ne ambi paga it mban-mban wone mbanggo logonet, “Nit o nggween paga yime ma'nogwe niyo, ninendage mondok nggwok eekkolaawok nduk, nggween longgo warogo abu obeelom worarogo punuk, o ambit nggwok kirin nggorek mbogut imbirak ndak-ndak aret wuruwok nduk, kuwak ari woraanip o,” yinuk, kuwak ari wogo nogogwaarik, yugum obaane'me nggween longgo warogo ta'mban-mban eerogo kwippit laganggwi, ndi, nggween nggabok obaane'me mut amburu negen aspal nogo nggalenogo mbenanggwi, eerogo wurit laganggo nogogwaarak.

⁵ It aakumi o nggwok kirin nggorek wurit laganggwi nogo at Aliku ALA nen enegen iige nagagerik, “Nonggop eekwi iyaamun?” yinuk, pegiya wambi wagagerak.

⁶ Pegiya wambi wage nagagerik, ari logonet, “It aakumi yi, inoone inom, inanebunu inom, ambit aret me, Yogop eeruwok o, yinuk, yi aret eekwi me, logonet-logonet it ambi eeriyak mbakwi nogo ti, abunuk nggwok aret eeko logogun kagi,”

⁷ ari nagagerik, “It inoone ambit yogwe nogo konen-konen yogo logokwak, inoone inalitak lombok eerogo piyaawok o.”

⁸ Ari nagagerik, at Aliku ALA nen o nggween paga yi o ndi o mak eerogo nappiige mbareegi, it aakumi o nggwok wurit laganggwi nogo lek aret agagerak.

⁹ At Aliku ALA nen yi aakumi ndi aakumi o nggween paga yime inoone alitak lombok agan nugu logowak nduk, yi awi ndi awi mak eerogo piyareegerak mbaganit nogo logonet, inoone alitak lombok agan nogogwaarak kenok, o nogo endage Mbaben aret tooneegwaarak.

Tem apuri wigannogogwaarak wone

¹⁰ Aap Tem apuri wiganak inendage yi o. Yi mendek ndi mendek abok aret niyo paga ndonggoninake mbareegi, tahun mbere eeppunuk, aap Tem ndarak kagak tahun 100 eeke mbareegi, aput Arapakatat aret ndareegerak.

¹¹ Ndake nagagerik, tahun lima ratus ari nage kagak, apurilogwe ando aap inom, kumi inom, ndaganabeegerak.

¹² Ndi, at Arapakatat tahun 35 eeke nagagerik, aput Tela aret ndareegerak.

¹³ At Tela ndake nagagerik, tahun empat ratus tiga ari nage kagak, apuri ando aap inom, kumi inom, ndaganabeegerak.

¹⁴ At Tela nogo tahun 30 eeke nagagerik, aput Ebet aret ndareegerak.

¹⁵ Ndake nagagerik, tahun empat ratus tiga ari nage kagak, apurilogwe ando aap inom, kumi inom, ndaganabeegerak.

¹⁶ At Ebet nogo tahun 34 eeke nagagerik, aput Pelek aret ndareegerak.

¹⁷ Ndake nagagerik, tahun empat ratus tiga puluh ari nage kagak, apuri ando aap inom, kumi inom, ndaganabeegerak.

¹⁸ Ndi, at Pelek tahun 30 eeke nagagerik, aput Ereku aret ndareegerak.

¹⁹ Ndake nagagerik, tahun dua ratus sembilan ari nage kagak, apurilogwe ando aap inom, kumi inom, ndaganabeegerak.

²⁰ At Ereku tahun 32 eeke nagagerik, aput Teruk aret ndareegerak.

²¹ Ndake nagagerik, tahun dua ratus tujuh ari nage kagak, apuri ando aap inom, kumi inom, ndaganabeegerak.

²² At Teruk tahun 30 eeke nagagerik, aput Nakot aret ndareegerak.

²³ Ndake nagagerik, tahun dua ratus ari nage kagak, apuri ando aap inom, kumi inom, ndaganabeegerak.

²⁴ At Nakot tahun 29 eeke nagagerik, aput Tera aret ndareegerak.

²⁵ Ndake nagagerik, tahun seratus sembilan belas ari nage kagak, apurilogwe aap inom, kumi inom, ndaganabeegerak.

²⁶ Ndi, at Tera tahun 70 eeke nagagerik, aput Abaram inom, Nakot inom, Karan inom, ndaganabeegerak.

Aap Tera apuri wigannogogwaarak wone

²⁷ At Tera apuri wigannogogwaarak inendage yi o. At Tera nen apuri Abaram inom, Nakot inom, Karan inom, ndaganabeegerak. At Karan nogo nen apuluk Lot aret ndareegerak.

²⁸ Ndi, at Karan ogoba Tera awo eenik wonage kagak aput Karan nogo nda'nagagim aakumi Katirim iname yaga'lelo Ut nogome aret aa'nduk kambeegerak.

²⁹ At Abaram Nakot imbirak kumi wogonabeegwaarak nogo ti, at Abaram nen kwe Tarayi wagangge, ndi, at Nakot nen kwe Milaka aap Karan apuluk nogo wagangge, eereegwaarak. At Karan nogo nen apuri Milaka Yitaka imbirak ndaganabeegerak.

³⁰ Ndi, at kwe Tarayi nogo perak, aagaluk ndaka'lek wubili aret wonagagerak.

³¹ Ne ambi paga at aap Tera nogo nen o Kanan naakit nduk, at aput Abaram wagangge, at ombooluk Karan apuluk Lot nogo wagangge, ayinggelo Abaram akwe Tarayi nogo wagangge, eeke nagagerik, aakumi Katirim iname yaga'lelo Ut nogome mbo punuk, o Karan time aret ari nanuk, nogome mondok puk aret ogogwaarak.

³² Nogome wonogo logonet, at Tera nogo ndarak kagak tahun dua ratus lima eeppunuk aret kambeegerak.